Read Tzeltal Job 24 Bible Online

Job 24 - Tzeltal bible

Job 24

¹¿Bin yu'un ma ba ya slehbe yorahil chahpanel te Mach'a spisil ya xhu' yu'un, soc bin yu'un ma ba ya yilic te yorahil chahpanel te mach'atic ya sna'beyic sba?

²Te mach'atic chopol yo'tanic ya sjeltaybeyic yawil te mojonetic, ya scanantayic chambahlametic te elc'ambil yu'unic.

³Ya spojbe sburro te me'ba' alaletic, soc ya yic'be hilel ta prenda te j'a'tel-wacax yu'un te me'ba' ants.

⁴Ya stenic loq'uel ta be te pobrehetic, soc spisil te pobrehetic ta q'uinal ya sc'an ya snac' sbahic.

⁵Hich te bin ut'il ha'mal burrohetic ta jochol taquin q'uinal, ya xloc' sle swe'elic te pobrehetic. Ta jochol taquin q'uinal ya stahbe swe'el te yal-snich'nabic.

⁶Ya stsobic ac ta q'uinal, soc ya scha'lehbeyic sit te sts'usubil mach'atic chopol yo'tanic.

⁷Mayuc sc'u' spaq'uic a ya xc'ax ahc'abal, mayuc smuhquilic yu'un te sique.

⁸Ya xt'uxic yu'un te ha'al ta witsiltic, ya smech'ic muc'ul tonetic ta scaj te mayuc smuhquilic.

⁹Ya spojbeyic schu' te me'ba' alaletic, ya yic'beyic hilel ta prenda te alaletic yu'un te pobre.

¹⁰Mayuc sc'u' spaq'uic ya xbehenic; scuchojic trigo, pero chameliquix ta wi'nal.

¹¹Ya spits'ic aceite ta spits'ojibal; ya sts'o'ts'o'teq'uic te ts'usub, pero chameliquix yu'un taquinti'il.

¹²C'alal ta yutil pueblo ya x'ahcanajic te mach'atic chameliquix, soc ya x'awonic te mach'atic ehchenajic scuenta lajel, pero ma x'a'iybotic sc'opic yu'un te Diose.

¹³Ha'ic te mach'atic ya stoy sbahic ta stojol te sacal q'uinal, ma ba ya sna'ic soc ma ba ya x'ayinic ta behetic yu'un.

¹⁴Te jmilawal buen sab ya xhahch ta milaw, ya smil te pobre soc te mach'a mayuc bin ay yu'un, soc hich ya xc'oht te bin ut'il j'elec' ta ahc'abal.

¹⁵Te j'antsiwej ya smahliy ya x'ihc'ub q'uinal, hich ya yal: Mayuc mach'a ya yilon, xchi, hich ya snac' te sit yelaw.

¹⁶Ya yochintayic nahetic ta ahc'abal, ya smac sbahic ta c'ahc'alel; ma sna'beyic sba te sacal q'uinale.

¹⁷Te sacubel q'uinal ha spimil yihc'al q'uinal c'ohem yu'unic; ya sna'beyic sba te bin xiweltic sba ta pimil yihc'al q'uinal.

¹⁸Ahnimal ya x'ic'otic bahel ta yoc ha'; bohloben sc'oblal te sq'uinalic, ma ba ya xbahtic ta sts'usubilic.

¹⁹Hich te bin ut'il ya yuhltesic te me'sic te sq'uepelal q'uinal soc te sc'uxul c'ahc'al, hich nix ya xpasbotic te jmulawiletic yu'un te stsobojibal mach'atic chamenic.

²⁰Ya me xch'ay ta o'tanil yu'un te mero snan; ya me xwe'otic ta yal ha, ma ba ya xna'otiquix, ¡hich ya xbuchic te bin ut'il te' te mach'atic chopol yo'tanique!

²¹Ya yuts'inic te ants te ma x'alaj, mayuc bin lec ya spasbeyic te me'ba' antse.

²²Pero Dios ya squil bahel ta scuenta yu'el te mach'atic ay yipique. ¡Te c'alal ya xhahch te Diose, mayuc mach'a ya sna' teme cuxul ya xhile!

²³Dios ya yac' te jun yo'tanic ya x'ayinic, pero q'uelel sit ta yilbeyel te sbehique.

²⁴Toyol ya xc'ohtic jts'ihnuc, pero ya xch'ayic ta q'uinal; ya xpehc'anotic, hich ya xc'ohtic te bin ut'il yantic, ya yich'ic bojel hich te bin ut'il sni'il te trigo.

²⁵Teme ma hichuc, ¿mach'a ya xhu' ya yalbon teme jlote, o te ya slajimbe sc'oblal te jc'ope? xchi te Zofar.