Read Tzeltal Job 30 Bible Online

Job 30 - Tzeltal bible

Job 30

¹Pero yo'tic ya stse'layonic te mach'atic peq'uel ya'bilalic cu'un, te ha static te ma ba la jc'an la jca'be sjoquinic te ts'i'etic te ya scanantaybon te chambahlametic cu'une.

²¿Bin tuhunic cu'un a te yip sc'abic, te bin ut'il lajemix te yipique?

³Ta scaj spobrehil soc wi'nal la snulic taquin slohp' te'etic ta ahc'abal, ta jochol taquin q'uinal, te banti mayuc mach'a nahinem tey a.

⁴La sbulticlanic ch'ahal ha'mal ta yohl ha'maltic, soc la swe'ic slohp' retama-te'etic.

⁵Yich'ojic loq'uesel ta yohlil ants-winiquetic, awtayotic ta spatic hichuc j'eleq'uetic.

⁶Nahinic ta ti' uc'umetic, ta ch'entiquil te ay ta q'uinal soc ta tontiquil.

⁷Awonic ta yohl ha'maletic soc la stsob sbahic ta ye'tal ch'ixileltic.

⁸Ha sonsohetic, winiquetic te mayuc sbihilic, la yich'ic loq'uesel ta q'uinal.

⁹Pero yo'tic ya slabanonic soc sutp'ijon ta tse'ejil c'op yu'unic.

¹⁰Ya yihlayonic, ya sjits sbahic ta jtojol, ya stuhbataybonic jsit quelaw.

¹¹Como te Dios la stilbon te sch'ajanul jt'ihmalte' soc la spehc'anon, ha yu'un te ma ba ya scom sbahic ta jtojol.

¹²Ta jwa'el ya stsob sbahic te jtsohb mach'atic chopolic, ya smacbonic coc, ya schahpanic bin ut'il ya xlajon.

¹³Ya sjimbonic jbe scuenta yu'un ya xlajon, ya yaq'uic te ya xyahlon, mayuc mach'a ya scoltayon.

¹⁴Ya xtal scontrahinonic hich te bin ut'il soldadohetic te ya xc'axic talel ta banti jamal ta ts'ahc, tulan ya xc'axic ta jba.

¹⁵Tal xiwel ta jtojol; ya xtenot bahel te yutsil jc'oblal hich te bin ut'il ic', te bintic ay cu'un hich c'ax bahel te bin ut'il tocal.

¹⁶Yac ta c'axel bahel te jcuxlejal; bayel c'ahc'al la stsacon te wocole.

¹⁷Te ahc'abal ya shot ochel te jbaquel; mayuc bin ora ya xquehchaj te sc'uxule.

¹⁸Tulan ya stsacbon jc'u',[13] hich ya xchucon te bin ut'il snuc' jmuc'ul-c'u'.

¹⁹Te Dios la sch'ojon ta ahch'al, hichonix te bin ut'il ts'u'lum soc tan.

²⁰¡Ya cawtayat, pero ma ba yac awa'iybon jc'op! ¡Ya jtehc'an jba ta atojol pero ma ba yac awich'on ta cuenta!

²¹Mero tulan awac'ojix aba ta jtojol, yac anutsbelon ta yip ac'ab.

²²Yac alicon mohel ta ic', yac awac' mohucon tey a, yac awac' sliculanon te tulan yic'al ha'al.

²³Ya jna' te yac awac'on bahel ta lajel, ta na banti ya xbaht spisil mach'atic cuxajtic.

²⁴¿Ma bal lajuc jcoltay te mach'a jimbilix te c'alal la yawtayon ta scaj te swocole?

²⁵¿Ma bal lajuc coq'uetay te mach'a ay swocol, soc ma bal lajuc jmel co'tan yu'un te mach'a mayuc bin ay yu'une?

²⁶Pero te c'alal yacon ta smahliyel te bin lec, ha tal te bin ma lecuc; te c'alal yacon ta smahliyel te sacal q'uinal, ha tal te yihc'al q'uinale.

²⁷Ma xquehchaj te ya syuc' sba te jch'uht, yu'un te jayeb c'ahc'al ay ta jtojol te sc'uxul jwocol.

²⁸Ihc'ubenon ya xbehenon, pero ma ha'uc yu'un te c'ahc'ale; ya xtehc'ajon ta yohlil te mach'atic stsoboj sbahic soc ya x'awonon ta sc'anel coltayel.

²⁹Hich c'ohonix te bin ut'il yermano te ha'mal ts'i'etic, soc ha jmohlol te avestruz-mutetique.

³⁰Ihc'ubenix te jnuhculel, yac ta cohel, ya xtihl yu'un c'ahc' te jbaq'uetale.

³¹C'atp'ujemix ta mel-o'tan te arpa cu'un, soc te amay cu'un c'atp'ujem ta oq'uel.