Read Tzeltal Job 33 Bible Online

Job 33 - Tzeltal bible

Job 33

¹Ha yu'un, Job, a'iybon awa'iy te snopojibal cu'un, a'iybon awa'iy spisil te jc'ope.

²Yo'tic ya jam que, ayix ta que te bin ya cale.

³Te bin ya cal ha ya yac' ta na'el te toj co'tan, soc te bin ya sna' te que, ya cal ta spisil co'tan.

⁴Ha la spason te Espíritu yu'un Dios, la ya'bon jcuxlejal te hu'xiyel yu'un te Mach'a spisil ya xhu' yu'un.

⁵Sutbon jc'op teme ya xhu' awu'une; chahpana aba yu'un ya jta jbahtic ta c'op.

⁶Te ha'at soc te ho'one, pajal quileltic ta stojol Dios; ha nix hich pasbilon ta ahch'al.

⁷Ha yu'un ma me xiwat ta jtojol, ma ba al ya xc'oht te jc'ab ta atojol.

⁸Melel ha'at la awalbon ta jchiquin, la jca'iy te c'op te hich la awal:

⁹Ho'on lec ayon, mayuc jmul; mayuc falta jtahoj, mayuc bin chopol jpasoj.

¹⁰Pero Dios la sle bin ya ya'bon jmulin, hichon ta stojol te bin ut'il scontra.

¹¹La yotsesbon coc ta hotbil te', ya yilbon spisil te behetic yu'un, xchihat.

¹²Pero te bin la awale, ma stojiluc, ho'on ya calbat, te Dios ha muc' xan yu'un te ants-winique.

¹³¿Bin yu'un te yac atsal aba ta c'op soc, te yac awal te ma ba ya sjac'bat te ac'ope?

¹⁴Ay cha'oxchahp bin ut'il ya sc'oponotic te Diose, pero ma ba ya xc'oht ta yo'tan te winique.

¹⁵Ta wayichil, ta nahal sitil, te c'alal ya x'och swayel te winic, c'alal wayalix ta swayib a,

¹⁶ya yac' sba ta a'iyel ta schiquin, ya xiwtes te manchuc hich ya spas,

¹⁷scuenta yu'un ya ya'be yihquitay te bin yac ta spasel, soc yu'un ya yihquitay te stoybahil,

¹⁸yu'un ma ba ya xbaht ta muquenal, ma ba ya xlaj ta espada te scuxlejal.

¹⁹Ay ya ya'be castigo ta swayib ta tulan sc'uxul ta sbaquel.

²⁰Hich ya ya'be yihlay te swe'el, ma sc'an te mero lequil we'elil.

²¹Te sbaq'uetal ya sch'ay bahel ta sitil, te sbaquel, te ma ba chican ta ilel ta nahil to, ya xchicnaj ta ilel.

²²Te sch'uhlel ya xnohpoj bahel ta muquenal, te scuxlejal ya xnohpoj bahel ta stojol te j'ac'awal ta lajel.

²³Pero teme ay jtuhl ch'ul a'bat ta sts'ehl te winic, te mach'a ya xc'opoj yu'un, jtuhl ta yohlil jmil, te ya yalbe te winic te bin lec ya sc'an ya spas,

²⁴te ya sna'be yo'bolil sba, te hich ya yalbe te Dios: Coltaya te manchuc ya xbaht ta muquenal, la jtahbey stojol te ya xcol, te xchihuque,

²⁵hich ya xc'oht xan te sbaq'uetal te bin ut'il alal, hich ya xc'oht xan te bin ut'il querem to a.

²⁶Ya sc'opon Dios, hich ya xc'uxultayot yu'un; mero tse'el yo'tan a ya yilbe sit te Diose, Dios me ya scha'lecubtes xan te winique.

²⁷Hich ya yal ta c'ayoj ta stojol ants-winiquetic: La jta jmul, la jimbe sc'oblal te bin toj ay, pero ma ba la jquich' castigo yu'un.

²⁸Dios la scoltayon te ma ba bohon ta muquenal, cuxulon to, ya to quil xan te sacal q'uinale, xchi.

²⁹Te Dios cheb oxeb buelta hich ya spasbe te ants-winic,

³⁰yu'un ma xyac' ta muquenal te sch'uhlel, yu'un ya ya'be xan yil te sacal q'uinal yu'un cuxlejal.

³¹Job, a'iybon me awa'iy te jc'ope; ch'aban, ho'on ya xc'opojon.

³²Teme ay bin yac awale, jac'bon ca'iy, c'opojan, yu'un co'tanuc ya cac' ta ilel te tojat ta winiquil.

³³Pero teme ma'uque, a'iybon awa'iy te jc'ope, ch'aban, ya ca'bat anop te p'ijil-o'tanil, xchi te Eliú.