Read Tzeltal Job 28 Bible Online

Job 28 - Tzeltal bible

Job 28

¹Ay banti ya xloc' te plata, soc ay banti ya yich' lecubtesel te oro.

²Te hierro ya yich' loq'uesel ta lumq'uinal, soc ya yich' uhltesel loq'uel ta ton te cobre.

³Te winiquetic ya slajimbeyic sc'oblal te yihc'al q'uinal; ya xco bahel ta mero sc'ubulil yutil lum, ya sle te tonetic ta yihc'al q'uinal.

⁴Namal ta banti ya xnahinic ants-winiquetic ya shotic ch'en, te banti ch'aybil ta o'tanil, te banti ma xc'axiquix tey a; joc'olic ta lazo, namal ayic ta stojol yantic.

⁵Ta sba te lumq'uinal ya xcol tal we'elil, pero ta yutil c'atp'ujem ta c'ahc',

⁶ay zafiro ta tonetic tey a, soc yich'oj oro ta sts'u'lumil.

⁷Ha be te ma xna'bot sba yu'un ti'awal-mut, soc ma ba ilot yu'un jxic;

⁸mayuc bin ora behen ti'awal chambahlametic soc ma xc'ax choj tey a.

⁹Te winic ya yac' sc'ab ta tulan ton, ya sjambe slohp' te witsetique.

¹⁰Ya slom ch'enetic ta tontiquil, ya yil spisil te c'ulejalil yu'un.

¹¹Ya sle te ban ya xloc' tal[12] te muc'ul-ha'etic, soc ya sloq'ues ta sacal q'uinal te bin muquen aye.

¹²¿Pero banti ya yich' tahel te p'ijil-o'tanil? ¿Banti lugaril ay te snopojibal?

¹³Te winic ma sna' te ay sc'oblal te p'ijil-o'tanil, soc ma xweht ta lehel ta bahlumilal.

¹⁴Hich ya yal te xahab: Ma ba li' ayi, xchi, soc hich ya yal te mar: Ma ba sjoquinejon, xchi.

¹⁵Ma xhu' ta manel ta oro, soc ma xweht stojol ta plata.

¹⁶Ma xhu' ta tojel ta oro yu'un Ofir, ta ónice te bayel stojol o ta zafiro.

¹⁷Ma spaj sba soc te oro o te cristal, ma xhu' ta jelel ta sch'ahlel nuc'-c'abal pasbil ta lequil oro.

¹⁸¿Ha xan te coral o te perla? ¡Te p'ijil-o'tanil c'ax hich a te bin ut'il yutsil te lequil tonetic!

¹⁹Ma pajaluc soc te topacio talem ta Etiopía, ma xhu' ta tojel ta lequil oro.

²⁰¿Banti ya xtal hiche te p'ijil-o'tanil? ¿Banti ay yawil te snopojibal?

²¹¡Ma ba xchicnaj ta sit spisil bintic cuxulic, soc ma xchicnaj ta sitic te mutetic ya xwihlic ta toyol!

²²Te Yawil Lajinel soc te lajel hich ya yalic: La jca'iybetic sc'oblal ta jchiquincotic, xchihic.

²³Dios sna'beyej sbehlal, ya sna' banti ay te yawil,

²⁴como ya yil c'alal banti quechel te bahlumilal, soc ya yil spisil bintic ayic ta ye'tal te ch'ulchane.

²⁵Te c'alal la ya'be yip te ic', soc la sp'is te ha',

²⁶te c'alal la yalbe mandar te ha'al, soc la ya'be sbe te tsantsehwal,

²⁷hich la yil te p'ijil-o'tanil soc la yalbe sc'oblal; la stsahtay yil, la yal te lec ay.

²⁸Hich la yalbe te ants-winiquetic: Ha p'ijil-o'tanil te yich'el ta muc' te Cajwaltique, soc ha lequil nohptesel te yihquitayel te bin chopole, xchi.