Read Tzeltal Éxodo 28 Bible Online

Éxodo 28 - Tzeltal bible

Éxodo 28

¹Ac'a taluc ta atojol te abanquil Aarón soc snich'nab scuenta yu'un ha sacerdotehetic ya xc'ohtic cu'un ta yohlil te snich'nab Israel; te Aarón soc snich'nab, ha te Nadab, Abiú, Eleazar soc Itamar.

²Ya me apasbe ch'ul c'u'uletic yu'un te abanquil Aarón scuenta yutsil soc yich'el ta muc'.

³Halbeya spisil te mach'atic ay sp'ijil yo'tanic, ha te mach'atic la jca'beyix sp'ijil yo'tanic, te ya me spasbeyic c'u'uletic yu'un Aarón te hich parte ya x'ac'ot scuenta sacerdote cu'un ya xc'oht.

⁴Te c'u'uletic ya spasic, ha te bolsa pac' ya xc'oht ta stahn, te efod, nahtil-c'u'ul, muc'ul c'u'ul te ch'albil ta ts'isel, spixjol pac', soc te schuhquil sch'uhte. Ya me spasic te ch'ul c'u'uletic yu'un te abanquil Aarón soc te snich'nab scuenta yu'un ha me sacerdotehetic ya xc'ohtic cu'un.

⁵Ya me stuhunic oro, soc yax, chi'in-yax soc tsajal estambre, soc ts'otbil lino.

⁶Ya me spasic te efod[47] ta oro, yax, chi'in-yax soc tsajal estambre, soc lequil ts'otbil lino, buen ch'albil ta ts'isel.

⁷Ay cheb snehquel te ya stsac sba soc schebal sti'il, hich ya stsac sba a.

⁸Te schuhquil sch'uht te t'ujbil jalbil te ya xchuc a te efod, junax ya yich' pasel soc; ya yich' pasel ta oro, ta yax, chi'in-yax soc tsajal estambre, soc ts'otbil lino.

⁹Ich'a cheb sacliplip tonetic soc ts'ihbabeya ochel tey a te sbihilic te snich'nab Israel;

¹⁰waqueb bihilil ta jujup'ij ton, xmelmon ya yich' ts'ihbayel hich bin ut'il ayinic.

¹¹Ya me ats'ihbabe ochel sbihilic te snich'nab Israel ta schebal tonetic hich te bin ut'il ya spas te mach'a ya'telinej spasel sello; pasbeya yawil te tonetic ta oro.

¹²Ya me awac' te cheb tonetic ta snehquelic te efod scuenta sna'ojibal tonetic yu'un te snich'nab Israel. Te Aarón ya yich'be sbihilic ta schebal snehquel ta stojol Jehová scuenta sna'ojibal.

¹³Pasbeya yawil te tonetic ta oro,

¹⁴soc cheb ts'otbil cadena ta puro oro. Ya me achuc te cadenahetic ta yawil tonetic.

¹⁵Ya me apas te bolsa pac' ya xc'oht ta stahn scuenta schahpanel c'op, buen ch'albil ta ts'isel; hich nix xapas te bin ut'il te efod: ha ta oro, soc ta yax, chi'in-yax soc tsajal estambre, soc ts'otbil lino.

¹⁶Pajal ta schanxuhcul schiquin soc puxbil ta ohlil, jtahn c'abal[48] snahtil soc jtahn c'abal sjamalil.

¹⁷Ya me awac'ticlan chanchohl t'ujbil tonetic tey a; ta sba cholol: rubí, c'anch'abch'ab ta tsaj, soc granate;

¹⁸ta scha'chohlol: yaxal-ton, yaxts'ajts'aj, soc diamante;

¹⁹ta yoxchohlol: c'anch'abch'ab ta tsaj, xlup'lon ta c'an, soc xlup'lon ta sac;

²⁰ta schanchohlol: yaxcancan, sacliplip, soc sts'aylajan-ton.[49] Spisilic ipajemic ta yawil pasbil ta oro.

²¹Ay lahchayp'ij tonetic hich te bin ut'il ay sbihilic te snich'nab Israel; ya yich' ts'ihbayel ochel tey a hich te bin ut'il sellohetic te sbihil te lahchaychahp, ha jchahp sbihil ta jujup'ij.

²²Ta bolsa pac' ya xc'oht ta stahn ya me apasbe schuhquil ta puro oro te ts'otbil.

²³Soc pasbeya cheb sch'ocowil ta oro, ya me awac' ta jujun xuhc te bolsa pac' ya xc'oht ta stahn.

²⁴Te cha'lihc schuhquil pasbil ta oro ya me awac' ta schebal sch'ocowil ta jujun xuhc,

²⁵soc te sni'il te jujun schuhquil ya me awac' ta jujun yawil ton ay ta snehquel, ya me achuc ta jujun snehquel te efod ta stojol stahn.

²⁶Ya me apas cheb ch'ocowil ta oro te yac awac' ta scha'bunjehchel xuhc ta ahlan yu'un te bolsa pac' ya xc'oht ta stahn, ta sti'il yutil te slac'oj sba soc te efod.

²⁷Soc pasa cheb ch'ocowil ta oro te yac awac' ta ye'tal te cheb snehquel te efod ta stojol te stahn, nopol ta sts'isbenal, ta ahc'ol mohel jtebuc yu'un te schuhquil sch'uht te efod.

²⁸Te ch'ocowiletic yu'un te bolsa pac' ya xc'oht ta stahn ya yich' chuquel ta yaxal schuhquil soc te ch'ocowiletic yu'un te efod, scuenta yu'un te bolsa pac' ya xc'oht ta stahn ya xhil ta sba te schuhquil sch'uht te efod, soc hich ma ba ya yihquitay sba soc.

²⁹Hich te Aarón ya me yich'be ta stahn ta stojol yo'tan te sbihilic te snich'nab Israel ta bolsa pac' ya xc'oht ta stahn yu'un schahpanel c'op te c'alal ya x'och bahel ta ch'ul awilal, scuenta sna'ojibalic ta stojol Jehová spisil ora.

³⁰Ya me awac' te Urim soc Tumim[50] ta yutil te bolsa pac' ya xc'oht ta stahn yu'un schahpanel c'op scuenta yu'un ay ta yo'tan a te Aarón te c'alal ya x'och bahel ta stojol te Jehová. Hich te Aarón spisil ora ay ta yo'tan a te schahpanel c'op yu'un te snich'nab Israel ta stojol Jehová.

³¹Ya me apas te snahtil-c'u' ta ye'tal te efod ta yaxal pac'.

³²Ta yohlil, ta yahc'olal, hotbil ya xhil, soc pacbil ta ts'isel te sti'il hich bin ut'il spretinahul snuc', scuenta yu'un ma ba ya xch'i.

³³Ta sjoyobal sti'il te c'u'ul pasa sloc'omba granadahetic te pasbilic ta yax, chi'in-yax soc tsajal estambre; soc ta yohlilic ta sjoyobal te sti'il ya me awac' tut campanahetic pasbilic ta oro;

³⁴jun tut campana pasbil ta oro soc jun granada, yan tut campana pasbil ta oro soc yan granada, ta spisil sjoyobal te sti'ile.

³⁵Ha ya slap te Aarón c'alal ya spas ya'tel. Ya xchicnaj sc'op te c'alal ya x'och bahel ta ch'ul awilal ta stojol Jehová soc te c'alal ya xloc' tal, hich ma ba ya xcham a.

³⁶Soc ya me apas jun jayal pehchel ta puro oro, ts'ihbaya ochel tey a hich te bin ut'il ya yich' ts'ihbayel ochel sellohetic: CH'ULTESBIL TA STOJOL JEHOVÁ.

³⁷Ya me achuc soc yaxal schuhquil ta spixjol pac'; ha ya xc'oht ta stojol yelaw te spixjol paq'ue.

³⁸Hich ay ta sti'ba te Aarón, ha ya scuch te mulil ya xchicnaj ta scuenta spisil te bintic ch'uhltesbilic te ya yaq'uic te snich'nab Israel ta scuenta ch'ul mahtaniletic yu'unic. Spisil me ora ay ta sti'ba scuenta yu'un lecuc me sc'oblalic ta stojol te Jehová.

³⁹Ya me ajal muc'ul c'u'ul ta lino, soc pasa pixjolal pac' ta lino soc schuhquil ch'uhtul ch'albil ta ts'isel.

⁴⁰Te snich'nab Aarón ya me apasbe smuc'ul-c'u'ic, schuhquil sch'uhtic, soc spixjol paq'uetic scuenta yutsilic soc yich'elic ta muc'.

⁴¹Ha me yac awa'be sc'u'inic te abanquil Aarón soc te snich'nabe. Ya me amalticlambe aceite ta sjolic, ya me awa'be yich' ya'telic, ya me ach'ultes, scuenta yu'un ha sacerdotehetic ya xc'ohtic cu'un.

⁴²Pasbeya scomil wexic ta lino scuenta smahquil sbaq'uetalic; ya xhahch ta sch'uyomba c'alal ta ya'.

⁴³Ha ya slapic te Aarón soc te snich'nab te c'alal ya x'ochic bahel ta Nahilpac' Templo yu'un tahojibal, o te c'alal ya xnohpojic tal ta scajtajib ta chiq'uel mahtanil yu'un ya spas ya'tel ta ch'ul awilal, scuenta yu'un ma ba ya sta smulic te ya xchamic yu'une. Ha mandaril te stalel ya xhil ta stojol soc ta stojol te sts'umbal ta patil bahele.