Read Tzeltal Job 38 Bible Online

Job 38 - Tzeltal bible

Job 38

¹Hich te Jehová la suhtesbe sc'op te Job ta yohlil sutu-ic', hich la yal:

²¿Mach'a a te ya slajimbe sc'oblal te j'ac'-o'tanil cu'un ta scuenta tojol c'opetic?

³Chuca ach'uht, pasa tulan winiquil, ay bin ya joc'obat, ya me asutbon.

⁴¿Banti ayat a te c'alal la jpas te yich'o-ip te bahlumilal? ¡Halbon ca'iy, teme ay ap'ijile!

⁵¿Mach'a la yac' te hich smuc'ul ya xc'oht, teme yac ana'e? ¿O mach'a la ya'be sp'isol?

⁶¿Banti cajajtic te yich'o-ip? ¿Mach'a la ya'be te ton yu'un xuhc,

⁷te c'alal yacalic ta c'ayoj a spisil te eq'uetic ta sacubel q'uinal, soc te tse'el yo'tan awonic spisil te snich'nab te Diose?[16]

⁸¿Mach'a la smac ta puertahetic te mar te c'alal t'ohm hahchel ta sch'uht,

⁹te c'alal la jca'be sc'u'in tocal soc pimil tocal scuenta smeyojbil?

¹⁰La jchahpambe banti c'alal ay te sti'ile, soc la jca'be puertahetic soc c'atal-te'etic,

¹¹soc hich la jcalbe: Li' nax c'alal ya xc'ohat, ma me sohlat bahel; tey nax ya xquehchaj a te toybahil yu'un te tulan stselajan mar awu'un, te xchihone.

¹²¿Ay bal bin ora la awalbe mandar te ya me xloc' tal te c'ahc'ale, o la awa'be sna' banti yawil te sacubel q'uinal,

¹³scuenta yu'un ya stsacbe sti'il te q'uinal, te hich ya yich'ic tihtinel loq'uel tey a te mach'atic chopolic?

¹⁴Te q'uinal hich ya spas sba te bin ut'il ahch'al te ay ta ye'tal te sello, soc ya yich' bonel ta tinta hich te bin ut'il c'u'ul;

¹⁵pero ma x'a'botic sacal q'uinal te mach'atic chopolic, soc ha ya yich' wac'beyel te stoyba c'ab.

¹⁶¿Ay bal ochemat bahel c'alal ta sloq'uib-ha' yu'un te mar, o ay bal behenemat ta sts'ahtayel te sc'ubulile?

¹⁷¿A'botat bal awil te puertahetic yu'un lajel, awiloj bal te puertahetic yu'un te yaxinal lajel?

¹⁸¿Ana'oj bal te bin smuc'ul sjamalil te q'uinale? ¡Hala, teme ana'oj spisil ini!

¹⁹¿Banti ay sbehlal te sna te sacal q'uinal? ¿Banti ay te yawil te yihc'al q'uinal,

²⁰yu'un yac atojobtes bahel c'alal ta sti'il soc yac ana'be sbehlal te snahe?

²¹¡Ha'at ana'oj, como ayinematix a, mero bayel awa'bilal!

²²¿Ay bal ochemat c'alal ta sq'uejojibal te me'sic, awiloj bal te sq'uejojibal te bat

²³te q'uejbil cu'un yu'un yorahil wocol, yu'un te yorahil guerra soc tsaltamba?

²⁴¿Banti ay te be banti ya spuc sba te sacal q'uinal, soc banti ya spuc sba ta spahmal q'uinal te ic' te banti ya xloc' tal c'ahc'al?

²⁵¿Mach'a ya sjambe sbe te buen tulan ha'al, soc te be yu'un te tsantsehwal soc te chahwuc,

²⁶te ya yac' taluc ha'al ta jochol q'uinal, ta jochol taq'uin q'uinal banti mayuc mach'a nahinem tey a,

²⁷scuenta yu'un ya yahts'es te taquin jochol q'uinal soc ya yac' ch'ihyuc uhnen ha'maletic tey a?

²⁸¿Ay bal stat te ha'ale? ¿Mach'a la snich'antay te ts'ujule?

²⁹¿Mach'a sch'uht ta ban ya xtal te hielo? ¿Mach'a ya snich'antay te me'sique?

³⁰Te ha'etic ya xtulanubic hich te bin ut'il ton, soc ya slech sba te sba te xahabe.

³¹¿Ya bal xhu' yac achuc ta lazo te Xana eq'uetic? ¿Ya bal xhu' yac atilbe schuhquil te Cruz ec'?

³²¿Ya bal awac' ya xloc' ta yorahil te tsohbotsohb eq'uetic, ya bal atojobtes bahel ta be te Osa Mayor[17] soc te yalataque?

³³¿Ya bal ana' te leyetic te ya scuentahinic te ch'ulchane? ¿Ya bal awac' c'ohtuc ta pasel ta bahlumilal te mandariletic yu'unique?

³⁴¿Ya bal xhu' yac atoy mohel ac'op c'alal ta tocal yu'un ya smucat bayel ha'?

³⁵¿Ya bal aticon bahel te tsantsehwaletic, yu'un ya xloq'uic bahel, o yu'un ya yalbat: Li' ayotcotic, te xchihique?

³⁶¿Mach'a la yac' ta o'tanil te p'ijilil? ¿Mach'a la ya'be snopojibal te pensaril?

³⁷¿Mach'a ay sp'ijil yu'un sna'el jayeb tocaletic ay? ¿Mach'a ya xhu' ya smal te sq'uibul ch'ulchan,

³⁸te c'alal ya xtulanub te ts'u'lum soc ya slap'ticlan sba te chabec'lum?

³⁹¿Ha'at bal yac alehbe swe' ti'bal te me' choj? ¿Ya bal anojesbe sch'uhtic te alal chojetic

⁴⁰te c'alal pacajtic ta ch'entiquil o snac'oj sbahic ta smahliyel ta pimil q'uinal?

⁴¹¿Mach'a ya schahpambe swe'el te jojetic te c'alal ya x'awonic te yalatac ta stojol Dios soc bayuc ya xbahtic ta scaj mayuc swe'elic?