Read Tzeltal Esdras 9 Bible Online

Esdras 9 - Tzeltal bible

Esdras 9

¹C'alal hu' ta pasel a ini, te príncipaletic talic ta jtojol, hich la yalbonic: Te pueblo Israel soc te sacerdotehetic soc levitahetic ma ba parte yac'oj sbahic ta stojol te yantic ants-winiquetic ta q'uinal, ha te cananeo, heteo, ferezeo, jebuseo, amonita, moab, egipcio soc te amorreohetic, hich yac spasbelic te bin ilobtic sba yu'unic.

²Como yic'beyejic yihnaminic te yantsil-nich'nabic soc hich nix la spasic te snich'nabique. Hich la scap sbahic te ch'ultesbil ts'umbalil soc te ants-winiquetic ta q'uinal. Te mach'atic nahil la spasic te mulil ini, ha'ic te príncipaletic soc te gobernadoretic, xchihic.

³C'alal la jca'iy ini, la jch'i' te jmuc'ul c'u' soc te jnahtil-c'u' yu'un, soc la jbul loq'uel stsotsel jol soc quisim, la juhcan jba ta tulan mel-o'tan.

⁴Spisil te mach'atic la xi'ic te sc'op te Dios yu'un Israel la stsob sbahic ta jtojol ta scaj te ma junuc yo'tanic te mach'atic suhtic tal ta chuquel. Pero te ho'one, huculon ta tulan mel-o'tan ha to c'alal la sta yorahil te ya yich' aq'uel milbil mahtanil ta tibiltic.

⁵Ta yorahil yaq'uel te mahtanil ta tibiltic, hahchon, loc'on tey ta jwocol, jch'i'ojix a te jmuc'ul c'u' soc te jnahtil-c'u', la jquejan jba, la hach jc'ab ta stojol Jehová te Dios cu'un,

⁶hich la jcal: Dios cu'un, ma jna' bin ya jpas, soc ay q'uexlal ya ca'iy te ya jach mohel jsit ta atojol, Dios cu'un, como te jmulcotic sohlix mohel ta jolcotic, soc te faltahetic cu'uncotic c'ohemix c'alal ta ch'ulchan.

⁷C'alal ta yorahil te jme'jtatcotic ha to c'alal ora yo'tic bayel te jmulcotic. Ta scaj te jmulcotic, te ho'otcotic soc te ajwaliletic soc sacerdotehetic cu'uncotic ac'otcotic ta sc'ab te ajwaliletic ta yantic nacionetic, ac'otcotic ta lajel ta espada, ta chuquel, ta elc'anel soc ta q'uexlal, hich te bin ut'il ta ora ini.

⁸Pero yo'tic, ta jts'ihn nax, la ya'botic quilcotic te sc'uxul yo'tan te Jehová te Dios cu'untic, soc la yac' te ay mach'atic ay cu'uncotic te hilemic ta libre soc la yac' te ay jun lugar ta ch'ul awilal yu'un te banti jun co'tancotic ya xhu' ya xnahinotcotic. Hich te Dios cu'uncotic la yac' sacubuc q'uinal ta jsitcotic soc la yac' jcux co'tancotic jts'ihnuc yu'un te mosohinel cu'uncotic.

⁹Aunque ayotcotic ta mosohil, ma ba spihtesejotic ta yo'tan te Dios cu'uncotic ta banti ayotic ta mosohil, ha la yac' te sc'uxul yo'tan ta jtojolcotic ta stojol te ajwaliletic yu'un Persia; la ya'botcotic xan yip co'tancotic ta scha'pasel xan te sna te Dios cu'uncotic soc ta scha'pasel te banti jihnem soc la scoltayotcotic yu'un jcontracotic ta Judá soc ta Jerusalén.

¹⁰Pero yo'tic, Dios cu'uncotic, ¿bin ya xhu' ya calcotic yu'un te bin jpasojcotique? Como la jquihquitaycotic te mandariletic awu'un

¹¹te hich la awal ta scuenta te jalwanejetic te a'batetic awu'un: Te q'uinal banti ya x'och awich'ic, ha bohloben sc'oblal yu'un sbohlilic te mach'atic nahinemic tey a; ta jehch ta jehch la snojesic ta bintic ihlaybil.

¹²Ha yu'un ma me xawa'beyic te awantsil-nich'nabic te squerem-nich'nabic soc ma me xawa'beyic yic' te yantsil-nich'nabic te aquerem-nich'nabic, soc ma me xalehbe lamal q'uinal ta stojolic soc te bin lec ya xc'ohtic yu'une; scuenta yu'un tulan ya xc'ohex soc yu'un yac awe'ic te sit te c'ax lec ya yac' te q'uinal soc yac awa'be yich'ic hilel sbahtel q'uinal te ats'umbalique.

¹³Te c'alal c'ax spisil bintic c'oht ta jcuentacotic ta scaj te chopol ca'telcotic soc te muc'ul mulil cu'uncotic, ha'at, Diosat cu'uncotic, ma ba hich la awa'botcotic castigo te bin ut'il te jmulcotic, soc ay mach'atic la awihquitaybotcotic hilel hich te bin ut'il ini.

¹⁴¿Ya to bal jcha'c'axuntaybatcotic te mandariletic awu'un, soc ya bal quic' jbahcotic soc te yantic pueblohetic te ya spasic te bintic ilobtic sbahe? ¿Ma bal hichuc ya x'ilinat ta jtojolcotic te yac alajinotcotic ta c'axel, te mayuc mach'a cuxul ya xhil?

¹⁵¡Jehová, Dios yu'un Israel, toj awo'tan! Ay mach'atic cuxul hilel cu'uncotic, hich te bin ut'il ta ora ini. Li' ayotcotic ta atojol soc te jmulcotic, ma spas te ya x'ayinotcotic ta atojol ta scaj te jmulcotic, xchi ta sc'oponel Dios.