Read Tzeltal Éxodo 37 Bible Online

Éxodo 37 - Tzeltal bible

Éxodo 37

¹Ha nix hich te Bezaleel la spas te scaxahul te chapbil-c'op ta acacia-te', j'ohlil yoxeb xuhc'ubil[67] snahtil, j'ohlil scheb xuhc'ubil[68] sjamalil soc j'ohlil scheb xuhc'ubil stoyolil.

²La spots ta puro oro ta yutil soc ta spat, soc la spasbe sch'ahlel ta pimil oro ta sjoyobal.

³La spasbe chaneb sch'ocowil ta uhltesbil oro ta schanebal te yoque, cheb ch'ocow ta jehch soc cheb xan ta yan jehch.

⁴Soc la spasbe sq'uechojibal ta acacia-te', la spots ta oro;

⁵la sohltesbe ta ch'ocowetic ta jujujehch te scaxahul te chapbil-c'op yu'un ya yich' q'uechel bahel a.

⁶Soc la spas ta puro oro te yawil stahel perdón, j'ohlil yoxeb xuhc'ubil snahtil soc j'ohlil scheb xuhc'ubil sjamalil.

⁷La spas cheb querubinetic ta oro tembil ta martillo, la yac' ta jujujehch te yawil stahel perdón;

⁸jujun querubín ta jujujehch; junax la spas soc te yawil stahel perdón.

⁹Te querubinetic slich'oj mohel xiq'uic ta yaxintesel te yawil stahel perdón; snuhp'usitayej sbahic, yaquic ta yilel te yawil stahel perdón.

¹⁰La spas te mesa ta acacia-te', cheb xuhc'ubil[69] snahtil, jun xuhc'ubil[70] sjamalil soc j'ohlil scheb xuhc'ubil[71] stoyolil;

¹¹la spots ta puro oro soc la spasbe sch'ahlel ta oro ta sjoyobal.

¹²La ya'be tut tabla ta sjoyobal sti'il te jtahn-c'abal[72] sjamalil, soc la spasbe sch'ahlel ta oro.

¹³La spasbe chaneb sch'ocowil ta uhltesbil oro, la yac'ticlan ta jujuxuhc ta banti ay te schanebal yoc.

¹⁴Te ch'ocowetic ayic ta ye'tal te tabla te banti ya yich' sohltesel te sq'uechojibal te ya yich' q'uechel bahel a te mesahe.

¹⁵La spas ta acacia-te' te sq'uechojibal te ya yich' q'uechel bahel a te mesa, soc la spots ta oro.

¹⁶Soc la spas ta puro oro te bintic ya xtuhun ta sba te mesa, ha te platohetic, cucharahetic, muc'ul tazahetic soc yawil te mahtaniletic ya yich' malele.

¹⁷Soc la spas te scajtajib c'ahc' ta puro oro tembil ta martillo; junax ayic te yoc, ste'el, svasohil, swolnich soc snich.

¹⁸Waqueb sc'ab loq'uem ta ste'el, oxoxeb sc'ab ta jujujehch.

¹⁹Ta jch'ix sc'ab ay oxeb vaso te pajal yilel soc snich almendro, ay swolnich soc snich, soc ta yan sc'ab ay oxeb vaso te pajal yilel soc snich almendro, ay swolnich soc snich; hich ta swaquebal te sc'ab te ya xloc' ta scajtajib c'ahc'.

²⁰Soc ta ste'el te scajtajib c'ahc' ay chaneb vaso te pajal yilel soc snich almendro, soc te swolnich soc snich;

²¹ay swolnich ta ye'tal te cheb sc'ab, soc ay yan swolnich ta ye'tal te cheb xan sc'abe, hich ta hich ta jujuch'ix sc'ab te loq'uemique.

²²Te swolnich soc te sc'abic junax ayic soc te scajtajib c'ahc', tembilic ta martillo ta puro oro.

²³Soc la spas ta puro oro te huqueb yawil c'ahc', te tenazahetic soc te platohetic yu'une.

²⁴Ta jun talento oro[73] la spas te scajtajib c'ahc' soc spisil te bintic ya xtuhun tey a.

²⁵La spas ta acacia-te' te scajtajib ta chiq'uel pom, jun xuhc'ubil[74] snahtil soc jun xuhc'ubil sjamalil, pajal ta schanxuhcul, soc cheb xuhc'ubil stoyolil. Te xulubiletic junax ayic soc.

²⁶La spots ta puro oro te sba, te schanxuhcul soc te xulubiletic yu'une, soc la spasbe sch'ahlel ta oro ta sjoyobal.

²⁷Soc la spas cheb sch'ocowil ta oro ta ye'tal te sch'ahlel ta schebal xuhc ta jujujehch te banti ya xc'ax te sq'uechojibal te ya yich' q'uechel bahel a.

²⁸Soc la spas ta acacia-te' te sq'uechojibal soc la spotsticlan ta oro.

²⁹La spas te ch'ultesbil aceite yu'un ch'ultesel soc te lequil pom te buen sumet yic', hich te bin ut'il ya spas te mach'a ya spas perfume.