Read Tzeltal Ester 2 Bible Online

Ester 2 - Tzeltal bible

Ester 2

¹Ta patil, te c'alal lamalix a te yilimba te ajwalil Asuero, la sna' te Vasti soc te bin la spas, soc te bin mandaril la yal ta scontra.

²Hich la yalic te a'batetic yu'un: Ac'a yich' lehbeyel t'ujbil ach'ixetic.

³Te ajwalil ac'a sle winiquetic ta jujusehp q'uinal te ban c'alal scuentahinej te ya yiq'uic tal spisil te t'ujbil ach'ixetic ta sna antsetic ta Susa, banti nahinem te ajwalil. Ac'a yich'ic cuentahinel yu'un Hegai te eunuco-winic yu'un te ajwalil te ya scanantay te antsetic, soc ac'a ya'be te bintic ya spoxtay sbahic a scuenta st'ujbilalic.

⁴Te ach'ix te ya smulan te ajwalil, ac'a sjelolin te Vasti, xchihic. Lec la ya'iy te ajwalil, hich la spas.

⁵Ta Susa, banti nahinem te ajwalil, ay nahinem jtuhl judio-winic, Mardoqueo snich'an Jair, snich'an Simei, snich'an Cis, sts'umbal Benjamín,

⁶ha te mach'a pajal ic'ot loq'uel ta chuquel ta Jerusalén soc te Jeconías ajwalil yu'un Judá soc te yantic jchuqueletic te ic'otic bahel yu'un te Nabucodonosor ajwalil yu'un Babilonia.

⁷Te Mardoqueo la scoltes te Hadasa, ha te Ester te yantsil-nich'an stajun, como me'ba'. Buen t'ujbil ach'ix soc buen lec ta ilel. C'alal cham te sme'stat, te Mardoqueo la yic' scuenta yal-snich'an.

⁸Te c'alal puhc ta halel te mandaril yu'un te ajwalil, soc te la yich'ic tsobel bayel ach'ixetic ta Susa banti nahinem te ajwalil, soc te canantaybilic yu'un Hegai, ha nix hich ic'ot bahel ta sna ajwalil te Ester, ta canantayel yu'un Hegai te jcanan-antsetic.

⁹Te Hegai buen lec la yil te ach'ix soc lec c'oht ta stojol, ha yu'un ta ora nax la yac' ta a'beyel te bintic ya spoxtay sba a soc swe'el scuenta st'ujbilal. Soc la ya'be huctuhl tsahbil ach'ixetic yu'un te sna ajwalil, la yic' bahel soc ta banti lequil lugar ta sna te antsetique.

¹⁰Te Ester ma ba la yal te ban slumal soc te mach'a sts'umbal, como halbot yu'un Mardoqueo te ma ba ya yal.

¹¹Te Mardoqueo jujun c'ahc'al ya xc'ax yilulan ta yamaq'uil sna te antsetic, yu'un yo'tan sna' teme lec ay te Ester soc te bin ya xpasbot.

¹²Lahchayeb (12) u ya yich chahpanel te ach'ixetic: waqueb u ya x'a'botic aceite yu'un mirra soc waqueb xan u ya x'a'botic perfumehetic soc cremahetic te ya stuhunic antsetic. Patil jujuthl ya xtal ta stojol te ajwalil

¹³Te c'alal ya xloc' hahchel ta sna antsetic yu'un ya xbaht ta stojol te ajwalil, ya x'a'bot bahel spisil bintic ya sc'an ya yich' bahel.

¹⁴Ya xbaht ta tibiltic, ta yan c'ahc'al ya xbaht ta yan na yu'un antsetic, ya xcanantayot yu'un te Saasgaz te eunuco-winic yu'un te ajwalil te ya scanantay te antsetic yu'un te ajwalil. Tey ma ba ya xtalic xan ta stojol te ajwalil, ha nax teme mulanot yu'un te ajwalil soc ya x'ic'ot yu'un ta sbihil.

¹⁵Te c'alal c'oht yorahil te ic'ot tal ta stojol ajwalil te Ester, te yantsil-nich'an Abihail, stajun Mardoqueo te coltesot yu'un, ha nax la yich' bahel te bin halbot yu'un te Hegai, te eunuco yu'un te ajwalil te ya scanantay te antsetique. Te Ester lec c'oht ta o'tanil yu'un spisil te mach'atic ilotic yu'un.

¹⁶Hich te Ester ic'ot bahel ta stojol te ajwalil Asuero ta sna, ta slajunebal u Tebet, ta shuquebal ha'bil yochel ta ajwalil a.

¹⁷Te Asuero c'ax hich c'ux la ya'iy ta yo'tan a te Ester te bin ut'il te yantic antsetic, c'ax hich lec c'oht a ta stojol te ajwalil te bin ut'il spisil te yantic ach'ixetique. La ya'be ta sjol te scorona ajwalil, la ya'be sjelolin ta ajwalil-ants te Vasti.

¹⁸Te ajwalil la spasbe muc'ul q'uin yu'un Ester spisil te príncipaletic soc a'batetic yu'une. Soc la spehc'an te pataniletic ta jujusehp q'uinal soc la spucticlan bayel mahtaniletic, ha chican bin yilel yutsil o'tanil yu'un te ajwalil.

¹⁹Te c'alal la yich'ic tsobel scuenta schebal buelta te ach'ixetic, te Mardoqueo hucul ta yochibal sna a te ajwalil.

²⁰Te Ester ma ba la yal banti slumal soc mach'a sts'umbal, hich te bin ut'il halbot yu'un te Mardoqueo, como te Ester ya spas te bin ya xhalbot yu'un te Mardoqueo, hich te bin ut'il c'alal coltesot yu'une.

²¹Ta hich ora, te c'alal hucul ta yochibal sna a te ajwalil te Mardoqueo, te Bigtán soc Teres, cheb eunuco-winiquetic yu'un te ajwalil te yac scanantaybelic te puerta, ilinic soc la schapic te ya smilic te ajwalil Asuero.

²²Te c'alal hich la ya'iy te Mardoqueo la yalbe ya'iy te ajwalil-ants Ester, hich te Ester la yalbe te ajwalil ta scuenta sbihil te Mardoqueo.

²³La yich' joc'oyel ta lec, chicnaj te melel nix a. Hich schebal te jcanan-ti'nahiletic la yich'ic jihpanel ta te'. Soc la yich' ts'ihbayel hilel ta stojol te ajwalil ta libro yu'un te ya'tel te ajwalil.