Read Tzeltal Éxodo 5 Bible Online

Éxodo 5 - Tzeltal bible

Éxodo 5

¹Patil te Moisés soc te Aarón ochic bahel ta stojol te faraón, hich la yalbeyic: Hich ya yal te Jehová te Dios yu'un Israel: Ac'a bahel te pueblo cu'un scuenta yu'un ya spasbonic q'uin ta jochol taquin q'uinal, xchihic.

²Pero la sjac' te faraón: ¿Mach'a a te Jehová te ya jch'uhumbe sc'op te ya cac' bahel te Israel? Ma jna'be sba te Jehová yac awale, soc ma ba ya cac' bahel te Israel, xchi.

³Hich la sjaq'uic: Te Dios yu'un te hebreohetic tal stahotcotic; ha yu'un ac'awotcotic bahel te oxeb c'ahc'al ya xbehenotcotic ta jochol taquin q'uinal, ya ca'becotic milbil smahtan te Jehová te Dios cu'uncotic, scuenta yu'un ma ba ya xtal ta jtojolcotic soc jmilawal-chamel o espada, xchihic.

⁴Ha yu'un te ajwalil yu'un Egipto hich la yalbe: Moisés soc Aarón, ¿bin yu'un yac awa'beyic squehchan ya'telic te pueblo? Suhtanic bahel ta awa'telic, la yut.

⁵Soc la yal xan te faraón: Tsobolix te pueblo, te ha'ex yac awa'beyic squehchan te ya'telic, xchi.

⁶Te faraón hich la spas ta mandar ta yorahil nix te jtsobawetic soc te jsujawetic ta a'tel yu'un te pueblo:

⁷Ma xawa'beyiquix ac te pueblo yu'un spasel adobe, hich te bin ut'il yaquex ta ya'beyel c'alal ora; ac'a bahtuquic ta slehel ac stuquelic.

⁸Pero hich nix ts'acal te adobe xawa'beyic spasic te bin ut'il yac spasbelic ta nahil to, ma xawaq'uic pehc'ajuc, como ch'ajic. Ha scuentahil te ya x'awonic: Ya xbaht ca'becotic milbil smahtan te Dios cu'uncotic, te xchihique.

⁹A'beyahic xan ya'telic scuenta yu'un mayuc bin ora jocholic, hich ma ba ya yich'ic ta cuenta te lotil c'opetic, xchi.

¹⁰Hich loq'uic bahel te jtsobawetic soc jsujawetic ta a'tel, la yalbeyic te pueblo: Hich la yal te faraón: Ma ba ya ca'beyexix ac.

¹¹Ha'ex nix ya xbahex ta slehel ac, chican banti yac atahic, pero ma me xpehc'aj te awa'telic, xchihic.

¹²Ha yu'un te israeletic la spuc sbahic ta spahmal sq'uinal Egipto ta slehel c'ajben yu'un sjelol te aque.

¹³Te jtsobawetic tulan la sujic, hich la yalbeyic: Ts'acal me xapasic te awa'telic ta jujun c'ahc'al hich te bin ut'il la apasic te c'alal a'botex te aque, xchihic.

¹⁴Soc la smajic te jsujawetic te ha snich'nab Israel te a'bot ya'telic yu'un te jtsobawetic yu'un faraón, hich la yalbeyic: ¿Bin yu'un ma ba ts'acal la apasic adobe wojey soc te naxe hich te bin ut'il ta nahil to? la yutic.

¹⁵Te jsujawetic te ha snich'nab Israel tal yac' spartehic ta stojol faraón, hich la yalbeyic: ¿Bin yu'un te hich yac apasbe te a'batetic awu'une?

¹⁶Ma x'a'botic ac te a'batetic awu'un, pero ya yalbotic: Pasahic adobe, xchihic te jsujawetic. Soc ya yich'ic majel te a'batetic awu'un, pero ha smul te pueblo awu'une, xchihic.

¹⁷Hich la sjac' te faraón: Ha'ex ch'ajex, melel ch'ajex, ha scuentahil te yac awalic: Conic, ya xbaht ca'becotic milbil smahtan Jehová, te xchihexe.

¹⁸Ha yu'un bahanic ta a'tel. Ma ba ya x'a'botex ac, pero ts'acal me xapasic te adobe, xchi.

¹⁹Te jsujawetic te ha snich'nab Israel la sna'ic te ayix swocolic te c'alal hich halbotic: Ma ba ya xpehc'aj jtebuc te jayeb adobe yac apasic ta jujun c'ahc'al, te xchihique.

²⁰C'alal loq'uic bahel ta stojol faraón, la sta sbahic soc Moisés soc Aarón te yaquic ta mahliyel yu'unic;

²¹hich la yalbeyic: Te Jehová ac'a yilex soc ac'a yich'ex ta c'op, yu'un la awac' bohlobuquix jc'oblalcotic ta stojol faraón soc ta stojol te a'batetic yu'une; soc la awa'beyic espada ta sc'ab yu'un ya smilotcotic a, la yutic.

²²Ha yu'un te Moisés baht sc'opon xan te Jehová, hich la yal: Cajwal, ¿bin yu'un yac awa'be swocolic te pueblo ini? ¿Bin nix yu'un la aticonon tal a?

²³yu'un ha to c'alal tal jc'opon te faraón ta acuenta te hahch yuts'in te pueblo ini, soc te ha'ate ma ba la acoltayix te pueblo awu'un, xchi.