Read Tzeltal Job 31 Bible Online

Job 31 - Tzeltal bible

Job 31

¹La jchap jc'op soc te jsit, ¿bin ut'il c'an cac' jsit ta stojol jtuhl ach'ix?

²Como ¿bin mahtanil ya ya'bon Dios ta toyol? ¿Bin ya ya'bon quich' te Mach'a spisil ya xhu' yu'un te ay ta stoyolil ch'ulchan?

³¿Ma bal ha'uc ya xc'oht jinel ta stojol te mach'a chopol yo'tan, soc te ya xc'oht lajinel ta stojol te mach'atic ya spasic te bin chopole?

⁴¿Ma bal yacuc yilbon Dios te behetic cu'un, soc ya yahtay te jujujihm te coque?

⁵Teme behenon ta scuenta lot, o teme ahnumaj te coc ta lo'loywanej,

⁶¡Dios ac'a slicon ta stojil balanza, hich me ya sna' a te mayuc jmul!

⁷Teme howiyem ta be te coc, teme la st'un bahel jsit te co'tan, teme ay bin c'oht ta jc'ab te ma lecuque,

⁸¡ac'a swe'bon yantic te bintic jts'unoj, ac'a yich' bulel te bintic ts'umbil cu'une!

⁹Teme la jcac' slo'loybon co'tan jtuhl ants, o teme ay la jpac'muc'ultay ta sti'il sna te jpat-xuhc,

¹⁰¡ac'a sjuch'be swe'el yan te quihname, soc ha ac'a wayuc soc yantic!

¹¹Como ha chopol soc ha mulil ini te ya sc'an ya x'a'bot castigo yu'un te juecetique.

¹²Como ha c'ahc' te ya xlajinwan c'alal ta Yawil Lajinel, ya slajimbon spisil bintic ay cu'un.

¹³Teme mayuc sc'oblal c'oht ta co'tan te bin stojil la sc'an pasel ta stojol te a'bat soc criada cu'un te c'alal la stijonic ta c'op,

¹⁴¿bin ya jpas yu'un te c'alal ya xhahch tal te Diose? ¿Bin ya calbe te c'alal ya yich'on ta c'op?

¹⁵Te Mach'a la spason ta yawil alal, ¿ma bal ha'uc nix la spas? ¿Ma bal jtuhluc nax te la spasotic ta yawil alal?

¹⁶Teme la jcom te bintic la sc'anic te pobrehetic o teme la jlajimbe smuc'ul yo'tan te me'ba' antsetic;

¹⁷teme jtuquel la jwe' te jwe'el, teme ma ba la jca'be swe' te me'ba',

¹⁸(como ta jqueremil to ha la jmuc'ubtes hich te bin ut'il jtuhl tatil, soc c'alal ta cayinab to la jcoltay te me'ba' ants);

¹⁹teme la jquil te ay mach'a chamelix yu'un te mayuc sc'u' spac', yu'un mayuc bin ya smuc sba a te mach'a mayuc bin ay yu'un;

²⁰teme ma ba la yalbon bendición ta yo'tan yu'un te la jca'be smuc sba ta stsotsel tuminchij cu'un;

²¹teme la jach jc'ab ta scontrahinel te me'ba', te ayon ta cuenta yu'un ta chahpajibal,

²²¡ac'a ts'ocuc cohel ta jnehquel te jc'abe, ac'a pitc'ujuc cohel jc'ab te banti xojbil ochel!

²³Como la jxi' te castigo yu'un Dios, mayuc binti ya xhu' cu'un spasel ta stojol te yutsil yu'ele.

²⁴Teme ha la smuc'ulin co'tan te oro, teme la jcalbe te oro: Ha'at smuc'ulat co'tan, teme xchihone,

²⁵teme tse'el co'tan yu'un te ya xp'ohl te jc'ulejal, soc te bayel bintic ay ta jc'ab;

²⁶teme la jquil te c'ahc'al te c'alal la yac' tal te sjahts', o te u te buen t'ujbil yac ta behele;

²⁷teme muquen la slo'loyon te co'tan soc te la jcuhts'uy ta jc'abe;

²⁸ha nix mulil te ya sc'an chahpanel, como la jmuc ta co'tan a te Dios ay ta toyol te hichuque.

²⁹Teme tse'ejin co'tan yu'un swocol te jcontra, teme tse'el co'tan yu'un teme tal wocol ta stojol,

³⁰(ma ba la jca'be sta smul te que yu'un sc'ambeyel chopol c'oblalil ta scuxlejal);

³¹teme ma hichuc yalojic te a'batetic cu'un: ¿Mach'a a te ma ba nojem sch'uht yu'un te sti'bal? te xchihique,

³²(yu'un mayuc jtuhl jbehyom te c'ax ahc'abal yu'un ta calle, yu'un jamal te ti'nahiletic cu'un yu'un te jbeheletique);

³³teme la jmuc jmul hich te bin ut'il yantic winiquetic, teme la jmuc ta co'tan te jmul

³⁴ta scaj te la jxi' te tsobol ants-winiquetic, soc ha la jxi' te labanel yu'un te jujuchahp na, te hich ch'abon yu'un soc ma ba loc'on ta sti'il jna yu'un;

³⁵¡Ayuc bin ut'il ay mach'a ya ya'iybon te jc'ope! La jcac' firma yu'un te bin la jcal, ac'a sutbon jc'op te Mach'a spisil ya xhu' yu'un; te mach'a ya slehbon jmul ac'a sts'ihbay ta hun,

³⁶ya quich' bahel ta jnehquel, ya jcoronahin.

³⁷Ho'on nix ya ca'be cuenta te jujujihm te coque, ya jtehc'an jba ta stojol hich te bin ut'il snich'an ajwalil.

³⁸Teme ya x'awon ta jcontra te jq'uinal soc ya x'oc' spisil te chohlolchohl joc'bil lum;

³⁹teme la jwe'be sit te awal-ts'unubil te ma ba la jtoj, o teme la jca'be smel yo'tan te yajwale,

⁴⁰¡ac'a coluc ch'ixetic scuenta sjelol te trigo, ac'a coluc chopol ha'maletic scuenta sjelol te cebada! xchi te Job. Tey laj te sc'op te Job.