Read Tzeltal Job 19 Bible Online

Job 19 - Tzeltal bible

Job 19

¹La sjac' te Job, hich la yal:

²¿Jayeb to xan ora te yac awa'bonic jwocol, soc te yac atenonic ta c'op?

³Lajunebix buelta la awuts'inonic ta c'op; ¿ma bal yacuc xq'uexawex yu'un te yac atenonic ta c'ope?

⁴Aunque melel te howiyemon, ay ta jcuenta jtuquel te banti howiyemon.

⁵Pero teme ha'ex muc' yac awac' abahic ta jtojol, soc yac awalic te ay jwocol yu'un te ay jmul,

⁶na'ahic te ha Dios te la yuts'inon soc te la spotson ta chojac' yaquil.

⁷Hich ya x'awonon: Ay uts'inel, xchihon, pero mayuc mach'a ya ya'iy; ya x'awonon, pero mayuc mach'a stojil bin ya spasbon.

⁸Dios la smacbon jbe, ma xhu' ya xc'axon; la smuc ta yihc'al q'uinal te behetic cu'un.

⁹La spojbonix te cutsilal, soc la sloq'uesbon te corona ta jol.

¹⁰La sjinon ta bayuc, ya xlajon yu'un; la sbulbon loq'uel te smuc'ul co'tan hich te bin ut'il bulbil te'.

¹¹Tihl yilimba ta jtojol, hich c'ohon yu'un te bin ut'il ha scontra.

¹²La stsob sbahic te soldadohetic yu'un, ya schahpan smohibic soc ya sjoytayic banti nahinemon.

¹³La yac' yihquitayonic te quermanotac, soc te q'uejel bahtic te mach'atic ya jna'ticlambe sba.

¹⁴Te jmohlol jts'ahquil ya yihquitayonic, te camigotac ya sch'ayoniquix ta yo'tanic.

¹⁵Te mach'atic nahinemic ta jna soc te criadahetic cu'un, hich ya yilonic te bin ut'il jyanlum, jbehyemon c'ohon ta sitic.

¹⁶Ya quic' tal te ca'bat pero ma ba ya sjac'bon, aunque ho'on nix ya calbe wocol ta stojol.

¹⁷Te quihnam ya xt'ixbot yo'tan yu'un te quiq'ue, soc ya sp'ajonic te quermanotac.

¹⁸Ha nix hich te queremetic ya yihlayonic; te c'alal ya xhahchon ya scontrac'optayonic.

¹⁹Spisil te mero camigotac ya sp'ajonic, te mach'atic c'ux ta co'tan la sut sba scontrahimbelonic.

²⁰Te jnuhculel soc te jbaquel ya slap' sbahic ta jbaquel, mero wocol xanix te cuxulon.[9]

²¹¡Na'bonic yo'bolil jba, camigotac, na'bonic yo'bolil jba como te Dios la yac' tal sc'ab ta jtojol!

²²¿Bin yu'un te ha'ex yac anutsbelonic, hich te bin ut'il te Diose, te ma ba tic' yac awa'iyic a te yac acontrahinonique?

²³¡Te ayuc ya yich' sts'ihbayel te jc'ope, te yacuc yich' sts'ihbayel ta hun;

²⁴o ta taq'uin soc plomo ya yich' ts'ihbayel ochel ta ton te mayuc bin ora ya xtup'!

²⁵Ya jna' te cuxul te Jcoltaywanej cu'un, te ta slajibal ya stehc'an hahchel sba ta lum,

²⁶soc te c'alal lajemix a te jnuhculel, ta jbaq'uetal ya me quilbe sit te Diose.

²⁷Ho'on nix ya me quil, ta jsit nix ya quil, ma yanuc mach'a a. Pero yo'tic ya xlaj quip ya ca'iy.

²⁸Teme hich yac awalic: ¿Bin ut'il ya jnutstic, como tey nix ta scuenta te hahchem tal te swocole? teme xchihexe,

²⁹¡xi'anic me te espada, como te ilimba ya yac' tal castigo ta espada ta scaj te bintic chopol! ¡Hich yac ana'ic a te ay stojil chahpanel! xchi te Job.