Read Tzeltal Job 27 Bible Online

Job 27 - Tzeltal bible

Job 27

¹La sjac' xan te Job, hich la yal:

²¡Cuxul Dios, te ma ba la sc'an la schahpanon ta stojil, te Mach'a spisil ya xhu' yu'un te la yac' xut'ul q'uinal ya ca'iy,

³te jayeb xan c'ahc'al cuxulon, soc te ay to yic'al Dios ta jni',

⁴ma ba ya xloc' chopol c'op ta que, soc ma ba ya cal te bin ma meleluc!

⁵¡Mayuc bin ora ya cal te melel bin yac awalic! ¡Ha to c'alal ya xchamon ya cal te jun te co'tane!

⁶Ya calulan te toj ayon, ma ba ya jquehchan; ta spisil jcuxlejal ma ba ya yal co'tan te ay jmul.

⁷¡Te jcontra hich ac'a c'ohtuc te bin ut'il mach'a chopol yo'tan, te mach'a ya yuts'inon hich ac'a c'ohtuc te bin ut'il mach'a ma tojuc yo'tan!

⁸¿Binti xan ya smahliy te mach'a chopol yo'tan, te c'alal Dios ya slajimbe scuxlejal?

⁹¿Ya bal x'a'iybot yaw yu'un Dios te c'alal ya xtal swocol?

¹⁰¿Yu'un bal yutsil q'uinal ya ya'iy ta stojol te Mach'a spisil ya xhu' yu'un? ¿Ya bal sc'opon Dios ta spisil ora?

¹¹Ho'on ya ca'beyex ana'ic sc'oblal te yu'el te Diose; mayuc bin ya jmucbe sc'oblal te Mach'a spisil ya xhu' yu'une.

¹²Apisilic awilojic spisil ini, ¿bin yu'un hiche te jc'axel mayuc scuentahil te bin yac awalique?

¹³Hich ay te bin chapal yu'un Dios yu'un te mach'a chopol, ha te bin ya x'a'bot yu'un te Mach'a spisil ya xhu' yu'un te j'uts'inwanejetique:

¹⁴Aunque bayelix te snich'nab, ya me xlajic ta espada; te alaletic yu'un ma ba ya sta snojel sch'uhtic.

¹⁵Te jaytuhl xan cuxul ya xhil yu'un ya xmilotic yu'un chamel, ma ba ya x'oq'uetayotic yu'un te me'ba' antsetic yu'unique.

¹⁶Aunque ya sbusan plata hich te bin ut'il ts'u'lum soc ya stsob sc'u' spac' hich te bin ut'il ahch'al,

¹⁷ha tsobil yu'un, pero ha ya slap te mach'a toj yo'tan, soc te mach'a mayuc smul ya spucticlan te plata.

¹⁸Hich ya spas sna te bin ut'il sna pehpen, hich te bin ut'il slehchepat te ya spas te jcanane.

¹⁹Ha jc'ulej a te ya xway, pero slajibalix buelta; c'alal ya xwihc' sit mayuc bin ayix yu'un a.

²⁰Ya xtal xiwel hich te bin ut'il snojel ha'; ta ahc'abal ya x'ic'ot bahel ta sutu-ic'.

²¹Te ic' ya xtal ta stojol banti ya xloc' tal c'ahc'al ya yic' bahel, hich ya xbaht; te tulan ic' ya smes loq'uel ta banti ay.

²²Tulan ya shu'xiy bahel, ma sna'be yo'bolil sba, ha ya x'ahn loq'uel ta stojol te yipe.

²³Te ic' ya smaj sc'ab ta stojol, soc ya xuxubtay bayuc ya xbaht, xchi te Zofar.