Read Tzeltal Job 37 Bible Online

Job 37 - Tzeltal bible

Job 37

¹Ya xwihl co'tan yu'un, ya xwihl loq'uel ta yawil.

²A'iybeya awa'iy te stulanil te sc'ope, ha te sc'op te ya xt'ohm loq'uel ta ye.

³Ha ya yac' bahel te tsantsehwal ta ye'tal te ch'ulchan, ya sacubtes q'uinal c'alal sti'il te bahlumilale.

⁴Patil ya xt'ohm te sc'ope, soc bayel yip ya xc'opoj. Aunque ya xchicnaj sc'op ma ba ya scom te tsantsehwale.

⁵Bayel yutsil ya st'omtes bahel te sc'op te Diose; muc' bin ya spas, ma xhu' cu'untic sna'el.

⁶Ya yalbe te me'sic: Cohan bahel ta q'uinal, xchi, soc ya yalbe te tulan ic'al ha'al: Ac'a tulan awip, xchi.

⁷Ha ya scom ta a'tel spisil te ants-winiquetic scuenta yu'un spisilic ya sna'beyic te ya'tele.

⁸Te chambahlametic ya x'ochic ta snahic, tey ya xhilic a.

⁹Ta stojol sur ya xtal te ic'al ha'al, ta stojol norte ya xtal te sique.

¹⁰Te hu'xiyel yu'un Dios ya yac' te me'sic, ya xtulanub te sba te ha'etic hich te bin ut'il ton.

¹¹Ya snojes ta ya'lel te pimil tocaletic, soc ya spuc ta tocaletic te tsantsehwal.

¹²Ya sjimulan sbahic te tocaletic hich te bin ut'il chahpambil yu'un Dios, ya xpuhquic bahel ta sba te bahlumilal, scuenta spasel te bin ya xpasotic ta mandar yu'un.

¹³Hich ya spas ta scuenta castigo, o ta scuenta te q'uinal, o ta scuenta sc'uxul yo'tan.

¹⁴A'iya awa'iy, Job; coma aba soc nopa awa'iy te yutsil ya'tel te Diose.

¹⁵¿Ya bal ana' bin ut'il Dios ya spas ta mandar te tocaletic, soc bin ut'il ya stihltes te tsantsehwal ta tocal?

¹⁶¿Ya bal ana' bin ut'il lichil te tocale, ha te t'ujbil ya'tel te mach'a spisil sna'oj?

¹⁷Ha'at te q'uixin yac awa'iy te ac'u' te c'alal c'ux c'ahc'al yu'un te ic' ya xtal ta stojol sur,

¹⁸¿ya bal xhu' awu'un yac acoltay ta slimel bahel te ch'ulchan, te tulan ya xc'oht hich te bin ut'il espejo pasbil ta uhltesbil taq'uin?

¹⁹A'botic jna'tic bin ya calbetic te Diose, yu'un mayuc yan bin ya calcotic ta scaj te yihc'al q'uinale.

²⁰¿Ya bal x'a'bot sna' te Dios te ya jc'an ya xc'opojon? ¿Ay bal mach'a ya sc'an ya yich' lajinel?

²¹Ma ba chicanix te sts'anabul te c'ahc'al yu'un macal ta tocal, pero te c'alal ya xc'ax te ic', te hich q'uepel ya xhil,

²²ya xtal sts'anabul oro yilel ta stojol norte, ¡ha te xiweltic sba yu'el te Diose!

²³Ha te Mach'a spisil ya xhu' yu'un, te ma xhu' cu'untic stahel, ha muc' te yu'el soc toj ya xchahpanwan, toj bin ya spas, mayuc mach'a ya yuts'in.

²⁴Ha yu'un ya x'ich'ot ta muc' yu'un te ants-winiquetic; mayuc ta cuenta yu'un te mach'a ya scuy sba ta p'ij, xchi te Eliú.