Read Tzeltal Éxodo 39 Bible Online

Éxodo 39 - Tzeltal bible

Éxodo 39

¹La sjalic ta yax, chi'in-yax soc tsajal estambre te c'u'uletic yu'un te a'tel ta ch'ul awilal; soc la spasic te ch'ul c'u'uletic yu'un Aarón, hich te bin ut'il halbot yu'un Jehová te Moisés.

²La sjal te efod ta oro, yax, chi'in-yax soc tsajal estambre, soc ta ts'otbil lino.

³La stenic ta martillo te lehchel oro soc la set'ic ta jujulihc te ya yich' jalel soc te yax, chi'in-yax soc tsajal estambre, soc ta ts'otbil lino, ha ya'tel te t'ujbil ta pasele.

⁴La spasbe spac'al snehquel te efod te la ya'be syom sba ta ts'isel ta schebal sti'il.

⁵Te schuhquil sch'uht te efod hich nix pasbil ta oro, ta yax, chi'in-yax soc tsajal estambre, soc ta ts'otbil lino, hich te bin ut'il halbot yu'un Jehová te Moisés.

⁶La swaluyic ónice te la yac'ticlanic ta stut yawil ta oro soc la sts'ihbayic ochel tey a te sbihilic te snich'nab Israel hich te bin ut'il sello.

⁷La yaq'uic ta snehquel te efod, ha tonetic scuenta sna'ojibal yu'un te snich'nab Israel, hich te bin ut'il halbot yu'un Jehová te Moisés.

⁸Buen t'ujbil la spas te bolsa pac' ya xc'oht ta stahn,[89] hich te bin ut'il pasbil te efod, ta oro, ta yax, chi'in-yax soc tsajal estambre, soc ts'otbil lino.

⁹Chanxuhc soc cha'lahm la spas te bolsa pac' ya xc'oht ta stahn, jtahn-c'abal[90] snahtil soc jtahn-c'abal sjamalil scha'lahmal.

¹⁰La yaq'uic chanchohl t'ujbil tonetic tey a. Te sba cholol ay rubí, topacio, soc esmeralda;

¹¹te scha'chohlol ay granate, zafiro, soc diamante;

¹²te yoxchohlol ay c'an jacinto, ágata, soc amatista;

¹³te schanchohlol ay berilo, ónice, soc jaspe.[91] Spisilic ac'otic ta yawilic pasbilic ta oro.

¹⁴Ay lahchayeb tonetic hich te bin ut'il sbihilic te lahchaychahp snich'nab Israel, ta jujun ton ts'ihbabil ochel hich te bin ut'il sello te jujun sbihil te lahchaychahp.

¹⁵Ta bolsa pac' ya xc'oht ta stahn la spasbeyic schuhquil quejomtic pasbil ta puro oro, ts'otbil hich te bin ut'il lazo.

¹⁶Soc la spasbeyic cheb yawil tonetic soc cheb ch'ocowil ta oro, soc la yaq'uic te cheb ch'ocowil ta schebal xuhc te bolsa pac' ya xc'oht ta stahn;

¹⁷la ya'beyic stsac sba te cheb schuhquil pasbil ta oro soc te cheb ch'ocowil ta schebal xuhc te bolsa pac' ya xc'oht ta stahn,

¹⁸soc te yan sni'il te schuhquil la yaq'uic ta schebal yawil tonetic ay ta snehquel te efod ta stojol stahn.

¹⁹La spasic cheb xan ch'ocowil ta oro te la yaq'uic ta schebal xuhc ta ye'tal te bolsa pac' ya xc'oht ta stahn te banti ya sta sba soc te efod.

²⁰La spasic cheb xan ch'ocowil ta oro te la yaq'uic ta cha'jis spac'al snehquel te efod ta ye'tal te banti ts'isbil, ta yahc'olal te schuhquil sch'uht te efod.

²¹Te sch'ocowiletic te bolsa pac' ya xc'oht ta stahn la schuquic ta tut yaxal schuhquil soc te sch'ocowiletic te efod, scuenta yu'un ya xhil ta sba te schuhquil sch'uht te efod, scuenta yu'un ma ba ya snihc sba a te bolsa pac' ya xc'oht ta stahn, hich te bin ut'il halbot yu'un Jehová te Moisés.

²²Soc la spas spisil ta yaxal pac' te snahtil-c'u'ul te efod, ha ya'tel te mach'a ya sna' jalab,

²³hotbil ta yohlil, hich te bin ut'il spretinahul snuc' c'u'ul te mayuc sc'ab,[92] te sti'il te snuc' pacbil ta ts'isel scuenta yu'un ma ba ya xch'i' a.

²⁴La sch'albeyic sti'il yoc te nahtil-c'u'ul ta sloc'omba granada pasbil ta yax, chi'in-yax soc tsajal estambre, soc ta ts'otbil lino.

²⁵Soc la spasic tut campanahetic ta puro oro, la yac'ticlambeyic ta c'ubulc'ub te sloc'omba granadahetic ta sjoyobal sti'il te paq'ue,

²⁶jun campana soc jun granada, hich ta hich ta sjoyobal sti'il te nahtil-c'u'ul te ya xtuhun ta spasel a'tel, hich te bin ut'il halbot yu'un Jehová te Moisés.

²⁷Ha nix hich la spasbeyic ta t'ujbil lino te smuc'ul-c'u' te Aarón soc snich'nab, ha ya'tel mach'a ya sna' jalab;

²⁸la spasic te spohtsil sjol ta t'ujbil lino, te schuhquil ta t'ujbil lino, soc te scomil wexic ta t'ujbil ts'otbil lino;

²⁹soc nix te schuhquil sch'uht pasbil ta t'ujbil ts'otbil lino, ta yax, chi'in-yax soc tsajal estambre, ha ya'tel te mach'a ya sna' sch'ahlel ta ts'isel, hich te bin ut'il halbot yu'un Jehová te Moisés.

³⁰La spasic te ch'ul lehchel taq'uin ta puro oro soc la sts'ihbayic ochel tey a hich te bin ut'il ta sello: CH'ULTESBIL TA STOJOL JEHOVÁ.

³¹La schuquic ta yaxal schuhquil yu'un ya yich' jihpanel ta spohtsil sjol, hich te bin ut'il halbot yu'un Jehová te Moisés.

³²Hich hu' spisil te a'tel yu'un te Nahilpac' Templo, ha te Nahilpac' Templo yu'un tahojibal. Te snich'nab Israel la spasic spisil hich te bin ut'il halbot yu'un Jehová te Moisés.

³³La yich'ic tal te Nahilpac' Templo ta stojol Moisés, ha te nahilpac' soc spisil te bintic ya xtuhun tey a: te ganchohetic, tablahetic, sc'atal-te'eletic, oyetic, soc scajtajib yu'unic;

³⁴te smuhquil pasbil ta snuhculel stat tuminchijetic bombilic ta tsaj, te smuhquil pasbil ta nuhculetic,[93] te tsalul pac';

³⁵te scaxahul te chapbil-c'op soc sq'uechojibal, te yawil stahel perdón;

³⁶te mesa soc spisil te bintic ya xtuhun tey a, soc te pan ac'bil ta stojol Dios;

³⁷te scajtajib c'ahc' pasbil ta puro oro soc te cholol yawilic c'ahc' yu'un, soc spisil te bintic ya xtuhun tey a, te aceite te ya xtuhun yu'un c'ahc' te ya sacubtes q'uinal;

³⁸te scajtajib ta chiq'uel pom pasbil ta oro, te aceite yu'un ch'ultesel, te pom sumet yic', te pac' yu'un yochibal te Nahilpac' Templo;

³⁹te scajtajib ta chiq'uel mahtanil potsbil ta bronce soc te bin jalbil ta bronce, te sq'uechojibal soc spisil te bintic ya xtuhun tey a, te yawil ha' soc scajtajib;

⁴⁰te paq'uetic yu'un te amac', te oyetic yu'un soc scajtajib, te pac' yu'un te yochibal te amac', te lazohetic soc te ts'acticlambil yich'o-ip yu'une; soc spisil te bin ya xtuhun yu'un te a'tel ta Nahilpac' Templo, ha te Nahilpac' Templo yu'un tahojibal;

⁴¹soc te jalbil c'u'uletic te ya xtuhun yu'un te a'tel ta ch'ul awilal, te ch'ul c'u'uletic yu'un te sacerdote Aarón soc te c'u'uletic yu'un te snich'nab scuenta a'tel ta sacerdotehil.

⁴²Te snich'nab Israel la spasic spisil te a'tel hich te bin ut'il halbotic yu'un Jehová te Moisés.

⁴³Te Moisés c'alal la yil spisil te a'tel, te hich la spasic te bin ut'il yaloj ta mandar te Jehová, la yac'ticlambe bendición.