Read Tzeltal Job 9 Bible Online

Job 9 - Tzeltal bible

Job 9

¹La sjac' te Job:

²Melel jna'oj te hich aye, pero ¿bin ut'il c'an yac' ta ilel te toj ay ta stojol Dios te winique?

³Teme ay mach'a ya sc'an ya stsal sba ta c'op soc, ma xhu' sutbel jp'ahluc ta jmil te hichuque.

⁴Ha p'ij yo'tan soc bayel yip yu'el, ¿mach'a a te ya c'an stsal, te lec ya xc'oht yu'un?

⁵Soc yilimba ya sbul loq'uel te witsiltic, ma sna'ic mach'a la shemts'un.

⁶Ha ya sloq'ues te bahlumilal ta yawil, soc ya ya'be snihc sba te yich'o-ip.

⁷Teme ya spas ta mandar te c'ahc'ale, ma ba ya xloc' talel, soc ha ya smac te eq'uetique.

⁸Ha nax stuquel ya slim bahel te ch'ulchan, soc ya xbehen ta stselet yip te mar.

⁹Ha la spas te Osa, te Cruz-ec' soc te Xana-ec', soc te yan jchahp eq'uetic te ayic ta sur.

¹⁰Ha ya spasticlan muc'ul jchahp a'teliletic te ma xhu' ta na'el, soc yutsil a'teliletic te ma xhu' ta ahtayel.

¹¹Teme ya xc'ax ta jts'ehl, ma ba ya quil, ya xc'ax pero ma ba ya ca'iy.

¹²Teme ay bin ya sloq'ues, ¿mach'a ya xhu' ya scom? ¿Mach'a ya xhu' ya sjoc'obe: ¿Bin yac apas? te xchihe?

¹³Te Dios ma ba ya suht te yilimba; ya spehc'an sbahic ta ye'tal yoc te mach'atic jun ayic soc Rahab.[4]

¹⁴¿Bin ut'il te ho'on ya xhu' ya sutbe sc'op, soc te ya jtsa c'opetic te ya cal ta stojol?

¹⁵Aunque tojon ta winiquil, ma xhu' ya jac'be; ha nax ya jc'ambe te juez cu'un te yacuc sna'bon yo'bolil jba.

¹⁶Aunque ya jc'opon soc ha ya sjac'bon te jc'ope, ma ba ya jch'uhun teme ya ya'iybon te jc'ope.

¹⁷Como ha ya slajinon ta tulan ic'al ha'al, soc ya yac' p'ohluc xan quehchen ta tojol nax;

¹⁸ma ba ya ya'bon quich' ic', ha ya ya'bon xut'ul q'uinal ya ca'iy.

¹⁹Teme ya calbetic sc'oblal te yipe, melel bayel yu'el stuquel; teme ya calbetic sc'oblal te chahpajele, ¿mach'a ya yic' talel?

²⁰Teme ya cal te tojon ta winiquil, ha nix te que ya yal te ay jmul; aunque lecon ta winiquil, ha me ya yal te jtahoj jmul.

²¹Aunque mayuc bin jpasoj, mayuc sc'oblal ya ya'iy; ¡ya quihlay te jcuxlejal!

²²Pajal nix spisil; ha yu'un hich ya cal: Pajal ya slajin te mach'a mayuc smul soc te mach'a ay smule, xchihon.

²³Teme ya xtal wocol te ora ya yac' lajel, ya stse'laybe swocol te mach'a mayuc smul.

²⁴Te q'uinal ya x'a'bot ta sc'abic te mach'atic chopolic, soc ha ya smacbe sit te juecetic yu'un. Teme ma ha'uc te Diose, ¿mach'a a?

²⁵C'ax hich ahnimal c'oht te c'ahc'aletic cu'un te bin ut'il te mach'a ya x'ahnimaj; ahnic bahel, ma ba la yilic te bin leque.

²⁶C'axic bahel hich te bin ut'il barcohetic te ahnimal ya xbehenic, hich te bin ut'il jxic te ya xco ta stsaquel swe'el.

²⁷Teme ya cal: Ya jch'ay ta co'tan te ahcan cu'une, ya quihquitay te smel-o'tan te jsit quelaw, ya stse'ejinon, teme xchihone,

²⁸ya to jxi' spisil te jwocole, yu'un ya jna' te ma ba yac awal te mayuc jmul.

²⁹Teme chicanix te ay jmul, ¿bin yu'un te tojol ya cac' fuersa?

³⁰Aunque ya jpoc jba ta ya'lel me'sic, soc ya jpoc jc'ab ta lejía,

³¹yac awac'on cohel ta ch'en, ha nix ya yihlayon te jc'u'e.

³²Te Dios ma winicuc hich te bin ut'il te ho'one, yu'un ya xhu' ya jsutbe sc'op, te junax ya xtalotic ta chahpajel.

³³Te ayuc mach'a[5] ya xtehc'aj yu'un yilbelotic, te ya yac' sc'ab ta jchebaltic,

³⁴te ya sloq'uesbon ta jtojol te xule, soc te manchuc ya xiwteson te xiwel yu'une.

³⁵Hich ma ba ya jxi' te ya jc'opon, como ma hichuc ayon ya ca'iy jba.