Read Tzeltal Job 20 Bible Online

Job 20 - Tzeltal bible

Job 20

¹La sjac' te Zofar te talem ta Taamat, hich la yal:

²Ya yac' xc'opojon te jpensar, ha yu'un ya jc'an ya jsutbat ta ora.

³La jca'iyix te bin tulan la awalbon te c'ux la jca'iy, te snopojibal cu'un ya yac'on ta sutel te c'ope.

⁴¿Ma bal ana'ojuc te hich ay ta shahchibal to, te c'alal bin ora ac'ot ta bahlumilal te winique,

⁵te com nax te stse'elil yo'tan te mach'a chopol yo'tan, te jts'ihn nax ay yutsil yo'tan te mach'a ma ba sch'uhunej Dios?

⁶Aunque ya xtohy mohel ta ch'ulchan te stoybahil soc te ya sta te tocal te sjole,

⁷hich ya xlaj te bin ut'il ya xlaj te stsa'e, te mach'atic yilojic, hich me ya yalic: ¿Banti baht? xchihic me.

⁸Ya xwihl bahel hich te bin ut'il wayichil, ma ba ya yich' tahel; ya xtup' bahel hich te bin ut'il nahalsitil ta ahc'abal.

⁹Te mach'a la yil, mayuquix bin ora ya yil xan, ma ba ya xna'botix xan yu'un te slumale.

¹⁰Te snich'nab ya sc'ambeyic coltayel te pobrehetic, ha'ic nix ya sutbeyic te bin la yelc'anic.

¹¹Aunque ay to yip sbaq'uetal hich te bin ut'il querem, ha ya xco bahel soc ta ts'u'lum.

¹²Aunque chi' la ya'iy ta ye te bin chopol soc la snac' ta ye'tal yac',

¹³aunque buhts'an la ya'iy, ma ba la yihquitay, pero tey hil ta ye'tal yac' a,

¹⁴ch'a' ya xc'oht te swe'el ta sch'uht, ya xc'atp'uj ta svenenohil ti'awal chan.

¹⁵La sbic' c'ulejalil, pero ya me xehtay; Dios me ya sloq'uesbe ta sch'uht.

¹⁶Ya me schu'un te svenenohil ti'awal chan; ya me xmilot yu'un te yac' te chane.

¹⁷Ma ba ya yil xan te uc'umetic, te muc'ul-ha'etic te banti ya x'oquin leche soc chab.

¹⁸Ya me sut te bintic stahoj ta ya'tel, ma ba ya swe' soc ma ba ya ya'iybe yutsilal te sc'ulejal.

¹⁹Como la yuts'in soc la yihquitay hilel te pobrehetic, la spoj nahetic te ma ha'uc spasoj,

²⁰ha yu'un mayuc lamal q'uinal ya ya'iy ta sch'uht, ma ba ya xcol yu'un te bin xbiq'uet ta yo'tan.

²¹Mayuc bin ma ba la slajin ta we'el, ha yu'un ma xhu' ya xhalaj te yutsil slequil.

²²Aunque ay bayel bin ay yu'un, ya xtal swocol; ya xtal ta uts'inel yu'un spisil mach'atic chopol yo'tanic.

²³Te c'alal ya snojesbe sch'uht, Dios ya sticon yilimba ta stojol, ya yac' te xnilet ya xhul ta stojol hich te bin ut'il ha'al.

²⁴Ya x'ahn ta stojol a'tejibaletic yu'un guerra pasbilic ta taq'uin, ya xlowbot yu'un t'ihmalte' pasbil ta bronce.

²⁵Tamp'as ya sohl ta sbaq'uetal te ya'tejibalul t'ihmalte', te xlipet sni'il ya xloc' ta sch'a. ¡Ya xtahot ta buen xiwel!

²⁶Quechel ya xmucot ta buen yihc'al q'uinal te sc'ulejal; ya xlajinot yu'un c'ahc' te mayuc mach'a la stsun, ha ya slajin te bin hilem ta sna.

²⁷Te ch'ulchan ya yac' chicnajuc te smul, ya xhahch ta contrahinel yu'un te lumq'uinale.

²⁸Ya x'ic'otic bahel te bintic ay ta sna, ya xpucbot bahel ta sc'ahc'alel te yilimba Dios.

²⁹Hich chapal yu'un Dios ta stojol te mach'a chopol, hich ay te bin ya x'a'bot yich' ta scuenta bin ya yal te Diose, xchi te Zofar.