Read Tzeltal Job 7 Bible Online

Job 7 - Tzeltal bible

Job 7

¹¿Ma bal ha'uc ay swocol te scuxlejal te ants-winic ta bahlumilal soc te hich ya xc'ax c'ahc'al yu'un te bin ut'il j'a'tel-winic?

²Ha pajal soc a'bat te yo'tanuc ya sta axinal, ha pajal soc te j'a'tel-winic te ya smahliy te stojole.

³Hich c'ax te uhetic cu'un ta tojol nax, soc a'boton ahc'abaletic te ay wocol yu'un.

⁴C'alal wayalon, hich ya cal: ¿Bin ora ya xhahchon? xchihon. Pero lom naht te ahc'abale, bayel ya jsutilan jba c'alal ta sacubel q'uinal.

⁵Te jbaq'uetal sc'u'inej yal hahetic soc smact'ohchil; ya xlaj te jnuhculel soc ya xloc' spojowil.

⁶Te c'ahc'aletic cu'un c'ax hich ahnimal ya xc'ax a te bin ut'il ya xbehen te ste'el sbuc'ulel te jalabile, soc mayuc smuc'ul yo'tan a ya xc'oht slajibal.

⁷Dios cu'un, na'a me te jahc' nax ta o'tanil te jcuxlejal, soc mayuquix bin ora ya yil xan jsit te bin leque.

⁸Te mach'atic ya yilonic, mayuc bin ora ya yiloniquix; yac at'ojan asit ta jtojol, ma ba cuxulonix a.

⁹Hich te bin ut'il ya xc'ax bahel te tocal, ha nix hich te mach'a ya xco bahel ta stsobojibal mach'atic chamenic, ma ba ya xmohix talel.

¹⁰Ma ba ya suhtix bahel ta sna; soc ma ba ya xna'bot sba yu'un te lugar yu'une.

¹¹Ha yu'un ma ba ya xquehchajon ta c'op, ya xc'opojon ta swocol te jch'uhlel, ya cal te bin ch'a ya ya'iy te jch'uhlele.

¹²¿Yu'un bal ho'on mar c'ohemon, o muc'ul chambahlamon bal yu'un mar, te hich yac awac'on ta ilel?

¹³C'alal hich ya cal: Ya smuc'ubtesbon q'uinal ya ca'iy te jwayib, ha ya scoltayon ta sc'asesel te ahcan cu'une, te xchihone,

¹⁴yac axiwteson ta wayichil, soc yac axiwteson ta nahal sitil.

¹⁵Ha yu'un ha lec xan la ca'iy te ya quich' pit'el te jnuc', soc te ya xlajon, te ma ba cuxul ya xhil te jbaquele.

¹⁶Ya quihlay te jcuxlejal, ma jc'an ya xcuxajon spisil ora. Ihquitayawon, como tojol ya xc'ax c'ahc'al cu'un.

¹⁷¿Bin a te ants-winic yu'un te ha muc' sc'oblal ya xc'oht awu'un, te awac'oj awo'tan ta stojol,

¹⁸te yac atsahtay awil ta jujun sab, soc te spisil ora yac apas ta prueba?

¹⁹¿Bin ora te q'uejel yac awac' asit ta jtojol, te jtuquel ya xhilon awu'un, scuenta yu'un yacuc xhu' ya jbic' te ya'lel que?

²⁰Teme la jta jmul, ¿bin la jcuts'inat a, ha'at te jcanan ants-winicat? ¿Bin yu'un yac apason ta blanco awu'un, te ho'onix ihc'atsilon cu'un ya ca'iy?

²¹¿Bin yu'un ma ba yac atup'bon te jc'axun-c'op soc yac apasbon perdón yu'un te jmule? Como yo'tic ya xwayon ta ts'u'lum; aunque yac alehon, ma ba cuxulonix a, xchi te Job.