Read Tzeltal Job 12 Bible Online

Job 12 - Tzeltal bible

Job 12

¹La sjac' te Job, hich la yal:

²Melel ha'ex te pueblohex, te c'alal ya xchamex ya xlaj te p'ijil-o'tanil.

³Pero ha nix hichon ay sp'ijil co'tan, ma ba peq'uel ayon awu'unic. ¿Mach'a ma ba sna'oj spisil ini?

⁴Ya stse'layon te camigotac; ho'on te ya jc'opon Dios soc ya sjac'bon, te toj co'tan soc lecon ta winiquil, ya quich' labanel.

⁵Te mach'a seguro ay, ya yihlay te wocole, ya yihlaybe swocol te mach'a ya xbilts'uj yoc.

⁶Lec ay snahic te j'eleq'uetic, jun yo'tan cuxajtic te mach'atic ya shachbe yilimba te Diose; te ha a'botic yu'un te jayeb bintic ay yu'unic. [6]

⁷Joc'obeya te chambahlametic, ha'ic me ya xp'ijubtesex, joc'obeya te mutetic te ya xwihlic ta toyol, ha'ic me ya ya'beyex ana'ic;

⁸o c'opona te lumq'uinal, ha me ya sp'ijubtesex, soc te chayetic ta mar, ha nix hich ya yalbeyex.

⁹¿Bintic ta spisilic a ini te ma sna'ic te ta sc'ab Jehová la spas ini?

¹⁰Ay ta sc'ab te scuxlejal spisil bintic cuxajtic soc te ic' te cuxulic a spisil te ants-winiquetique.

¹¹¿Ma bal yacuc ya'iy te chiquinil bin ut'il ay te c'opetic, hich te bin ut'il ya ya'iybe sbuhts' we'elil te quetique?

¹²Ay sp'ijil-o'tanil ta yohlil te mamaletic; soc ay snopojibal ta banti ay te mach'a bayel ya'bilal.

¹³Ha yu'un Dios te p'ijil-o'tanil soc te yu'el, ha yu'un te j'ac'-o'tanil soc te bintic ay ta na'el.

¹⁴Te bin ya sjin, mayuc mach'a ya xhu' ya scha'pas xan; teme ya schuc te winique, mayuc mach'a ya xhu' ya xjahm loq'uel.

¹⁵Teme ya scom te ha'ale, spisil ya xtaquij; teme ya sticon te ha'ale, ya sjin te q'uinale.

¹⁶Ha yu'un te yu'el soc p'ijil-o'tanil; ha nix scuentahinej te mach'a lo'loybil soc te jlo'loywanej.

¹⁷Ha ya swahtan te j'ac'-o'taniletic soc ya yac' sohcuc sjolic te juecetique.

¹⁸Ha ya stuch'be te cadenahetic yu'un te ajwaliletic, soc ya schuc ta pac' te sch'uyombahic.

¹⁹Ha ya swahtanlan sacerdotehetic, soc ya sjinticlan te mach'atic ay yipique.

²⁰Ma xyac' ta c'op te j'ac'-o'tanil te ich'bilic ta cuenta, soc ya spojbe sp'ijil te mamaletique.

²¹Ya yac' te mayuc sc'oblal ya xc'oht te mach'a ich'bilic ta muc', soc ya stilbe schuhquil sch'uht te mach'atic ay yipique.

²²Ya yac' ta na'el te sc'ubulil te bintic muquen ay ta ihc' q'uinal, soc ya sloq'ues ta sacal q'uinal te yihc'al q'uinale.

²³Ya smuc'ubteslan te nacionetic soc ya slajinlan; ya spucticlan bahel te nacionetic soc ha nix ya stsobticlan.

²⁴Ha ya spojbe sna'ojibal yu'un te jtsobawetic yu'un te pueblohetic ta q'uinal, ya yac'ticlan ta behel bahel ta jochol taquin q'uinal te banti mayuc behetic,

²⁵ya spicticlanic bahel ta yihc'al q'uinal; ya yac' te ya xbehenic hich te bin ut'il jyacubeletic.