Read Tzeltal Job 18 Bible Online

Job 18 - Tzeltal bible

Job 18

¹La sjac' te Bildad te talem ta Súa, hich la yal:

²¿Bin ora ya xquehchajex ta c'op? Nopa awa'iyic, patil ya xc'opojotic.

³¿Bin yu'un te yac acuyotic ta chambahlam, soc te ya acuyotic ta sonso?

⁴Ha'at te yac atuch'ticlan aba yu'un awilimba, ¿jochol bal ya xhil te q'uinal ta acuenta, o ya bal yich' jeltayel ta yawilic te muc'ul tonetique?

⁵Ya me xtup' te sacal q'uinal yu'un te mach'a chopol yo'tan, ma ba ya xtihlix te c'ahc' yu'une.

⁶Ya xtup' te c'ahc' ta snahilpac'; ya xtup' te sc'ahc' ta stojol.

⁷Ya me xlaj yip te sbehele, te bin schapoj, ha nix ya xjihnot yu'un;

⁸yu'un ha nix te yoc te ya yac' x'och ta yaquil, soc ya xbehen ta sba yacojibal;

⁹ya xchucot ta lazo ta yit yoc, tsacbil ya xhil ta yaquil.

¹⁰Nac'bil ta lum te lazo, soc ay yaquil ta be.

¹¹Ta bayuc ya xiwtesot yu'un te xiwele, nutsbil ya ya'iy ta bayuc ya xbehen.

¹²Ya xlaj yip yu'un wi'nal; soc chapal jinel ta sts'ehl.

¹³Ya xwe'bot snuhculel yu'un chamel, ya xlajimbot yoc sc'ab yu'un sba-nich'an lajel.

¹⁴Ya yich' bulel loq'uel ta snahilpac' te ha smuc'ulinej yo'tan, ya x'ic'ot bahel ta stojol te ajwalil yu'un xiwel.

¹⁵Ya xnahinic ta nahilpac' te ma ha'uquix yu'un, ya yich' puhquel asufre ta sba sna.

¹⁶Ya xtaquij te slohp' ta ye'tal, ta ahc'ol ya yich' c'abayel te sc'abe.

¹⁷Te sna'ojibal jc'axel ya xch'ay ta bahlumilal, mayuquix sbihil ya xhil ta q'uinal.

¹⁸Ya yich' ch'ojel loq'uel ta sacal q'uinal, ya xc'oht ta yihc'al q'uinal; ya yich' loq'uesel ta bahlumilal.

¹⁹Mayuc snich'an o smam ya xhil ta slumal, mayuc mach'a ya xhil yu'un ta sna.

²⁰Te mach'atic ayic ta stojol banti ya xmahl c'ahc'al, xcham yo'tanic yu'un te bin c'oht ta stojol, soc bayel xiwel ya xtal ta stojol te mach'atic ayic ta stojol banti ya xloc' tal c'ahc'al.

²¹Melel hich ay te sna te mach'a chopol yo'tan, hich ay yawil te mach'a ma sna'be sba te Diose, xchi te Bildad.