Read Tzeltal Job 29 Bible Online

Job 29 - Tzeltal bible

Job 29

¹La yal xan te Job:

²¡Ayuc bin ut'il hich ya xcha'c'ohon te bin ut'il ayon te uhetic c'axix tal, te bin ora la scanantayon te Diose,

³te c'alal bin ora la yac' te sts'anabul ta jol, soc ta scuenta te sacal q'uinal yu'un behenon ta yihc'al q'uinal!

⁴Hich ay te c'alal queremon to a, te c'alal Dios la scanantayon ta jna;

⁵te c'alal sjoquinejon to a te Mach'a spisil ya xhu' yu'un, soc te la sjoytayon te cal-jnich'nab;

⁶te c'alal la jpoc coc ta leche, soc te loc' tal bayel aceite ta muc'ul tonetic ta jtojol.

⁷Te c'alal bohon ta yochibal te pueblo, soc la jchahpan te huctajibal cu'un ta plaza.

⁸C'alal la yilonic te jcolel-winiquetic, la sc'al sbahic ta jtojol, soc la stehc'an sbahic ta jtojol te mamaletic;

⁹te príncipaletic ch'abic ta c'op, la smac yehic ta sc'abic;

¹⁰te mach'atic ich'bilic ta cuenta, c'un c'opojic, soc la slap' sba ta spa'jaj te yaq'uique.

¹¹Te mach'atic la ya'iybonic jc'op la yalbonic cutsilal, te mach'atic la yilonic la yalbonic lec jc'oblal,

¹²como la jcoltaylan te pobre te awon, soc te me'ba' alal te mayuc mach'a ya xcoltayot yu'un.

¹³C'oht ta jtojol te bendición yu'un te mach'a chamelix; soc la jcac' stse'ejinuc yo'tan te me'ba' ants.

¹⁴La jc'u'in te bin stojil, ha la smucon a; ha jmehyil pac' soc spohtsil jol c'ohem te toj-o'tanil.

¹⁵Ho'on sitilon yu'un te ts'o'sit, soc yocon yu'un te coxo',

¹⁶ho'on staton te mach'atic mayuc bin ay yu'unic, soc la jtsahtay quil ta lec soc la jcoltay ta c'op te mach'a ma na'bil sba.

¹⁷La jwuyticlambe scolmillo te jchopol-o'tanetic, la jpojbe ta yehic te sti'balique.

¹⁸Hich la jcal ta co'tan: Ya xchamon tey ta jna, hich c'ahc'aleletic cu'un ya xc'oht te bin ut'il shi'al mar.

¹⁹C'ohem c'alal ta ha' te jlohp', sjunal ahc'abal ya xhil ta ca'binal te ts'ujul,

²⁰ya me x'ach'ub xan te cutsil ta jtojol, ya x'ach'ub yip te t'ihmalte' ta jc'ab, xchihon.

²¹Te mach'atic la ya'iybonic te jc'op la smahliyic, ch'abic ta ya'iyel te j'ac'-o'tanil cu'une;

²²te c'alal laj co'tan ta c'op, mayuc mach'a c'opoj, te jc'op t'ulaj cohel ta stojolic hich te bin ut'il c'unil ha'al.

²³La smahliyonic hich te bin ut'il ya yich' mahliyel ha'al, la sjam yehic hich te bin ut'il ya yich' mahliyel te ha'al te patil ya xtale.

²⁴Teme tse'ejinon ta stojolic, wocol la sch'uhunic, a'bot yip yo'tanic yu'un te stse'elil jsit quelaw.

²⁵La jca'be sna'ic banti behil ya xbahtic soc huhcajon scuenta jtsobaw yu'unic. Hich nahinon te bin ut'il ajwalil ta yohlil te soldadohetic yu'un; hich te bin ut'il mach'a ya ya'be smuc'ul yo'tan te mach'atic ya x'oq'uic.