Read Tzeltal Ester 4 Bible Online

Ester 4 - Tzeltal bible

Ester 4

¹Te c'alal la ya'iy te Mardoqueo te bin c'ohtix ta pasel, la sch'i' sc'u' yu'un, la slap pac' yu'un mel-o'tan soc la yac' stanul c'ahc' ta sjol, la sbehentay te pueblo, yac ta tulan aw.

²C'oht c'alal ta yochibal sna te ajwalil, pero ma x'ac'ot ochel tey a te mach'a slapoj pac' yu'un mel-o'tan.

³Soc ta spisil ta jujusehp q'uinal te banti c'oht te mandaril yu'un te ajwalil ay bayel mel-o'tan ta stojol te judiohetic, la scom swe'elic, ay oq'uel soc xjuyetic ta oq'uel; bayel wayic ta stanul c'ahc' soc ta ch'ixal-pac'.

⁴Te ach'ixetic soc te eunucohetic yu'un te Ester baht yalbeyic ya'iy, mero c'ux la ya'iy te ajwalil-ants. La sticombe sc'u' spac' yu'un yacuc slap te Mardoqueo soc yacuc schol loq'uel te pac' yu'un mel-o'tan; pero te Mardoqueo ma ba la sc'an la yich'.

⁵Ha yu'un te Ester la yic' tal te Hatac, jtuhl eunuco yu'un te ajwalil te ac'bil ta a'tel ta stojol, la sticon bahel ta stojol te Mardoqueo yu'un ya sjoc'obe bin c'ohem ta pasel soc bin yu'un hich ay.

⁶Hich te Hatac baht yil te Mardoqueo ta plaza yu'un te pueblo te ay ta stojol te yochibal sna te ajwalil.

⁷Te Mardoqueo la yalbe ya'iy spisil te bintic c'oht ta pasel, soc te jayeb plata yaloj te Amán te ya yac' ta yawil sc'ulejal te ajwalil scuenta slajinel te judiohetique.

⁸Soc la ya'be copia yu'un te mandaril te ac'bil ta Susa yu'un ya yich'ic lajinel, scuenta yu'un ya ya'be yil te Ester soc ya ya'be sna'. Soc la yalbe te yacuc xbaht ta stojol te ajwalil, te yacuc xc'opoj yu'un te slumale.

⁹Suht tal te Hatac, la yalbe ya'iy te Ester te bin la yal te Mardoqueo.

¹⁰Ha yu'un te Ester la spas ta mandar te Hatac te hich me ya yalbe te Mardoqueo:

¹¹Spisil te a'batetic yu'un te ajwalil soc te pueblohetic ta jujusehp q'uinal yu'un te ajwalil sna'ojic te mach'ayuc a, winic o ants, te ya x'och bahel ta yutil yamaq'uil ta yilel te ajwalil, teme ma ba ic'bile, junax ley ay ta scuenta: ha te ya me xlaj yu'un. Ha nax ya xcol te mach'a ya xhahchbot te bastón yu'un oro yu'un te ajwalil. Te ho'one, ayix lajuneb scha'winic (30) c'ahc'al te ma ba sticonejon ta iq'uel te ajwalil, xchi.

¹²Te c'alal la ya'iy te Mardoqueo te bin la yal te Ester,

¹³hich la sticon ta halbeyel te Ester: Ma xacuy te atuquel cuxul ya xhilat ta sna ajwalil, te ma ba pajal ya xlajat soc te yantic judiohetique.

¹⁴Como teme jc'axel ma ba ya xc'opojat yo'tic, yan banti ya xtal te scolel te judiohetic, pero te ha'at soc te mach'atic ay yu'un te atat ya me xlajex. Ha wan scuentahil te ochematix ta ajwalil-ants ta hich ora, xchi.

¹⁵Te Ester hich la sutbe sc'op te Mardoqueo:

¹⁶Bahan, tsoba spisil te judiohetic ayic ta Susa, coma awe'elic ta jcuenta. Ma me xwe' x'uch'ex oxeb c'ahc'al soc oxeb ahc'abal. Ha nix hichon soc te ach'ixetic cu'un ya jcom jwe'elcotic. Patil ya x'ochon bahel ta yilel te ajwalil, aunque ma hichuc ya yal te ley. Teme ya xlajon, lajucon, xchi.

¹⁷Hich te Mardoqueo baht spas spisil bintic halbot yu'un te Ester.