Read Tzeltal Éxodo 24 Bible Online

Éxodo 24 - Tzeltal bible

Éxodo 24

¹Te Jehová hich la yalbe te Moisés: Mohan tal ta stojol Jehová soc te Aarón, Nadab, Abiú, soc lajuneb schanwinic (70) mamaletic yu'un Israel; soc namal to ayex a yac ach'uhuntayic.

²Ha nax te Moisés ya xnohpoj tal ta stojol Jehová; te yantic ma me xnohpojic tal stuquelic soc ma me sjoquinic mohel tal te pueblo, xchi.

³Te Moisés tal yalbe te pueblo spisil te bin la yal te Jehová soc spisil te mandariletic. Ta spisil te pueblo junax la sjaq'uic: Ya jpascotic spisil te bin yalojix te Jehová, xchihic.

⁴Te Moisés la sts'ihbay spisil te bin la yal te Jehová. C'alal hahch ta sab, la spas scajtajib smahtan Dios ta ye'tal wits soc la stehc'an lahchayeb bahlal tonetic hich te bin ut'il te lahchaychahp sts'umbal Israel.

⁵La sticon bahel jcolel-winiquetic yu'un te snich'nab Israel te la yaq'uic scohtol chic'bil mahtaniletic soc la yaq'uic jcolel torohetic scuenta mahtaniletic yu'un lamal q'uinal ta stojol Jehová.

⁶Te Moisés la yac' j'ohlil te sch'ich'el ta muc'ul tazahetic, j'ohlil la stsihtsin ta scajtajib ta chiq'uel mahtanil.

⁷Patil la stsac te libro yu'un te chapbil-c'op, la yilbe ya'iy te pueblo; hich la yalic yu'un: Ya jpascotic spisil te bin yalojix te Jehová, ya jch'uhuncotic spasel, xchihic.

⁸Ha yu'un te Moisés la stsac te ch'ich', la stsihtsin a te pueblo, hich la yal: Ha ini ha te ch'ich' yu'un te chapbil-c'op te la spasbeyex Jehová scuenta spisil te c'opetic ini, xchi.

⁹Hich te Moisés mo bahel soc Aarón, Nadab, Abiú soc lajuneb schanwinic (70) ta tuhl mamaletic yu'un Israel;

¹⁰la yilic te Dios yu'un Israel. Ta ye'tal yoc sjel ta limbil zafiro-ton, hich yilel te bin ut'il ch'ulchan c'alal buen q'uepel.

¹¹Pero ma ba la shach sc'ab ta scontrahinel te príncipaletic yu'un te snich'nab Israel; la yilic te Diose, soc we' uch'ic.

¹²Te Jehová hich la yalbe te Moisés: Mohan tal ta jtojol ta wits, tey yac amahliy a, ya ca'bat pehchel tonetic te banti ts'ihbabil cu'un te ley soc te mandariletic scuenta sp'ijubteselic, xchi.

¹³Hich hahch bahel te Moisés soc Josué te ya'bat; te Moisés mo bahel ta wits yu'un Dios.

¹⁴Hich la yalbe te mamaletic: Mahliyawotcotic li'i ha to teme suhtotcotic talel. Ha ya sjoquinex te Aarón soc Hur; teme ay mach'a ay c'op yu'un, ac'a bahtuc ta stojolic, xchi.

¹⁵Hich mo bahel ta wits te Moisés; potsot ta tocal te wits,

¹⁶soc te yutsilal te Jehová hul ta sba te wits Sinaí, waqueb c'ahc'al potsol ta tocal te witse. Ta shuquebal c'ahc'al Dios la sc'opon te Moisés ta yohlil te tocale.

¹⁷Te yutsilal Jehová hich yilel la yilic te snich'nab Israel te bin ut'il jlajinwanej c'ahc' ta ba wits.

¹⁸Te Moisés och bahel ta yohlil te tocal soc mo xan bahel ta wits. Tey halaj a te Moisés cha'winic (40) c'ahc'al soc cha'winic ahc'abal.