Read Tzeltal Job 34 Bible Online

Job 34 - Tzeltal bible

Job 34

¹La yal xan te Eliú:

²A'iybon awa'iyic te bin ya cal, ha'ex te p'ijil winiquex, ha'ex te nohptesbilex, a'iya me awa'iyic.

³Como te chiquinil ya sna' stsahtayel te c'opetic hich te bin ut'il ya ya'iybe sbuhts' we'elil te pa'jaj.

⁴Ac'a jtsahtaytic te bin toj; pajal ya jnoptic te bintic leque.

⁵Hich yaloj te Job: Tojon ta winiquil, pero te Dios ma sc'an ya schahpanon ta stojil.

⁶Lot ya xc'oht teme ya cal te ay jmul;[14] mero c'ux te quehchen, aunque mayuc bin jmulinej, xchi.

⁷¿Mach'a winiquil te pajal soc Job, te ya yuch' tse'layel hich te bin ut'il ha',

⁸te ya sjoquin bahel te mach'atic chopol yo'tanic, ya xbehen soc chopol winiquetic?

⁹Como hich ya yal: Mayuc bin ya sta a te winic teme ha nax ya sc'an ya spas te bin lec ya ya'iy te Diose, xchi.

¹⁰Ha yu'un winiquex te ay ap'ijilic, a'iybon me awa'iyic jc'op: ¡Te Diose, jc'axel mayuc mulil ta scuenta, te Mach'a spisil ya xhu' yu'un ma ba ya spas te bin ma stojiluc!

¹¹Ha ya ya'be stoj te winic ha chican te ya'tele, ya ya'be ta scuenta ha chican te bin spasoje.

¹²Ta mero melel, te Dios ma ba ya spas te bin ma stojiluc, te Mach'a spisil ya xhu' yu'un ma ba ya sjin te bin toj ta pasel.

¹³¿Mach'a la ya'be ya'tel ta scuentahinel te lumq'uinal? ¿Mach'a la ya'be scuentahin swohlol te bahlumilale?

¹⁴Te yacuc sloq'ues te espíritu yu'un, te yacuc stsob te hu'xiyel yu'un cuxlejal,

¹⁵spisil bintic cuxajtic pajal ya xlajic, soc te ants-winic ya scha'sutp'ij xan ta ts'u'lum.

¹⁶Teme ay lec snopojibal awu'une, a'iya awa'iy ini, a'iybon awa'iy te c'opetic cu'un.

¹⁷¿Ya bal ya'iy cuentahinwanej te mach'a ya sp'aj te bin toj? ¿Ya bal awalbe smul te Mach'a toj soc te ay yu'el,

¹⁸te ha ya yalbe te ajwaliletic: Chopolex, te xchihe, soc te mach'atic bayel sc'oblalic: Bohlex, te xchihe;

¹⁹te pajal ay ta yo'tan te príncipaletic, te pajal c'ohem ta yo'tan te jc'ulej soc te pobre, como spisilic ha ya'tel sc'ab stuquel?

²⁰Jts'ihn nax ya xchamic, ta ohlil ahc'abal; ya yehchentes, ya xch'ayic bahel, te mach'a ay yip ya'tel ma ta scuentahuc c'abal ya yich' loq'uesel.

²¹Como Dios ya yil te behetic yu'un te ants-winic, ya yil te jujujihm te yoque.

²²Mayuc yihc'al q'uinal soc yaxinal lajel ta banti ya xhu' ya snac' sbahic te mach'atic chopol bin ya spasic.

²³Te Diose ma xya'be yorahil te winic te ya stehc'an sba ta stojol yu'un ich'el ta c'op.

²⁴Ha ya sjin te mach'atic ay yipic, ma ba nahil ya sjoc'oy, soc ha ya yotsesbe sjelol.

²⁵Hich ay, yu'un ya sna'be ya'telic, ya slajin ta ahc'abal, hich jimbil ya xhilic.

²⁶Ya yehchenteslan, como chopolic, ta scomon sit spisil yantic,

²⁷como la yihquitayic hilel, ma ba la yich'beyic ta cuenta te behetic yu'un,

²⁸ha ta scuentahic te awonic ta stojol Dios te pobrehetic, soc te ya ya'iybe yawic te mach'atic ay swocolic.

²⁹Teme ya scux yo'tan, ¿mach'a ya xhu' ya stij hahchel? Teme ya snac' yelaw, ¿mach'a ya xhu' ya yil? Pajal ya yil te nación soc te ants-winiquetic,

³⁰scuenta yu'un ma ba ya x'och ta ajwalil te mach'a chopol yo'tan, te ma ba ya slo'loy te pueblohe.

³¹¿Ay bal hich la awalbe te Dios: La jcac' jba ta lo'loyel, ma ba ya jlehix jmul yan buelta.

³²A'bon quil te binti ma ba ya jta ta ilel; teme chopol bin jpasoj, ma ba ya jpasix yan buelta, xchihat bal ta stojol?

³³¿Yu'un bal yac ac'an te Dios ya yac' castigo hich te bin ut'il yac ac'an ha'at, aunque ma hichuc awo'tan te bin ya spas stuquel? Ha'at ya sc'an te yac awal, ma ho'ucon ya cal, hala te bin ana'oj.

³⁴Te mach'atic ay snopojibal yu'unic soc spisil te p'ijil winiquetic te ya ya'iybon jc'op, ya me yalbonic:

³⁵Te Job mayuc sp'ijil te bin ya yal; te c'opetic yu'un mayuc scuentahil.

³⁶¡Con'tanuc ya yich' tsajel ta lec te Job, como pajal sc'op soc chopol winiquetic!

³⁷Ma ha'uc nax te ay smul, la to stoy xan sba a; ya smaj sc'ab ta jtojoltic scuenta jlabaneltic, soc bayel bin ya yal ta scontrahinel te Diose, xchi te Eliú.