Read Tzeltal Salmos 102 Bible Online

Salmos 102 - Tzeltal bible

Salmos 102

¹Ha te bin la yalbe Jehová te mach'a ay swocol, la ya'be sna' bin a te ay ta mel-o'tan yu'une. Jehová, a'iybon awa'iy te ya jc'oponat, ac'a c'ohtuc ta atojol te caw.

²Ma me xanac' asit awelaw ta jtojol te c'alal ayon ta wocol. Ac'a tal achiquin ta jtojol; jac'bon jc'op ta ora te c'alal ya jc'oponate.

³Como te c'ahc'aletic cu'un hich ya xtup' bahel te bin ut'il ch'ahil, soc te jbaquel hich yac ta tihlel te bin ut'il ac'al.

⁴Ehchenajem co'tan soc taquijem hich te bin ut'il ac; ha yu'un ya xch'ay ta co'tan te ya jwe' te pan cu'une.

⁵Ta scaj te ahcan cu'un slap'oj sba soc jbaquel te jnuhculele.

⁶Hich c'ohemon te bin ut'il hos ta jochol taquin q'uinal, hich te bin ut'il xcuj te ay ta jihnem ts'ahquetic.

⁷Ma xwayon, hichon te bin ut'il mut ta jol na te stuquel ay.

⁸Jujun c'ahc'al ya slabanonic te jcontratac; te mach'atic ya scontrahinonic chopol sc'oblal ya yalbonic te jbihile.

⁹Ha yu'un ya jwe' tan hich te bin ut'il pan, soc te bin ya cuch' capal soc ya'lel jsit,

¹⁰ta scaj awilimba soc sc'ahc'al awo'tan, como la alicon soc la ach'ojon bahel.

¹¹Te c'ahc'aletic cu'un hich ay te bin ut'il axinal te c'axel ay, ya xtaquijon hich te bin ut'il ac.

¹²Yan te ha'ate, Jehová, muc'ul ajwalilat sbahtel q'uinal; ayat ta na'el ta cajalcaj ts'umbalil.

¹³Ya me xhahchat soc ya me ac'uxultay te Sión, como ha yorahil te ya yich' c'uxultayel, c'ohtix yorahil.

¹⁴Como te a'batetic awu'un c'ux ta yo'tanic te tonetic yu'un Sión; ya sna'beyic yo'bolil sba te ts'ubil lum yu'une.

¹⁵Hich spisil te nacionetic ya me xi'ic te sbihil te Jehová, spisil te ajwaliletic ta q'uinal ya me xi'ic te awutsilal,

¹⁶como te Jehová ya me scha'pas xan te Sión, soc tey ya xchicnaj a te yutsilale.

¹⁷Ya me yich' ta cuenta te bin ya xhalbot yu'un te mach'atic mayuc bin ay yu'unic; ma ba ya sp'aj te ya xhalbot wocol yu'unique.

¹⁸Ya me yich' ts'ihbayel ini yu'un ya yilic te patil ts'umbalil, scuenta yu'un ya xhu' ya yalbeyic yutsil sc'oblal Jehová te mach'atic ya to x'ayinic bahel.

¹⁹Como te Jehová la yil tal ta toyol ta ch'ul awilal yu'un, c'alal ta ch'ulchan la yil tal ta bahlumilal

²⁰yu'un ya ya'iybe yahcan te jchuqueletic, yu'un ya yac' ta libre te mach'atic ac'bilic ta lajel;

²¹scuenta yu'un ya yich' puquel ta halel ta Sión te sbihil Jehová, soc te yutsil sc'oblal ta Jerusalén,

²²te c'alal ya stsob sbahic te pueblohetic soc te nacionetic yu'un ya sch'uhuntayic te Jehová.

²³Ha la slajimbon quip ta ohlil be, la spehc'ambon corahil.

²⁴Ha yu'un la jcal: ¡Dios cu'un, ma me j'ohliluc to nax ay jcuxlejal a te yac awic'on bahele! ¡Te ha'biletic awu'un ya xhalajic ta cajalcaj ts'umbalil! xchihon.

²⁵Ta shahchibal ha'at la awa'be yich'o-ip te bahlumilal, ha ya'tel ac'ab te ch'ulchane.

²⁶Ya xlajic stuquelic, yan te ha'ate atalel ayat; ta spisilic ya xpoco'ub hich te bin ut'il c'u'ul; yac ajeltay hich te bin ut'il c'u'ul, hich ya xhil awu'un.

²⁷Pero atalel ayat atuquel, te ha'biletic awu'un ma ba ya xlajic.

²⁸Te yal-snich'nab te a'batetic awu'un jun yo'tan ya x'ayinic; te sts'umbalic ya me yich' yipic ta atojol.