Read Tzeltal Éxodo 15 Bible Online

Éxodo 15 - Tzeltal bible

Éxodo 15

¹Ha yu'un te Moisés soc te snich'nab Israel la sc'ayojtayic te Jehová ta c'ayoj ini: Ya jc'ayojtay te Jehová, como ay bayel yutsilal, la sch'ojticlan ochel ta mar cawuhetic soc te mach'atic cajajtic tey a.

²Te Jehová ha quip soc ha c'ayoj cu'un, ha jcolel c'ohemix. Ha te Dios cu'un, ya calbe bayel yutsil sc'oblal; ha te Dios yu'un te jtat, ya calbe muc' sc'oblal.

³Te Jehová ha te mach'a ya yac' guerra; ha Jehová te sbihile.

⁴La sch'oj ochel ta mar te carretahetic soc soldadohetic yu'un faraón. Te tsahbil capitanetic yu'un, mulotic ta Mar Rojo.

⁵Mucotic ta sc'ubulil mar; cohic bahel ta sc'ubulil hich te bin ut'il ton.

⁶Te awa'el-c'ab, Jehová, la yac' ta ilel te smuc'ul yu'el; te awa'el-c'ab, Jehová, la slajin te jcontrahinwanej.

⁷Ta scuenta smuc'ul awu'el la ajin cohel te mach'atic la scontrahinat. La aticon bahel awilimba, ha la slajin ta c'ahc' hich te bin ut'il taquin ha'mal.

⁸C'alal la ahu'xiy, la stsob sba te ha'e, te ha' te behen la stsob sba; te sc'ubulil te ha' tulanub ta yohlil mar.

⁹Te jcontrahinwanej hich la yal: Ya jnuts bahel, ya jtsac; ya jpuc bahel te bintic pojbil, tic' ya xc'ax co'tan a. Ya jloq'ues te espada cu'un, ya jlajinlan ta jc'ab, xchi.

¹⁰Pero la ahu'xiy ta awic'al, hich mulotic ta mar; hich mulic cohel te bin ut'il plomo ta ha'etic te ay yipique.

¹¹¿Mach'a ya spajat, Jehová, ta yohlil te diosetic? ¿Mach'a ya spajat, te c'ax bayel awutsilal te ch'ul Diosat, te xiweltic sba te yutsil awa'tel, te yac apas jchahp a'teliletic?

¹²La ahach awa'el-c'ab, te lumq'uinal la sbic'ticlan cohel.

¹³Ta scuenta sc'uxul awo'tan la awic' bahel te pueblo te la acoltay ta libre. Ta scuenta awu'el la awic' bahel ta ch'ul lugar awu'un.

¹⁴Ya me ya'iyic te pueblohetic, ya xnihquic yu'un; ya x'u'untayot yu'un sc'uxul xiwel te filisteohetique.

¹⁵Ha yu'un te jtsobawetic yu'un Edom bayel ya xc'opoj yo'tanic yu'un; te mach'atic ay yipic ta Moab ya xhahchic ta nihquel, ya xlaj yip yo'tanic spisil mach'atic nahinemic ta Canaán;

¹⁶ya xc'oht nihquel soc xiwel ta stojolic. Ta stojol te smuc'ul yip ac'ab ya x'uma'ubic hich te bin ut'il ton, ha to c'alal c'axemix bahel a te pueblo awu'un, Jehová, ha to c'alal c'axemix bahel a te pueblo te la acoltay ta libre.

¹⁷Ha'at yac awic' ochel soc yac ats'un ta wits awu'un te awich'oj hilel, ta lugar banti ya xnahinat te chahpambil awu'un, Jehová, ha te ch'ul awilal te yich'oj yip yu'un ac'ab, Jehová.

¹⁸¡Te Jehová ya me ya'iy pasaw ta mandar ta spisil ora soc ta sbahtel q'uinal! xchihic ta c'ayoj.

¹⁹C'alal ochic ta mar te carretahetic yu'un faraón soc te cawuhetic soc te mach'atic cajajtic tey a, te Jehová la yac' suhtuc tal ta sbahic te ya'lel te mar; yan te snich'nab Israel taquin slumil a c'axic bahel ta yohlil mar.

²⁰Hich te jalwanej María, te swix te Aarón, la stsac pandero, soc spisil te antsetic la st'unic bahel soc panderohetic soc hahchic ta ahc'ot.

²¹Hich la yal ta c'ayoj te María: C'ayojtayahic te Jehová, yu'un ay bayel yutsilal; la sch'oj ochel ta mar te cawu soc mach'a cajal tey a, xchi ta c'ayoj.

²²Te Moisés la yic' loq'uel bahel ta Mar Rojo te Israel, bahtic ta jochol taquin q'uinal Shur. Behenic bahel oxeb c'ahc'al, ma ba la stahic ha'.

²³C'ohtic ta Mara, pero ma ba hu' la yuch'ic te ha' tey a, yu'un ch'a. Ha scuentahil te Mara[10] c'oht sbihil yu'unique.

²⁴Te pueblo hahch stijic ta c'op te Moisés, hich la yalbeyic: ¿Bin ya cuch'tiquix a? la yutic.

²⁵Ha yu'un te Moisés la yawtay te Jehová, hich a'bot yil jtehc' te' yu'un; la sch'oj ochel ta ha', hich chi'ub te ha'e. Te Jehová tey la ya'be mandaril soc tey la ya'iybe yo'tanic a,

²⁶hich la yal: Teme yac awa'iybe ta lec te sc'op Jehová te Dios awu'unic, teme yac apas te bin toj ta pasel ta stojol, teme yac awich' ta cuenta te mandariletic yu'un soc teme yac ach'uhun spasel spisil te chahpambil mandariletic yu'une, ma ba ya ca'bat junuc te chamel te la jca'be te egipciohetic, como ho'on Jehovahon te jpoxtaywanejon awu'unic, xchi.

²⁷C'ohtic ta Elim ta banti ay lahchayeb (12) sloq'uib-ha' soc lajuneb schanwinic (70) ta tehc' xahnetic; tey c'oht spas scampamentohic a ta sti'il te ha'etique.