Read Tzeltal Job 4 Bible Online

Job 4 - Tzeltal bible

Job 4

¹Ha yu'un te Elifaz te talem ta Temán la sjac'be sc'op te Job:

²Te ayuc mach'a ya sjucat ta c'op, awuts'inel wan yac awa'iy. Pero ¿mach'a ya xhu' ya scom te c'opetique?

³Ha'at bayel mach'atic la ap'ijubteslan, soc la awa'be yich' yip te mach'atic mayuc yip sc'abic.

⁴Te mach'a ya xyahl, ya xhahchot yu'un te ac'ope, soc yac awa'be yich' yip sjol yacanic te mayuc yipique.

⁵Pero yo'tic tal wocol ta atojol, ma xcuhch awu'un; c'alal c'oht ta atojol, yac amel awo'tan yu'un.

⁶¿Ma bal ha'uc yip awo'tan te bin ut'il axi'oj te Diose? ¿Ma bal ha'uc smuc'ul awo'tan te bin ut'il lec ya xbehenat?

⁷Na'a awa'iy yo'tic, ¿ay bal mach'a lajem te mayuc smul? soc ¿banti jimbilic te mach'atic toj yo'tanic?

⁸Como quiloj te mach'atic ya sjoq'uic bin chopol soc te ya sts'unic labanwanej, ha nix ya stulbeyic sit.

⁹Ya xlajinot yu'un te yic'al ye Dios, soc ta scuenta te yic'al yilamba ya xlajinotic yu'un.

¹⁰Te yoq'uel choj soc te yaw, soc te yehic te tut chojetic ya xwaq'uic.

¹¹Ya xcham te mamal choj ta scaj mayuc bin ya sti', soc te yalatac te me' choj ya xpuhquic bahel.

¹²Ta muquen tal c'op ta jtojol, la ya'iy jchiquin te sajsaj c'op.

¹³Ta wayichil ta ahc'abal, ha te bin ora ya x'och swayel ants-winiquetic,

¹⁴tal xiwel soc nihquel ta co'tan, la stij sba spisil te jbaquele.

¹⁵C'ax jun espíritu ta jtojol, la sch'ixan sba stsotsel ta spisil jbaq'uetal.

¹⁶Ay yesomba te la stehc'an sba ta jtojol, ma ba la jquil ta lec bin yilel, la jca'iy te hich la yal ta sajsaj-c'op:

¹⁷¿Ha bal toj xan te winic te bin ut'il te Diose? ¿Ha bal lec xan ta winiquil te bin ut'il te jpaswanej yu'une?

¹⁸Teme ma ba ya smuc'ulin yo'tan te a'batetic yu'un, soc teme ay ma tojuc ya yil te ch'ul a'batetic yu'une,

¹⁹¡ha'uc to balix a te mach'atic snahinejic ahch'al, te yich'oj hahchel yip ta ts'u'lum, te ya yich'ic p'e'el hich te bin ut'il tut sulup!

²⁰Cuxul ta sab, lajemiquix ta tibiltic, sbahtel q'uinal ya xlajic, mayuc mach'a ya xna'otic yu'un.

²¹Ya xbulot loq'uel te schuhquil snahilpac', mayuc sp'ijil a ya xchamic, xchi la jca'iy.