Read Tzeltal Nehemías 3 Bible Online

Nehemías 3 - Tzeltal bible

Nehemías 3

¹Te muc'ul sacerdote Eliasib soc te yermanotac ta sacerdotehil la scha'pasic xan te Ochibal yu'un Tuminchijetic. La schahpanic soc la yotsesbeyic spuertahul; la scha'pasic c'alal ta ilo-q'uinal yu'un Ho'winic,[1] c'oht c'alal ta ilo-q'uinal yu'un Hananeel.

²Tey ta sts'ehl a'tejic te winiquetic yu'un Jericó; ta sts'ehlic a'tejic Zacur snich'an Imri.

³Te sts'umbal Sanaa la scha'pasic te Ochibal yu'un Chay; la yac'ticlambeyic ste'el soc la yotsesbeyic puertahetic yu'un soc staq'uinal soc sc'atal-te'el.

⁴Ta sts'ehlic a'tej te Meremot snich'an Urías, snich'an Cos. Ta sts'ehl a'tej te Mesulam snich'an Berequías snich'an Mesezabeel. Ta sts'ehl a'tej te Sadoc snich'an Baana.

⁵Tey nix ta sts'ehl a'tejic te mach'atic yu'un Tecoa, pero te mach'atic ich'bilic ta muc' yu'unic ma ba la scoltayic ta a'tel te jcuentahinej a'tel yu'unique.

⁶Te Joiada snich'an Paseah soc te Mesulam snich'an Besodías la scha'pasic xan te Poco' Ochibal; la yac'ticlambeyic ste'el soc la yotsesbeyic puertahetic yu'un soc staq'uinal soc sc'atal-te'el.

⁷Ta sts'ehl a'tejic te Melatías te talem ta Gabaón soc te Jadón te talem ta Meronot, winiquetic te talemic ta Gabaón soc ta Mizpa, te ayic ta cuentahinel yu'un te gobernador yu'un te q'uinal ta jehch muc'ul-ha'.

⁸Ta sts'ehl a'tej te Uziel snich'an Harhaía, jtuhl te jpas-platahetic. Ta sts'ehl a'tej te Hananías, jtuhl jpas-perfume. Hich cha'pasbil hil te Jerusalén c'alal ta pimil ts'ahc.

⁹Ta sts'ehl a'tej te Refaías snich'an Hur, te gobernador yu'un j'ohlil sq'uinal Jerusalén.

¹⁰Ta sts'ehl, ta stojol sna, a'tej te Jedaías snich'an Harumaf. Ta sts'ehl a'tej te Hatús snich'an Hasabnías.

¹¹Te Malquías snich'an Harim soc te Hasub snich'an Pahat-moab a'tejic te banti quechel c'ohel, soc te ilo-q'uinal yu'un Hornos.

¹²Ta sts'ehl a'tejic soc yantsil-nich'nab te Salum snich'an Halohes, te gobernador yu'un j'ohlil sq'uinal te Jerusalén.

¹³Te Hanún soc te mach'atic nahinemic ta Zanoa la scha'pasic xan te Ochibal yu'un te Spamlej, la scha'pasic soc la yotsesbeyic te puertahetic yu'un soc staq'uinal soc sc'atal-te'el. Soc la scha'pasic xan lajunwinic yoxbahc' (1,000) xuhc'ubil[2] te ts'ahc c'alal ta Ochibal yu'un Tsa'najibal.

¹⁴Te Malquías snich'an Recab, gobernador yu'un te q'uinal smacoj te Bet-haquerem, la scha'pas xan te Ochibal yu'un Tsa'najibal soc la yotsesbe puertahetic yu'un soc staq'uinal soc sc'atal-te'el.

¹⁵Te Salum snich'an Colhoze, gobernador yu'un te q'uinal smacoj te Mizpa, la scha'pasbe xan te Ochibal yu'un te Sloq'uib-ha'; la scha'pas xan, la spasbe smahquil, la yotseslambe puertahetic soc staq'uinal soc sc'atal-te'el, soc la scha'pas xan te sts'ahcul te yawil-ha' yu'un Siloé ta stojol te Ts'umbil Nichimaltic yu'un Ajwalil, c'alal ta mohibaletic te cohem tal ta Pueblo yu'un David.

¹⁶Te Nehemías snich'an Azbuc, gobernador yu'un j'ohlil sq'uinal Bet-sur, la scha'pas xan c'alal ta banti snuhp'usitayej sba soc te muquenaletic yu'un David, c'alal ta pasbil yawil-ha' soc ta sna Soldadohetic te muc' bin spasojic.

¹⁷Ta sts'ehl a'tejic te levitahetic: ha te Rehum snich'an Bani; soc ta sts'ehl ha te Hasabías, te gobernador yu'un te j'ohlil q'uinal smacoj te Keila, ha la spas ta scuenta te q'uinal te scuentahinej.

¹⁸Ta sts'ehl la scha'pasic xan te smohloltac: ha te Bavai snich'an Henadad, te gobernador yu'un te yan j'ohlil q'uinal smacoj te Keila.

¹⁹Ta sts'ehl tey ay a te Ezer snich'an Jesúa, te gobernador yu'un Mizpa, la scha'pas jmahc' xan te ay ta stojol te mohel yu'un te yawil a'tejibaletic yu'un guerra c'alal ta xuhc te ts'ahque.

²⁰Ta sts'ehl ay te Baruc snich'an Zabai, ta spisil yo'tan la scha'pas jmahc' xan, ta xuhc ha to c'alal ta sti'il sna te muc'ul sacerdote Eliasib.

²¹Ta sts'ehl tey ay a te Meremot snich'an Urías, snich'an Cos, la scha'pas jmahc' xan c'alal ta spuertahul sna te Eliasib ha to c'alal ta sjehchelul te snahe.

²²Ta sts'ehl la scha'pasic xan te sacerdotehetic te nahinemic ta spamlej.

²³Ta sts'ehlic tey ay a te Benjamín soc Hasub, a'tejic ta stojol te snahique; ta sts'ehl ay te Azarías snich'an Maasías, snich'an Ananías, a'tej ta stojol te snahe.

²⁴Ta sts'ehl tey ay a te Binuy snich'an Henadad, la scha'pas jmahc' xan c'alal ta sna Azarías ha to c'alal ta banti sutoj sba, ta xuhc te ts'ahque.

²⁵Te Palal snich'an Uzai, la scha'pas xan ta stojol te xuhc, soc te toyol ilo-q'uinal yu'un te sna ajwalil te ay ta yamaq'uil te jcanan-soldadohetic. Ta sts'ehl tey ay a te Pedaías snich'an Faros.

²⁶Te a'batetic yu'un te Templo te nahinemic ta Ofel la scha'pasic xan c'alal ta stojol banti ya xloc' tal c'ahc'al tey ta Ochibal yu'un Ha' soc te toyol ilo-q'uinal.

²⁷Ta sts'ehl tey ay a te mach'atic talemic ta Tecoa, la scha'pasic jmahc' xan ta stojol te ilo-q'uinal ha to c'alal ta sts'ahcul Ofel.

²⁸Te sacerdotehetic a'tejic c'alal ta Ochibal yu'un Cawuhetic bahel, jujutuhl ta stojol te snahique.

²⁹Ta sts'ehl, ha la scha'pas te Sadoc snich'an Imer ta stojol te snahe; ta sts'ehl a'tej te Semaías snich'an Secanías, te jcanan-ti'nahil yu'un te Ochibal yu'un Sloq'uib C'ahc'al.

³⁰Ta sts'ehl, ha la scha'pasic jmahc' xan te Hananías snich'an Selemías, soc te Hanún te swaquebal snich'an te Salaf. Ta sts'ehlic ay te Mesulam snich'an Berequías, la scha'pas xan ta stojol scuarto.

³¹Ta sts'ehl ay te Malquías, jtuhl jpas-plata, la scha'pas xan c'alal ta sna te a'batetic yu'un te Templo soc te sna jchombajeletic, ta stojol te Ochibal yu'un Ocliyel c'alal ta tsahlul na ta xuhc.

³²Soc c'alal ta tsahlul na ta xuhc ha to ta Ochibal yu'un Tuminchijetic, ha la scha'pasic xan te jpas-platahetic soc te jchombajeletic.