Read Tzeltal Job 5 Bible Online

Job 5 - Tzeltal bible

Job 5

¹Yo'tic, c'opojan, ¿ay bal mach'a ya sjac'bat? ¿Mach'a ch'ul a'batil yac ac'opon?

²Melel ya xmilot yu'un yilimba te mach'a ma sna' q'uinal, ya xmilot yu'un bic'tal-o'tanil te sonso.

³Ho'on quiloj te sonso ya yac' coluc slohp', pero ora nax la jcalbe bohloben sc'oblal[3] te snahe.

⁴Ma ba seguro ay te snich'nab: ya xlajinotic ta ti'nahil, mayuc mach'a ya xcoltayotic yu'un.

⁵Te sit sts'unub yawal ya xwe'bot yu'un mach'atic ay swi'nalic, ya xtulbot loq'uel tal ta ch'ixileltic; soc te mach'atic taquijem yo'tanic ya xbic'taj yo'tanic yu'un te sc'ulejale.

⁶Como te bin chopol ma ba ya xloc' tal ta ts'u'lum, soc te wocol ma ba ya sch'ihy tal ta lum.

⁷Hich te bin ut'il te nich c'ahc' ya xwihl bahel ta toyol, hich ya x'ayin te winic yu'un ya xc'ax swocol.

⁸Melel ho'ucon ya jle te Diose soc ya ca'be ta scuenta te jwocol te hichuque.

⁹Ha ya spas muc' a'teliletic te ma xhu' ta na'beyel scuentahil, soc yutsil a'teliletic te ma xhu' ta ahtayel.

¹⁰Ha ya yac' tal ha'al ta sba te bahlumilal, ya sticon tal ha' ta q'uinal.

¹¹Ha stoytes te mach'atic peq'uel ayic soc te mach'atic ayic ta mel-o'tan ya yac' te jun yo'tan ya x'ayinic ta q'uinal.

¹²Ha ya sjimbe te bintic snopoj te mach'atic ya xlo'loywanic, scuenta yu'un mayuc bin ya xhu' yu'unic spasel a.

¹³Ha ya syac te mach'atic p'ijic ta scuenta te lo'loyel yu'unic soc ya slajimbe te bin chapal yu'un te jchopol-o'taniletic.

¹⁴Ta c'ahc'alel ya sc'ohchin sba soc te yihc'al q'uinal, ta ohlil c'ahc'al ya x'och picponel hich te bin ut'il ta ahc'abal.

¹⁵Ha ya scoltay loq'uel te pobre ta espada ta yehic te mach'atic chopol yo'tanic soc ta sc'abic te mach'atic ay yipic.

¹⁶Ha scuentahil te ay smuc'ul yo'tan te pobre, soc te bin ma stojiluc, ha ya smac ye yu'un.

¹⁷Bayel me yutsil te mach'a ya xtojobtesot yu'un Dios; ha yu'un ma me xap'aj te tojobtesel yu'un te Mach'a spisil ya xhu' yu'un.

¹⁸Como ha nix te mach'a ya yac' ehchen, soc ha nix te ya spots; ya yehchentes, ha nix ya spoxtay ta sc'ab.

¹⁹Ya scoltayat loq'uel ta waqueb awocol, ta shuquebal ma ba ya stahat te bin chopole.

²⁰Ta yorahil wi'nal ya me scoltayat loq'uel ta lajel, soc ta yorahil guerra ya me scoltayat loq'uel ta yip te espada.

²¹Ya me scoltayat ta ixta'c'optayel, ma ba ya xiwat te c'alal ya xtal te wocol yu'un jinel.

²²Ya me atse'lay te lajel soc te wi'nal, ma ba yac axi' te jti'awal chambahlametic ta q'uinal.

²³Ya me achap ac'op soc te tonetic, soc lamal q'uinal ya ya'iyic ta atojol te ti'awal chambahlametic.

²⁴Ya me ana' te ay lamal q'uinal ta anahilpac'; yac awil te banti ya xnahinat te mayuc falta yu'un.

²⁵Soc yac awil te ay bayel ats'umbal, te ats'umbal hich yipal te bin ut'il ha'maletic ta q'uinal.

²⁶Mamalatix soc ay awip a ya xbahat ta muquenal, hich te bin ut'il tombil trigo te ya xtsobot ta yorahil.

²⁷Quilojcotic ta lec, melel nix a. A'iya awa'iy soc na'a ta lec scuenta yu'un lec ya xc'ohat a, xchi te Elifaz.