Read Tzeltal Éxodo 2 Bible Online

Éxodo 2 - Tzeltal bible

Éxodo 2

¹Ay jtuhl winic te ha sts'umbal Leví la yic' yihnamin jtuhl ants te ha nix sts'umbal Leví.

²La yic' yal, ayin tut querem yu'un. C'alal la yil te buen t'ujbil te alale, la snac' oxeb u.

³Pero ta scaj te ma ba hu'ix ta naq'uel, la stsac jun moch pasbil ta jalal, la spac' ta chapapote soc xuch', tey la yotses a te alale, soc la yotses ta yohlil jalaliltic te ay ta ti' muc'ul-ha'.

⁴Te swix namal la stehc'an sba ta yilel bin ya xpasbot.

⁵Te yantsil-nich'an faraón co bahel ta atimal ta muc'ul-ha'. Te ach'ixetic joquimbil bahel yu'une behenic ta sti'il te ha'e. La yil te moch ay ta yohlil te jalaliltic, la sticon bahel jtuhl scriada ta stsaquel loq'uel tal.

⁶Te c'alal la sjam te moch, la yil te tut querem yac ta oq'uel. La sna'be yo'bolil sba, hich la yal: Ha yu'un te hebreohetic te tut alal ini, xchi.

⁷Hich te swix te alal la yalbe te yantsil-nich'an faraón: ¿Ya bal quic'bat tal jtuhl jcanan-alal hebrea-ants yu'un ya schu'untesbat te alal ini? xchi.

⁸Bahan, xchi te yantsil-nich'an faraón. Ha yu'un te ach'ix baht yic'be tal snan te alale.

⁹Te yantsil-nich'an faraón hich la yalbe: Ic'a bahel te alal ini, chu'untesbon; ho'on ya jtojat, xchi. Hich te ants la yic' bahel te alale, la ya'be schu'.

¹⁰C'alal muc'ub te alale, baht ya'be te yantsil-nich'an faraón; hich c'oht ta yo'tan te bin ut'il mero yal; la ya'be sbihilin Moisés,[1] yu'un hich la yal: Yu'un la jloq'ues tal ta ha', xchi.

¹¹C'alal muq'uix a te Moisés, ay jun c'ahc'al baht yil te yermanotac. La yil te ayic ta tulan a'tel; soc la yil jtuhl egipcio-winic te yac ta smajel jtuhl hebreo-winic te ha jun sts'umbal soque.

¹²Ha yu'un hahch yilticlan ta spisil sjoyobal, te bin ut'il mayuc mach'a chican la yile, la smil te egipcio-winic, la smuc hilel ta hi'ileltic.

¹³Ta yan c'ahc'al cha'loc' bahel, la yil cheb hebreohetic yac smajbel sbahic. La sjoc'obe te mach'a yac ta majaw: ¿Bin yu'un yac amaj aba soc alumal? xchi.

¹⁴La sjac': ¿Mach'a la ya'bat awa'tel ta ajwalil soc ta juez ta jtojolcotic? ¿Yu'un bal yac anop te yac amilon hich te bin ut'il la amil te egipcio-winic? xchi. Ha yu'un te Moisés xiw yo'tan yu'un, hich la yal: Chicnajemix te bin la jpas, xchi.

¹⁵Te c'alal hich la ya'iy te faraón, la sc'an la smil te Moisés. Pero te Moisés loc' ta ahnel ta stojol faraón, baht ta nahinel ta sq'uinal Madián; la shuhcan sba ta ti' pozo.

¹⁶Te sacerdote yu'un Madián ay huctuhl yantsil-nich'nab, tal sloq'uesic ha' yu'un ya snojesic te yawil ha', ya yac'ticlambe yuch'ic ha' te tuminchijetic yu'un te statique.

¹⁷Pero talic yan jcanan-tuminchijetic, la stenic loq'uel tey a. La stehc'an sba te Moisés, la scoltay te ach'ixetic, soc la ya'be yuch' ha' te stuminchijique.

¹⁸C'alal suhtic bahel ta banti ay te static Reuel, hich joc'obotic yu'un: ¿Bin yu'un ora nax suhtex tal? xchi.

¹⁹Yu'un ay jtuhl egipcio-winic la scoltayotcotic loq'uel ta sc'ab te jcanan-tuminchijetic; soc la slicbotcotic loq'uel ha', la ya'be yuch' te tuminchijetic, xchihic.

²⁰Ha yu'un te Reuel la sjoc'obe te yantsil-nich'nab: ¿Banti ay? ¿Bin yu'un la awihquitayic hilel te winique? Ic'ahic tal ta we'el, xchi.

²¹Te Moisés la sch'uhun iq'uel tal ta nahinel ta sna te winique. Ha la ya'be yihnamin te Séfora te yantsil-nich'an.

²²Te antse ayin stut querem-al; te Moisés la ya'be sbihil Gersón,[2] como la yal: Jbehyomal ayon ta yan q'uinal, xchi.

²³Bayel c'ahc'al ta patil cham te ajwalil yu'un Egipto. Te snich'nab Israel yaquic ta ahcan yu'un swocolic ta mosohil, tulan awonic yu'un; c'oht ta stojol Dios te yahcanic yu'un te swocolic ta mosohil.

²⁴A'iybot yu'un Dios te yahcanic, soc la sna' xan te c'op schapoj soc Abraham, Isaac soc Jacob.

²⁵Ilotic yu'un Dios te snich'nab Israel, soc la sna'be yo'bolil sbahic.