Read Tzeltal Éxodo 6 Bible Online

Éxodo 6 - Tzeltal bible

Éxodo 6

¹Te Jehová la sjac'be sc'op te Moisés: Ya me awil yo'tic bin ya jpasbe te faraón, yu'un ta scuenta yip jc'ab ya me yac'ticlan bahel, ta scuenta yip jc'ab ya me stenticlan loq'uel ta sq'uinal, xchi.

²Te Dios hich la yalbe xan te Moisés: HO'ON JEHOVAHON.[5]

³Hich la jcac' jba ta ilel ta stojol Abraham, Isaac soc Jacob te bin ut'il Dioson te spisil ya xhu' cu'un, pero ma ba la jca'be sna'ic te Jehová te jbihile.

⁴Soc la jchap jc'op soc, ha te ya ca'be sq'uinalin te sq'uinal Canaán, ha te q'uinal banti hich nahinic te bin ut'il jbehyometic.

⁵Soc ca'iybeyejix te yahcanic te snich'nab Israel te ayic ta mosohil yu'un te egipciohetic; soc ay ta co'tan te chapbil-c'op cu'une.

⁶Ha yu'un hich me xawalbe te snich'nab Israel: Ho'on Jehovahon; ya jcoltayex loq'uel ta tulan a'tel ta Egipto; ya caq'uex ta libre yu'un te mosohil, soc ya jloq'uesex ta scuenta yu'el jc'ab soc ta scuenta tulan castigo.

⁷Ya quiq'uex yu'un pueblo cu'un ya xc'ohex, soc ho'on Dioson ya xc'ohon awu'unic. Hich yac ana'ic a te ho'on Jehovahon te Dioson awu'unic te la jcoltayex loq'uel ta tulan a'tel ta Egipto.

⁸Ya cotsesex tey ta q'uinal te la jtoy jc'ab ta yalel ta jamal te ya ca'be te Abraham, Isaac soc Jacob. Ya ca'beyex awu'untayic te q'uinale. Ho'on Jehovahon, xchi.

⁹Te Moisés hich la yalbe te snich'nab Israel, pero ma ba la ya'iybeyic sc'op te Moisés ta scaj te pehc'ajem yo'tanic yu'un te mosohile.

¹⁰Ha yu'un te Jehová hich la yalbe te Moisés:

¹¹Ochan, halbeya te faraón, te ajwalil yu'un Egipto, te ac'a yac' loc'uquic bahel te snich'nab Israel ta sq'uinal, xchi.

¹²Te Moisés la sjac'be sc'op te Jehová: Ma xya'iyboniquix jc'op te snich'nab Israel, ¿ha'uc to bal c'an ya'iybon jc'op a te faraón, te wocoltic ya xloc' te jc'ope? xchi.

¹³Ha yu'un te Jehová la sc'opon te Moisés soc Aarón, la spas ta mandar te ya me yalbeyic te snich'nab Israel soc te faraón, ajwalil yu'un Egipto, te ya me sloq'uesic bahel ta Egipto te snich'nab Israel.

¹⁴Ha ini te tatiletic yu'un te jujuchahp snahic te israeletic: Te snich'nab Rubén te sba-nich'an Israel: ha te Hanoc, Falú, Hezrón soc Carmi. Ha te sts'umbal Rubén.

¹⁵Te snich'nab Simeón: ha te Jemuel, Jamín, Ohad, Jaquín, Zohar soc Saúl, te yal jtuhl cananea-ants. Ha te sts'umbal Simeón.

¹⁶Ha sbihilic ini te snich'nab Leví ta jujuchahp: ha te Gersón, Coat soc Merari. Te Leví cuxaj huclajuneb shucwinic (137) ha'bil.

¹⁷Te snich'nab Gersón: ha te Libni soc Simei ta jujucaj sts'umbal.

¹⁸Te snich'nab Coat: ha te Amram, Izhar, Hebrón soc Uzihel. Te Coat cuxaj oxlajuneb shucwinic (133) ha'bil.

¹⁹Te snich'nab Merari: ha te Mahli soc te Musi. Ha te sts'umbal Leví ta jujucaj.

²⁰Te Amram la yic' yihnamin te Jocabed te yihts'in stat, te la yalatay te Aarón soc Moisés. Te Amram cuxaj huclajuneb shucwinic (137) ha'bil.

²¹Te snich'nab Izhar: ha te Coré, Nefeg soc Zicri.

²²Te snich'nab Uziel: ha te Misael, Elzafán soc Sitri.

²³Te Aarón la yic' yihnamin te Elisabet te yantsil-nich'an Aminadab, te ha swix Naasón, te la yalatay te Nadab, Abiú, Eleazar soc Itamar.

²⁴Te snich'nab Coré: ha te Asir, Elcana soc Abiasaf. Ha te sts'umbalic te corehetic.

²⁵Te Eleazar snich'an Aarón la yic' yihnamin jtuhl yantsil-nich'an Futiel, te la yalatay te Finees. Ha ini te tatiletic yu'un te levitahetic ta jujuchahp sts'umbalic.

²⁶Ha'ic ini te Aarón soc te Moisés te halbotic yu'un Jehová: Loq'uesahic ta Egipto te snich'nab Israel ta jujuchahp, te xchihe.

²⁷Ha'ic te la sc'oponic te faraón, ajwalil yu'un Egipto, yu'un ya sloq'uesic ta Egipto te snich'nab Israel. Ha'ic te Moisés soc te Aarón.

²⁸Te c'alal c'oponot yu'un Jehová te Moisés ta sq'uinal Egipto,

²⁹hich halbot yu'un: Ho'on Jehovahon; halbeya te faraón te ajwalil yu'un Egipto spisil te bin ya calbat, xchi.

³⁰La sjac' te Moisés ta stojol Jehová: Mero wocoltic ya xloc' te jc'ope; ¿bin ut'il c'an ya'iybonix jc'op a te faraón? xchi.