Read Tzeltal Éxodo 40 Bible Online

Éxodo 40 - Tzeltal bible

Éxodo 40

¹Te Jehová la yalbe te Moisés:

²Ta sba c'ahc'alil yu'un te shahchibal u ya me atehc'an te Nahilpac' Templo, ha te Nahilpac' Templo yu'un tahojibal.

³Otsesa tey a te scaxahul Testigo-c'op, ya me amac ta tsalul pac'.

⁴Otsesa te mesa soc chahpana ta lec; otsesa te scajtajib c'ahc' soc chahpanlana te yawil c'ahq'ue.

⁵Ya me awac' ta stojol te scaxahul Testigo-c'op te scajtajib schic'ojibal pom pasbil ta oro, soc ya me ajohc'an te pac' ta yochibal te Nahilpac' Templo.

⁶Ya me awac' te scajtajib ta chiq'uel mahtanil ta stojol te yochibal te Nahilpac' Templo, ha te Nahilpac' Templo yu'un tahojibal.

⁷Patil ya me awac' te yawil ha' ta ohlil yu'un te Nahilpac' Templo yu'un tahojibal soc te scajtajib ta chiq'uel mahtanil, soc ya me anojes ta ha'.

⁸Ya me achahpan te amac' ta sjoyobal soc ya me ajihpan te pac' ta yochibal.

⁹Ya me awich' tal te aceite yu'un ch'ultesel, ya me amal a te Nahilpac' Templo soc spisil te bintic ay tey a; ya me ach'ultes soc spisil te bintic ya xtuhun tey a, hich ch'ultesbil ya xc'oht a.

¹⁰Soc ya me amal a te scajtajib ta chiq'uel mahtanil soc spisil te bintic ya xtuhun tey a, ya me ach'ultes, hich mero ch'ultesbil ya xc'oht a.

¹¹Ha nix hich ya me amal a te yawil ha' soc te scajtajib, ya me ach'ultes.

¹²Ya me awic' tal te Aarón soc snich'nab ta sti'il te Nahilpac' Templo yu'un tahojibal, ya me apocticlan ta ha'.

¹³Soc ya me awa'be slap te ch'ul c'u'uletic te Aarón, ya me amal ta aceite, ya me ach'ultes scuenta yu'un sacerdote cu'un ya xc'oht a.

¹⁴Patil ya me awic'ticlan tal te snich'nab, ya me awac'ticlambe slapic te muc'ul c'u'uletic;

¹⁵ya me amal ta aceite hich te bin ut'il la amal ta aceite te static, scuenta yu'un sacerdotehetic cu'un ya xc'oht a. Te ya yich'ic malel ta aceite hich me ya x'ochic ta sacerdotehil te ma xlaj sc'oblal ta cajalcaj sts'umbalic, xchi.

¹⁶Te Moisés la spas spisil hich te bin ut'il halbot yu'un te Jehová.

¹⁷Ta sba c'ahc'alil yu'un te shahchibal u ta schebal ha'bil la yich' tehc'anel te Nahilpac' Templo.

¹⁸Te Moisés la stehc'an te Nahilpac' Templo, la yac'ticlambe te scajtajib, la stehc'an te tablahetic, la sohlteslambe te sc'atal-te'eletic, soc la stehc'anlan te yoyale.

¹⁹La yac' te pac' ta sba te Nahilpac' Templo soc la slimbe xan smuhquil ta sba, hich te bin ut'il halbot yu'un Jehová te Moisés.

²⁰La stsac te Testigo-c'op[94] soc la yotses ta yutil te scaxahul; la sohlteslan te sq'uechojibal soc la yac' te yawil stahel perdón ta sba.

²¹Patil la yotses te scaxahul te chapbil-c'op ta yutil te Nahilpac' Templo, la st'im te pac', hich la smac a te scaxahul te chapbil-c'op, hich te bin ut'il halbot yu'un Jehová te Moisés.

²²La yotses te mesa ta yutil te Nahilpac' Templo yu'un tahojibal ta stojol norte, ta fuera yu'un te tsahlul paq'ue;

²³tey la scholticlan a te pan ac'bil ta stojol Jehová, hich te bin ut'il halbot yu'un Jehová te Moisés.

²⁴La yotses te scajtajib c'ahc' ta yutil te Nahilpac' Templo yu'un tahojibal, snuhp'usitayej sba soc te mesa, ta stojol sur;

²⁵soc la stsunticlan te c'ahc' ta stojol Jehová, hich te bin ut'il halbot yu'un Jehová te Moisés.

²⁶Soc la yotses te scajtajib ta chiq'uel pom pasbil ta oro ta yutil te Nahilpac' Templo yu'un tahojibal ta stojol te tsalul pac',

²⁷soc tey la schic' a te pom te sumet yic', hich te bin ut'il halbot yu'un Jehová te Moisés.

²⁸La sjohc'ambe spac'al ta yochibal te Nahilpac' Templo.

²⁹La yac' te scajtajib ta chiq'uel mahtanil ta yochibal te Nahilpac' Templo, ha te Nahilpac' Templo yu'un tahojibal, soc tey la yac' a te scohtol chic'bil mahtanil soc te mahtanil harina, hich te bin ut'il halbot yu'un Jehová te Moisés.

³⁰La yac' te yawil ha' ta ohlil yu'un te Nahilpac' Templo yu'un tahojibal soc te scajtajib ta chiq'uel mahtanil, soc la snojes ta ha' scuenta poquel.

³¹Tey ya spoc sc'abic soc yoquic a te Moisés, Aarón soc te snich'nabe.

³²Te c'alal ya x'ochic bahel ta Nahilpac' Templo yu'un tahojibal soc te c'alal ya xnohpojic bahel ta scajtajib ta chiq'uel mahtanil, tey ya spoc sbahic a, hich te bin ut'il halbot yu'un Jehová te Moisés.

³³Ta slajibal, la schahpan te spac'al amac' ta sjoyobal te Nahilpac' Templo soc te scajtajib ta chiq'uel mahtanil, soc la sjohc'ambe spac'al te yochibal te amaq'ue. Hich la shu'tes te a'tel te Moisés.

³⁴Ha yu'un te tocal la smuc te Nahilpac' Templo yu'un tahojibal, te yutsilal Jehová noj yu'un te Nahilpac' Templo.

³⁵Te Moisés ma ba hu' och bahel ta Nahilpac' Templo yu'un tahojibal como hul spuhl sba tey a te tocal, soc noj ta yutsilal te Jehová.

³⁶Ta spisil banti behenic, te c'alal ya xhahch bahel te tocal ta sba te Nahilpac' Templo, hich ya xhahchic ta behel te snich'nab Israel;

³⁷yan teme ma ba ya xhahch te tocale, ma ba ya xhahchic ta behel, ha to teme ya xhahch te tocale.

³⁸Como te tocal yu'un Jehová ay ta sba te Nahilpac' Templo ta c'ahc'alel, soc ta ahc'abal ay c'ahc' ta sba, te chican ta ilel yu'un spisil te snich'nab Israel te jayeb c'ahc'al behenique.