Read Tzeltal Job 17 Bible Online

Job 17 - Tzeltal bible

Job 17

¹Ma ba ya quich'ix ic' ya ca'iy, yaquix ta lajel bahel corahil, yaquix smahliybelon te jmuquenal.

²Ha nax sjoquinejon jlabanwanejetic, te jsit yac yilbel te uts'inel yu'unique.

³Dios cu'un, toja te bin ya sc'an yu'un ya xcolon ta libre. Yu'un ¿mach'a yan te ya sjac' ta jcuenta?

⁴Te mach'atic te li' aye la amacbe ta yo'tanic te snopojibal yu'unic, ha yu'un ma ba yac awac' te ya ya'iyic tsalaw.

⁵¡Te mach'atic ya yac' ta c'abal te yamigotac yu'un ay bin ya x'a'bot a, ya xnayij sitic yu'un te yal-snich'nabic!

⁶Ha la yac'on ta tsahbil c'op yu'un te pueblohetic, hichon ta stojolic te bin ut'il te mach'a ya xtuhbatayot.

⁷Ihc'ubenix jsit yu'un mel-o'tan, snohc'otal xanix te jbaq'uetale.

⁸Te mach'atic lec yo'tanic xcham yo'tanic yu'un, soc te mach'a mayuc smul ya xhahch scontrahin te mach'a chopole.

⁹Pero te mach'a toj yo'tan ya to st'un te be yu'un, soc te mach'a mayuc smul te sc'ab ya me sta xan yip.

¹⁰¡Pero suhtanic tal ta apisilic, mayuc ni jtuhluc ya jta ta awohlilic te ay sp'ijil yo'tan!

¹¹C'axix bahel te c'ahc'aletic cu'un, jihn te bintic chapal cu'un, te bintic ya sc'an co'tan.

¹²La sc'atp'unic ta ahc'abal te c'ahc'alel; ya yalic te yac ta nohpojel tal te sacal q'uinal ta patil yu'un te yihc'al q'uinale.

¹³¿Bin yan ya jmahliy? ha jna te stsobojibal mach'atic chamenic, ya jpas jwayib ta yihc'al q'uinal.

¹⁴Ha'at jtatat, ya cut te jlajinwanej, soc: Ha'at jnanat soc quermanahat, ya cut te yal ha.

¹⁵¿Banti ay hiche te bin yacon ta smahliyel? ¿Mach'a ya yil te bin yacon ta smahliyel?

¹⁶Ha ya xco bahel ta stsobojibal mach'atic chamenic, pajal ya jcux co'tantic ta ts'u'lum, xchi te Job.