Read Tzeltal Salmos 10 Bible Online

Salmos 10 - Tzeltal bible

Salmos 10

¹[4] ¿Bin yu'un te namal ayat, Jehová, te yac anac' aba ta yorahil uts'inel?

²Ta scuenta stoybahil te mach'a chopol yo'tan ya snuts te pobre; ac'a schuc sba a te ta syac te spasoje.

³Te mach'a chopol yo'tan ya stoy sba yu'un te bin ya sc'an te yo'tane, ya yalbe lec sc'oblal te mach'a jbic'tal-o'tan, soc ya yihlay te Jehová.

⁴Te mach'a chopol yo'tan, ta scaj stoybahil ma ba ya sle te Diose; mayuc Dios ta spisil spensar.

⁵Spisil ora lec ya xloc' te bin ya spas; namal ya yil te chahpanel awu'un; ya slaban spisil te scontrataque.

⁶Hich ya yal ta yo'tan: Mayuc bin ora ya xyahlon, mayuc bin ora ya stahon wocol, xchi.

⁷Nojel ta ye bohlc'opetic, lotetic soc lo'loywanej; ta ye'tal yac' ay uts'inwanej soc bintic chopol.

⁸Ya snac' sba ta nopol tut pueblohetic; muquen ya smil te mach'a mayuc smul. Muquen ya yil te mach'a ma xhu' scoltaybel sba,

⁹hich ya snac' sba te bin ut'il choj ay ta ch'en, ya snac' sba yu'un ya stsac te pobre; ya stsac te pobre, ya yic' bahel soc stsacojibal.

¹⁰Ya swuhts'an sba, hich ya x'ipajic ta yehch'ac te ay yip tsobol mach'atic ma xhu' scanantaybel sbahic.

¹¹Ya yal ta yo'tan: Ya xch'ay ta yo'tan te Diose; ya smuc sit yelaw, mayuc bin ora ya yil, xchi.

¹²¡Hahchan, Jehová, hacha ac'ab! ¡Ma me xch'ay ta awo'tan te pobrehetique!

¹³¿Bin yu'un ya sp'aj Dios te mach'a chopole? Hich yaloj ta yo'tan: Ma ba yac awich'bon ta cuenta, xchi.

¹⁴Ha'at awiloj, yu'un yac awil te bintic chopol soc te uts'inel, yu'un yac awa'be stoj ta ac'ab. Ya yac' sba ta atojol te mach'a ma xhu' scanantaybel sba; ha'at jcoltaywanejat yu'un te me'ba'.

¹⁵¡Wac'beya sc'ab te mach'a chopol, a'beya castigo yu'un schopolil te mach'a chopol ha to c'alal ma ba chicanix!

¹⁶Te Jehová ha Ajwalil ta spisil ora soc ta sbahtel q'uinal; te nacionetic ya xch'ayic ta sq'uinalic.

¹⁷Jehová, yac awa'iybe bin ya sc'an yo'tanic te mach'atic peq'uelic, ha'at yac awa'be yip yo'tanic soc yac awa'iybe te sc'opique.

¹⁸Yac achahpan te me'ba' soc te mach'a ay ta uts'inel, scuenta yu'un ma ba ya yaq'uix xiwel yan buelta te ants-winic te ay ta scuenta te lumq'uinale.