Read Tzeltal Éxodo 8 Bible Online

Éxodo 8 - Tzeltal bible

Éxodo 8

¹Ha yu'un te Jehová la yalbe te Moisés: Ochan ta stojol te faraón, halbeya: Hich la yal te Jehová: Ac'a bahel te pueblo cu'un, yu'un ya xbaht sch'uhuntayonic.

²Teme ma xawac' loq'uel, ya cac' talel xch'uch'etic scuenta castigo ta spahmal te aq'uinale.

³Te muc'ul-ha' ya xnoj ta xch'uch'etic te ya xmohic tal soc ya x'ochic ta ana soc ta banti ya xwayat, ta snahic te a'batetic soc te pueblo awu'un, ta hornohetic soc ta swots'ojibal pan awu'unic.

⁴Te xch'uch'etic ya me swihluntayat soc te pueblo awu'un soc spisil te a'batetic awu'une, xchi.

⁵Soc te Jehová hich la yalbe te Moisés: Halbeya te Aarón: Hacha ac'ab soc anahbate' ta stojol te muc'ul-ha'etic, tut ha'etic, soc te yawil ha'etic, ac'a mohuc tal xch'uch'etic ta spahmal sq'uinal Egipto, xchi.

⁶Ha yu'un te Aarón la shach sc'ab ta stojol te ha'etic ta Egipto, hich mohic tal xch'uch'etic te la snojesic te sq'uinal Egipto.

⁷Pero te j'ilojeletic hich nix la spasic ta scuenta te sc'oblaltesel yu'unic; la yaq'uic tal xch'uch'etic ta sq'uinal Egipto.

⁸Ha yu'un te faraón la sticon ta iq'uel te Moisés soc Aarón, hich la yalbe: C'opona te Jehová te yacuc sloq'ues bahel te xch'uch'etic ta jtojol soc ta stojol te pueblo cu'un, ya cac' loc'uc bahel te pueblo awu'un yu'un ya ya'beyic milbil smahtan te Jehová, xchi.

⁹Te Moisés la yalbe te faraón: Halbon ca'iy te bin ora ya sc'an te ya jc'opombeyex Dios soc te a'batetic soc te pueblo awu'un scuenta yu'un ya xloq'uic bahel te xch'uch'etic ta atojol soc ta anahic, te ha nax ya xhilic ta ha', xchi.

¹⁰Pajel, xchi te faraón. Hich la sjac' te Moisés: Ya xc'oht ta pasel hich te bin ut'il yac awale scuenta yu'un hich yac ana' a te mayuc yan hich te bin ut'il Jehová te Dios cu'uncotique.

¹¹Ya xloq'uic bahel te xch'uch'etic ta atojol soc ta anahic, soc ta stojol te a'batetic soc ta stojol te pueblo awu'une; ha nax ya xhilic ta ha', xchi.

¹²Ha yu'un loq'uic bahel te Moisés soc Aarón ta stojol faraón. Te Moisés la sc'opon Jehová yu'un te xch'uch'etic te sticonej tal ta stojol faraón.

¹³Te Jehová hich la spas te bin ut'il la yal te Moisés; chamic te xch'uch'etic ta nahnatic, ta amaq'uetic soc ta sq'uinalic.

¹⁴La sbusanlanic; tuhub te q'uinale.

¹⁵Pero te faraón, c'alal la yil te mayuquix swocol, la stulanubtesbe yo'tan, ma ba la ya'iybe sc'opic, hich te bin ut'il la yal te Jehová.

¹⁶Ha yu'un te Jehová la yalbe te Moisés: Halbeya te Aarón: Toya anahbate', maja te ts'u'lum scuenta yu'un ya xc'atp'uj ta us ta spahmal sq'uinal Egipto, xchi.

¹⁷Hich la spasic. Te Aarón la shach sc'ab soc snahbate', la smaj te ts'u'lum, c'atp'uj ta uch' te c'ohtic ta stojol ants-winiquetic soc chambahlametic. Spisil te ts'u'lum ta spahmal sq'uinal Egipto c'atp'uj ta uch'.

¹⁸Te j'ilojeletic ya c'an yaq'uic tal uch' ta scuenta te sc'oblaltesel yu'unic, pero ma ba hu' yu'unic. Ay uch' ta stojol ants-winiquetic soc chambahlametic.

¹⁹Ha yu'un te j'ilojeletic hich la yalbeyic te faraón: Ha'ix te yal sc'ab Dios ini, xchihic. Pero te faraón tulanub yo'tan, ma ba la ya'iybe sc'opic, hich te bin ut'il la yal te Jehová.

²⁰Te Jehová la yalbe te Moisés: Hahchan ta sab, tehc'ana aba ta stojol te faraón c'alal ya xbaht ta muc'ul-ha', halbeya: Hich la yal te Jehová: Ac'a loq'uel te pueblo cu'un scuenta yu'un ya xbaht sch'uhuntayonic.

²¹Yu'un teme ma xawac' loq'uel te pueblo cu'une, ya jticon tal bayel ta chahp hahetic ta atojol, ta stojol te a'batetic, te pueblo soc ta nahetic awu'un. Spisil te sna egipciohetic ya xnoj ta hahetic, ha nix hich te lumq'uinal banti ayique.

²²Te bin c'ahc'alil te hich ya xc'oht ta pasel parte ya xc'oht cu'un te sq'uinal Gosén te banti ay te pueblo cu'un, mayuc hahetic tey a, yu'un hich yac ana' a te ho'on Jehovahon te ayon ta yohlil te q'uinale.

²³Ya cac' te parte ya xhil te pueblo cu'un soc parte ya xhil te pueblo awu'une. Pajel ya xc'oht ta pasel te seña ini, xchi.

²⁴Hich la spas te Jehová; tal bayel ta chahp hahetic ta sna faraón, ta sna te a'batetic yu'un, soc ta spahmal sq'uinal Egipto; jihn te q'uinal yu'un.

²⁵Ha yu'un te faraón la yic' tal te Moisés soc Aarón, hich la yalbe: Bahan, a'beyahic milbil smahtan te Dios awu'unic li' nix ta q'uinali, xchi.

²⁶La sjac' te Moisés: Ma hichuc ya jpascotic, yu'un te milbil mahtaniletic ya ca'becotic Jehová te Dios cu'uncotic ihlaybil yu'un te egipciohetique. Teme ya cac'cotic te bintic ihlaybil yu'un te egipciohetic, ¿ma bal yacuc sch'ojotcotic ta ton yu'un?

²⁷Ya xbehenotcotic bahel oxeb c'ahc'al ta jochol taq'uin q'uinal, tey ya ca'becotic milbil smahtan a te Jehová te Dios cu'uncotic, hich te bin ut'il ya yalbotcotique, xchi.

²⁸La yal te faraón: Ya caq'uex bahel yu'un yac awa'beyic milbil smahtan te Jehová te Dios awu'unic ta jochol taquin q'uinal, pero ma ba c'ax namaluc ya xbahex. C'opombonic me Dios, xchi.

²⁹La sjac' te Moisés: Te c'alal ya xloc'on bahel ta atojol ya jc'ambe Jehová te pajel ya xloq'uic bahel te ipal hahetic ta atojol soc ta stojol te a'batetic soc te pueblo awu'un. Pero ma me slo'loyotcotic xan te faraón te ma ba ya yac' bahel te pueblo ta ya'beyel milbil smahtan te Jehová, xchi.

³⁰Ha yu'un te Moisés loc' bahel ta stojol faraón, la sc'opon te Jehová.

³¹Te Jehová la spas te bin c'ambot yu'un te Moisés, la sloq'ues bahel spisil te hahetic ta stojol faraón, ta stojol te a'batetic yu'un soc te pueblo yu'un, ni jcohtuc hil.

³²Pero te faraón tulanup yo'tan yan buelta, ma ba la yac' loq'uel te pueblo.