Read Tzeltal Éxodo 12 Bible Online

Éxodo 12 - Tzeltal bible

Éxodo 12

¹Te Jehová la sc'opon te Moisés soc Aarón ta Egipto, hich la yalbe:

²Te u ini ha bayel sc'oblal ya xc'oht awu'unic; ha shahchibal u ya xc'oht yu'un te ha'bile.

³C'opona spisil te pueblo Israel, hich me xawalbe: Ta slajunebal c'ahc'al yu'un te u ini, jujutuhl ya stsac jcoht jcolel tuminchij,[6] ha chican jaytuhl te mach'atic ay yu'un ta sna, jujucoht ta jujun na.

⁴Pero teme mayuc tsobol yajwal te jchahp na te ma xlaj sti'belic te jcolel tuminchij, ya me sjoquinic te spat-xuhc, chican te jaytuhlic ayic ta nahinel tey a. Yac apucticlanic te tuminchij chican te hich yipal ya xlaj sti'belic ta jujutuhl.

⁵Te chambahlam ma me ayuc bin jihnem yu'un soc ha me stat te ay jun ya'bilal. Ya xhu' yac atsaquic tuminchij o tentsun.

⁶Ya me acanantayic ha to c'alal ta schanlajunebal (14) c'ahc'al te u ini, ha yorahil a te spisil te pueblo Israel ya smilic te chambahlam ta stibiltayel q'uinal.

⁷Ya me yich'beyic te sch'ich'el, ya sbonic a te ste'el soc smarcohil te ti'nahil yu'un te na te banti ya sti'ique.

⁸Ha nix yorahil ta ahc'abal a, ya me swe'ic te ti'bal wohbil ta c'ahc' soc ya swe'ic pan te ma ba yich'oj levadura, soc ch'ahal itaj.

⁹Ma me stseheluc o paybiluc yac ati'ic, ha nax wohbil ta c'ahc'; ya me awe'ic scohtol soc sjol, yoc soc bintic ay ta yutil sch'uht.

¹⁰Ma me ayuc xuht'uc ya xhil awu'unic yu'un pajel. Te bin ya xhil yu'un pajel ya me achiq'uic.

¹¹Hich yac awe'ic: achucojix ach'uhtic soc alapojix atepic soc atsacojix anahbate'ic a; ora nax me xawe'ic. Ha te Pascua[7] yu'un Jehová.

¹²Ha nix ta ahc'abal a ya xc'axon ta sq'uinal Egipto soc ya jmil spisil ba-alaletic soc sba-al chambahlametic ta sq'uinal Egipto; soc ya ca'be castigo spisil te diosetic yu'un Egipto. Ho'on Jehovahon.

¹³Te ch'ich' ha seña awu'unic ya xc'oht ta anahic te banti ayexe; te c'alal ya quil te ch'ich' ya xc'axon bahel te banti ayex, ma ba ya stahat te castigo scuenta lajel te c'alal ya quehchentes te sq'uinal Egipto.

¹⁴Te c'ahc'al ini ha sna'ojibal awu'unic ya xc'oht, ya me apasic scuenta q'uin ta stojol Jehová ta cajalcaj ats'umbalic bahel; ha mandaril te ma xlaj sc'oblal.

¹⁵Huqueb c'ahc'al yac awe'ic pan te ma ba yich'oj levadura. Ta sba c'ahc'alil ya me aloq'uesic spisil levadura ta anahic, yu'un mach'ayuc a te ya swe' te bin yich'oj levadura ta sba c'ahc'alil ha to ta shuquebal c'ahc'al ya me yich' loq'uesel ta Israel.

¹⁶Ta sba c'ahc'alil ay me ch'ul tsoblej awu'unic a, soc ha nix hich ta shuquebal c'ahc'al ay me ch'ul tsoblej awu'unic a. Mayuc a'tel ya yich' pasel a, ha nax spasel te we'elil te yac awe'ique.

¹⁷Ya me apasulanic te Q'uin yu'un Pan te ma ba yich'oj levadura, como ha nix sc'ahc'alel a te la jloq'uesex tal apisilic ta Egipto; ha yu'un ta cajalcaj bahel ats'umbalic ya me awich'ic ta muc' te c'ahc'al ini scuenta mandaril te ma xlaj sc'oblal.

¹⁸Ta shahchibal u ya me awe'ic pan te ma ba yich'oj levadura, c'alal ta schanlajunebal (14) c'ahc'al ta stibiltayel q'uinjal ha to ta jun scha'winic (21) c'ahc'al ta stibiltayel q'uinal.

¹⁹Huqueb c'ahc'al ma me ayuc levadura ta anahic. Mach'ayuc a te ya swe' te bin yich'oj levadura, teme jyanlum o teme alumal, ya me yich' loq'uesel ta pueblo yu'un Israel.

²⁰Ma me xawe'ic te bin yich'oj levadura; ta bayuc banti ya xnahinex ya me awe'ic pan te ma ba yich'oj levadura, xchi te Jehová.

²¹Te Moisés la stsob tal spisil te mamaletic yu'un Israel, hich la yalbe: Bahan, tsahahic jcolel tuminchij[8] ta jujun anahic, milahic te tuminchij scuenta pascua.

²²Ich'ahic jtohm hisopo, mulahic ta ch'ich' te ay ta yawil, bonahic a te sjol soc smarcohil te ti'nahil yu'un te anahique. Ma me ayuc mach'a ya xloc' ta anahic ha to c'alal ta sab.

²³Yu'un ya me xc'ax te Jehová ta yehchentesel te egipciohetic. Te c'alal ya yil te ch'ich' ta sjol soc ta smarcohil te ti'nahil ya me sohl bahel ta yahc'olal te ti'nahil, ma ba ya yac' ochel te j'ehchenteswanej ta anahic yu'un ya smilex.

²⁴Ya me apasulanic soc te cajalcaj bahel ats'umbalic scuenta mandaril te ma xlaj sc'oblal.

²⁵Te c'alal ya x'ochex ta q'uinal te yalojix ta jamal te Jehová te ya ya'beyex, ya me apasulanic te q'uine.

²⁶Teme ya sjoc'obeyex te awal-anich'anic: ¿Bin scuentahil awu'unic te q'uin ini? teme xchihique,

²⁷ya me ajaq'uic: Ha te milbil mahtanil yu'un te Pascua yu'un Jehová te sohl bahel ta sba te nahetic yu'un te snich'nab Israel ta Egipto te c'alal la yehchentes te egipciohetic, pero hil yu'un te jnatique, xchi. Hich te pueblo la snijan sbahic soc la yich'ic ta muc' te Diose.

²⁸Patil te snich'nab Israel baht spasic ta ora hich te bin ut'il halbotic ta mandar yu'un Jehová te Moisés soc Aarón.

²⁹Ta ohlil ahc'abal te Jehová la yehchentes scuenta lajel spisil te ba-alaletic ta sq'uinal Egipto, te ba-alal yu'un faraón te hucul ta shuctajib c'alal ta ba-alal yu'un te mach'a ay ta cárcel, soc spisil sba-al chambahlametic.

³⁰Te faraón soc spisil te a'batetic yu'un soc spisil te egipciohetic hahchic ta ahc'abal; chicnaj tulan oq'uel ta Egipto, como ta jujun na ay mach'a cham tey a.

³¹Te faraón la sticon ta iq'uel tal te Moisés soc Aarón ta ahc'abal, hich la yalbe: Loc'anic bahel ta yohlil te jlumal ha'ex soc te snich'nab Israel; bahan ch'uhuntayahic te Jehová, hich te bin ut'il la awalique.

³²Soc ic'ahic bahel te atuminchijic soc awacaxic, hich te bin ut'il la awalique, bahanic ta ora; soc a'bon hilel bendición, xchi.

³³Te egipciohetic la sujic loq'uel te pueblo Israel te yacuc xloq'uic bahel ta ora ta sq'uinalic, yu'un hich la yalic: Ya xchamotcotic ta jpisilcotic, xchihic.

³⁴Te israeletic la yich'ic bahel te wots'bil harina te ma to ba yich'oj levadura, la spotsic ta pac' soc swots'ojibal, la sq'uechic bahel.

³⁵Te snich'nab Israel hich la spasic te bin ut'il pasotic ta mandar yu'un Moisés, la sc'ambeyic bahel te egipciohetic te bintic pasbilic ta oro soc plata, soc c'u'uletic.

³⁶Te Jehová la yac' te lecuc c'ohtic ta stojol te egipciohetic, hich la ya'beyic te bin c'ambotic bahele. Hich te israeletic la spojbeyic loq'uel te biluquetic yu'un te egipciohetique.

³⁷Te snich'nab Israel loq'uic bahel ta Ramsés, bahtic ta Sucot. Ay lajunwinic scha'bahc' ta mil (600,000) winiquetic te ya xbehenic ta yoquic, ma ba ahtaybilic stuquel te alaletique.

³⁸Soc ay bayel ta chahp yantic ants-winiquetic te la sjoquinic bahel, soc bayel tuminchijetic, tentsunetic soc wacaxetic.

³⁹Te wots'bil harina te la yich'ic loq'uel tal ta Egipto la spasic ta pan te ma ba yich'oj levadura. Ma ba yich'oj levadura como te c'alal tenotic loq'uel yu'un te egipciohetic mayuc tiempo yu'unic ta schahpanel te swe'elique.

⁴⁰Te snich'nab Israel ayinic ta Egipto jbahc' soc lajuneb scha'winic (430) ha'bil.

⁴¹Ta mero sc'ahc'alel te ts'acay te jbahc' soc lajuneb scha'winic (430) ha'bil spisil te pueblo yu'un Jehová loq'uic bahel ta sq'uinal Egipto.

⁴²Ha te ahc'abal te q'uelel sit te Jehová yu'un ya sloq'ues tal ta sq'uinal Egipto. Ha te ahc'abal te q'uelel me sitic scuenta yich'el ta muc' Jehová spisil te snich'nab Israel ta cajalcaj te yal-snich'nabique.

⁴³Te Jehová hich la yalbe te Moisés soc te Aarón: Ha te ley ini scuenta te Pascua: Mayuc jtuhluc jyanlum te ya swe'.

⁴⁴Pero spisil te a'batetic te mambilic ya xhu' ya swe'ic stuquelic, teme nahil la awa'be circuncisión.

⁴⁵Te jyanlum o te jle-a'tel ma xhu' ya swe'ic.

⁴⁶Ta junax na ya yich' we'el, ma me xawich'ic loq'uel ta fuera te ti'bal, soc ma me xawac'beyic junuc sbaquel.

⁴⁷Spisil te pueblo Israel ya me spas.

⁴⁸Teme ay jyanlum te sjoquinejex te ya sc'an ya spas te Q'uin Pascua yu'un Jehová, ya me yich' circuncisión spisil te winiquetic, hich ya xhu' ya spas te Q'uin Pascua, como hich ya xc'oht te bin ut'il alumal. Pero te mach'a ma ba yich'oj circuncisión ma xhu' ya swe' stuquel.

⁴⁹Junax mandaril awu'unic soc te jyanlum te nahinem ta awohlilic, xchi.

⁵⁰Hich la spasic spisil te snich'nab Israel te bin ut'il pasotic ta mandar yu'un Jehová te Moisés soc Aarón.

⁵¹Ha nix sc'ahc'alel a te Jehová la sloq'ues tal ta sq'uinal Egipto ta jujuchahp te snich'nab Israel.