Read Tzeltal Job 32 Bible Online

Job 32 - Tzeltal bible

Job 32

¹Te oxeb winiquetic quehchajic ta sjac'beyel sc'op te Job yu'un te mayuc smul ta sc'op.

²Pero te Eliú snich'an Baraquel, te talem ta Buz, te ha sts'umbal Ram, bayel ilin ta stojol Job ta scaj te la scuy sba ta toj, ma ha'uc la yal te ha toj te Diose.

³Soc ha nix hich ilin ta stojolic te oxeb yamigotac Job, como ma ba hu' yu'unic sutbeyel te sc'ope, aunque la yalbeyic te ay smul te Job.

⁴Te Eliú la smahliy te ya sten ta c'op te Job como ha mamaliquix te yantique.

⁵Pero c'alal la yil te Eliú te ma ba hu' yu'unic te oxtuhl winiquetic sutbeyel te sc'op te Job, hich ilin yu'un.

⁶Hich la yal te Eliú snich'an Baraquel, te talem ta Buz: Ho'on queremon to, mamalexix te ha'exe, ha yu'un xiwon ta yalel te bin jnopoje.

⁷Hich la jcal: Ac'a c'opojuc te mach'a bayelix c'ahc'aletic yu'un, ac'a yal p'ijil-c'op te mach'a bayelix ya'bilal, xchihon.

⁸Pero ha espíritu yich'oj te winique soc hu'xiyel yu'un te Mach'a spisil ya xhu' yu'un te ya ya'be sna' q'uinal te winique.

⁹Ma ha'uc te mach'atic bayel ya'bilalic te ay sp'ijilic, ma ha'uc te mamaletic te ya sna'ic te bin toj ta pasele.

¹⁰Ha yu'un hich la jcal: A'iybonic me jc'op, ha nix hichon ya calbeyex te sp'ijil co'tane, xchihon.

¹¹La jmahliy te snopojibal awu'unic, la jca'iybeyex sc'oblal te ac'opic, te c'alal la alehic te bin yac awalique.

¹²La jca'iybeyex ta lec te ac'opique, pero ma ba hu' awu'unic yalbeyel te Job te banti howiyem, ma ba hu' awu'unic sutbeyel te snopojibal yu'une.

¹³Ha yu'un ma me xawalic: Ho'otcotic jtahojcotic sp'ijil co'tancotic. Ac'a tsalec yu'un Dios, ma ha'uc yu'un te winique, ma xchihuquex.

¹⁴Ma ha'uc la stojlinon ta c'op te Job, ni ho'ucon ya jac'be sc'op hich te bin ut'il te ha'exe.

¹⁵Xcham yo'tanic, ma ba la sna'ic bin xan ya yalic yu'un, ma ba wehtix te snopojibal yu'unic.

¹⁶Te bin ut'il mayuc bin ya yalic, ¿ya bal c'an jmahliy, te bin ut'il quechajiquix ta c'op, mayuc bin ya sjaq'uic?

¹⁷Ha yu'un ho'on ya jac', ho'on ya cal te bin jnopoje.

¹⁸Como nojel ta co'tan te bin ya cal, ya yac' te ya xc'opojon te espíritu te quich'oje.

¹⁹Hich ya ca'iy te co'tan te bin ut'il yawil vino te mayuc yich'o-ic', te ya yac' ya sjat te yach'il snuhculel te yawil vino.

²⁰Ya xc'opojon hiche, hich ya xlecub q'uinal ya ca'iy; ya jam que, ya jac' te c'ope.

²¹Mayuc mach'a tsahbil nax cu'un, mayuc mach'a ya calbe lec sc'oblal.

²²Como ma jna' yalbeyel lec sc'oblal ta lot; teme hich ya jpas, te Jpaswanej cu'un ya me ya'bon castigo ta ora.