Read Tzeltal Éxodo 27 Bible Online

Éxodo 27 - Tzeltal bible

Éxodo 27

¹Ya me apas scajtajib ta chiq'uel mahtanil ta acacia-te', ho'eb xuhc'ubil[41] snahtil soc ho'eb xuhc'ubil sjamalil, pajal sp'isol te jujun xuhc, soc oxeb xuhc'ubil[42] te stoyolile.

²Pasbeya chaneb xulub ta schanebal xuhc; junax ya yich' pasel soc te scajtajib ta chiq'uel mahtanil, soc ya me apots ta bronce.

³Pasbeya yawil tan banti ya yich' stsobel, soc palahetic, muc'ul tazahetic, trinchehetic, soc yawil ac'al; ya me apas ta bronce spisil te bintic ya xtuhun yu'une.

⁴Pasbeya bin jalbil ta bronce; soc pasbeya sch'ocowil ta bronce ta schanebal xuhc.

⁵Tey me yac awac' ta ye'tal te lehchel scajtajib ta chiq'uel mahtanil, scuenta yu'un ohlil ya xc'oht yu'un te stoyolil.

⁶Pasbeya ta acacia-te' te sq'uechojibal soc ya me apots ta bronce.

⁷Te sq'uechojibal ya sohl ta sch'ocowil, hich ay sq'uechojibal ta jujujehch te c'alal ya yich' q'uechel bahele.

⁸Te scajtajib ta chiq'uel mahtanil ya me apas ta tabla, soc jochol ta yutil. Hich me yac apas te bin ut'il a'botat awil ta wits.

⁹Ha nix hich ya me apasbe yamaq'uil te Nahilpac' Templo. Ta stojol sur ya me yich' maquel bahel ta jalbil lino, ho'winic (100) xuhc'ubil[43] snahtil te jlehbe.

¹⁰Te jtahb yoyal soc te jtahb scajtajib ya me yich' pasel ta bronce, te sganchohil soc te sc'atal-te'el ya yich'ic pasel ta plata.

¹¹Ha nix hich ta stojol norte ho'winic (100) xuhc'ubil snahtil te paq'ue, soc jtahb yoyal soc jtahb scajtajib pasbilic ta bronce. Te sganchohil soc sc'atal-te'el pasbilic ta plata.

¹²Te sjamalil te amac' ta stojol smahlib c'ahc'al, ha lajuneb yoxwinic (50) xuhc'ubil[44] te paq'ue, soc lajuneb yoyal soc lajuneb scajtajib.

¹³Te sjamalil te amac' ta stojol banti ya xloc' tal c'ahc'al, ha lajuneb yoxwinic (50) xuhc'ubil.

¹⁴Te pac' ta jehch yu'un te yochibal, ho'lajuneb (15) xuhc'ubil,[45] soc oxeb yoyal soc oxeb scajtajib.

¹⁵Ta yan jehch, lajuneb yoxwinic (50) xuhc'ubil, soc oxeb yoyal soc oxeb scajtajib.

¹⁶Te yochibal te amac' jtahb xuhc'ubil[46] te pac' pasbil ta yax, chi'in-yax soc tsajal estambre soc ts'otbil lino, ha ya'tel te mach'a ya sna' sts'isel. Ay chaneb yoyal soc chaneb scajtajib.

¹⁷Spisil te yoyal ta sjoyobal te amac' ya yich' sch'ocowil ta plata. Te sganchohil pasbilic ta plata soc te scajtajib pasbilic ta bronce.

¹⁸Te snahtil te amac' ho'winic (100) xuhc'ubil, te sjamalil lajuneb yoxwinic (50) xuhc'ubil, soc ho'eb xuhc'ubil stoyolil; te paq'uetic yu'un pasbilic ta ts'otbil lino, soc te scajtajibic pasbilic ta bronce.

¹⁹Spisil te bintic ya xtuhun ta Nahilpac' Templo, ha chican banti ya xtuhunic, soc spisil te ts'apbil yich'o-ip yu'un te nahilpac', soc spisil te ts'apbil yich'o-ip yu'un te amac', ya me yich' pasel ta bronce.

²⁰Pasa ta mandar te snich'nab Israel te ya yich'ic tal lequil aceite yu'un p'ebil olivahetic yu'un ya yich' tsunel, scuenta yu'un spisil ora ya xtihl te c'ahq'ue.

²¹Tey ta Nahilpac' Templo yu'un tahojibal, ta spat te tsalul pac' te ay ta stojol te Testigo-c'op, te Aarón soc te snich'nab ya me scuentahinic schahpanel te c'ahc' ta stojol Jehová ta xtibiltay c'alal ta sab. Ha mandaril te ma xlaj sc'oblal yu'un jujucaj sts'umbal te snich'nab Israel.