Read Tzeltal Job 35 Bible Online

Job 35 - Tzeltal bible

Job 35

¹La yal xan te Eliú:

²¿Ya bal acuy te lec te hich la awal: C'ax hich tojon a te bin ut'il Dios, te xchihate?

³Como hich la awal: ¿Bin ya xloc' cu'un a, binti ya jta a teme ma ba jtahoj jmul? xchihat.

⁴Ho'on ya jsutbat te ac'op soc te sc'opic te awamigotaque.

⁵Ila mohel te ch'ulchane, na'a me te ha toyol xan awu'un te tocale.

⁶Teme yac ata amul, ¿bin ya x'uts'inot a te Diose? Teme bayel yac ac'axuntay mandar, ¿bin swocol yac awa'be a?

⁷Teme toj awo'tan ¿bin yac awa'be? ¿O bin ya sta a te ta ac'abe?

⁸Te bin chopol yac apas, ha nax yac awuts'in a te ants-winic te pajalat soque, soc te bin stojil yac apas, ha nax ay bin ya sta a te snich'nab winic.

⁹Ya x'awonic te ants-winiquetic ta scaj bayel swocolic; ya x'awonic ta sc'anel coltayel yu'un te mach'atic ay yipique.

¹⁰Pero mayuc mach'a hich ya yal: ¿Banti ay te Dios, te Jpaswanej cu'un, te ya yac' c'ayoj ta ahc'abal,

¹¹te c'ax hich ya sp'ijubtesotic a te bin ut'il te chambahlametic ta q'uinal, soc c'ax hich ya ya'botic sp'ijil co'tantic a te bin ut'il te mutetic ta ch'ulchan? te xchihe.

¹²Ya x'awonic, pero ma ba ya xjac'botic yu'un ta scaj stoybahilic te mach'atic chopolic.

¹³Melel Dios ma ba ya ya'iy te tojol c'op; te Mach'a spisil ya xhu' yu'un ma ba ya yich' ta cuenta.

¹⁴¿Ha'uc to balix a ma ba ya ya'iyat teme yac awal te ma ba yac awil te Diose, te ay ta stojol te ahcanaj awu'un soc yacat ta smahliyel?

¹⁵Pero yo'tic, te bin ut'il Dios ma ba ya yac' castigo ta scuenta yilimba, soc ma mero ya yich' ta cuenta te mulile,

¹⁶hich te Job mayuc scuentahil bin ya yal, bayel ya xc'opoj pero mayuc p'ijil c'op tey a, xchi te Eliú.