Read Tzeltal Job 14 Bible Online

Job 14 - Tzeltal bible

Job 14

¹Te winic te ayintesbil yu'un ants com nax te scuxlejal soc nojel ta wocol.

²Hich ya xloc' te bin ut'il nichim, pero ya sayub ta ora; ya x'ahn hich te bin ut'il axinal, ma xhalaj.

³¿Ya bal at'ojan asit ta stojol soc ya bal awic' ta chahpanel awu'un?

⁴¿Mach'a ya slecubtes te bin bohloben sc'oblal? ¡Mayuc!

⁵Melel ahtaybil nax te sc'ahc'alel, ha'at la awac' te jayeb yuhil, soc la awa'be sp'isol te ma xhu' ya xc'ax a.

⁶Q'ueja asit ta stojol, a'beya lahmajuc q'uinal ta stojol, ha to c'alal ts'acay te c'ahc'al yu'un hichuc j'a'tel winic.

⁷Teme ay te' ya yich' ts'etel, ya to xpuhlin stuquel, ma ba ya xquehchaj ta puhl.

⁸Aunque ya xyijub ta lum te slohp'e, aunque ya xtaquij te schuman te'el ta lum,

⁹c'alal ya ya'iybe siquil te ha'e, ya xcha'yaxub; ya me yac' xan spuhl hich te bin ut'il uhnen ha'mal.

¹⁰Yan te winique ya xcham, ya laj bahel. Ta slajibal ya sjac' yo'tan, ¿banti wan ay?

¹¹Hich te bin ut'il ya xch'ay bahel te sab te mar, soc hich te bin ut'il ya xtaquij te muc'ul-ha',

¹²hich ya xway te winic, ma ba ya xhahchix tal; te c'alal ay to te ch'ulchan, ma ba ya xwihc' sit, ni ma ba ya xhahch yu'un swayel.

¹³¡Ayuc bin ut'il yac anac'on ta stsobojibal te mach'atic chamenic, te yacuc anac'on ha to c'alal ya xlahmaj te awilimba; te yacuc awahtaybon corahil, patil yacuc ana'on xan!

¹⁴Teme cham te winique, ¿ya to bal xcha'cuxaj xan? Ya jmahliy spisil te c'ahc'aleletic cu'un ha to c'alal ya xtal te colel cu'une.

¹⁵Ta hich ora ya xc'opojat, ho'on ya jac'bat; awo'tanuc yac awil te ya'tel ac'ab.

¹⁶Yac awahtaybon te jujujihm te coque, pero ma ba yac awilbon te jmule;

¹⁷chucul ta costal te bintic chopol jpasoj, macal awu'un te jmule.

¹⁸Hich te bin ut'il ya xlaj ta hemts'ujel te wits, soc ya xjelon yawilic te muc'ul tonetic;

¹⁹hich te bin ut'il ya xch'ulub ton yu'un te ha'e, soc te yip te yacan ha' ya yehan bahel te ts'u'lum, hich yac alajimbe smuc'ul yo'tan te winique.

²⁰Spisil ora yac atsal, hich ya xloc' bahel; yac ayanijtesbe yelaw, yac aticon bahel.

²¹Teme ya x'ich'otic ta muc' te snich'nab, ma ba ya sna' stuquel; teme ya xpehc'anotic, ma ba ya yil stuquel;

²²ha nax ya ya'iybe sc'uxul te sbaq'uetal, ha nax ya yoq'uetay sba stuquel, xchi te Job.