Read Tzeltal Salmos 103 Bible Online

Salmos 103 - Tzeltal bible

Salmos 103

¹Salmo yu'un David. Jch'uhlel, halbeya yutsil sc'oblal te Jehová; ta spisil co'tan halbeya yutsil sc'oblal te sch'ul bihil.

²Jch'uhlel, halbeya yutsil sc'oblal te Jehová, ma me xch'ay ta awo'tan junuc te bendición yu'une;

³ha te mach'a ya spasbat perdón yu'un spisil amul, soc ya slahmajtesbat spisil te chamel awu'un,

⁴ha te mach'a ya ya'bat ta libre acuxlejal ta hotbil ch'en, te bayel sc'uxul yo'tan ta atojol soc ya sna'bat yo'bolil aba,

⁵ha te ya snojesbat acuxlejal ta bin lec scuenta yu'un ya xqueremubat hich te bin ut'il jxic.

⁶Te Jehová toj bin ya spasbe soc stojil ya schahpan spisil te mach'atic ayic ta uts'inel.

⁷La ya'be sna' te Moisés te behetic yu'un, la ya'be sna' te snich'nab Israel te a'teliletic yu'une.

⁸Te Jehová ay sc'uxul yo'tan soc lec yo'tan, ma orahuc ya x'ilin, ay bayel sc'uxul yo'tan.

⁹Ma spisiluc ora ya yalbotic jmultic, soc ma ba stalel ya sq'uej ta yo'tan te yilimbahe.

¹⁰Ma ba la spasbotic hich te bin ut'il ya sc'an te bintic chopol jpasojtic, ma ba la ya'botic jtoj jmultic hich te bin ut'il ya sc'ane.

¹¹Como hich te bin ut'il stoyolil ch'ulchan ta stojol te bahlumilal, hich smuc'ul te sc'uxul yo'tan ta stojol te mach'atic ya x'ich'ot ta muc' yu'une.

¹²Hich te bin ut'il snamalil yiloj sbahic banti ya xloc' tal c'ahc'al soc te smahlib c'ahc'al, hich la snamijtes bahel te jc'axun-mandar cu'untique.

¹³Hich te bin ut'il te tatil ya sna'be yo'bolil sbahic te snich'nab, hich te Jehová ya sna'be yo'bolil sbahic te mach'atic ya x'ich'ot ta muc' yu'une,

¹⁴como ya sna' bin ut'il ayotic, ya sna' te ha ts'ubilumotic.

¹⁵Te scuxlejal te ants-winic hich ay te bin ut'il ac, ya xnichin hich te bin ut'il ha'mal ta q'uinal;

¹⁶ya xc'ax ic' ta stojol, ya xch'ay bahel, ma xna'botix sba yu'un te lugar yu'une.

¹⁷Yan te sc'uxul yo'tan Jehová sbahtel q'uinal ay ta stojol te mach'atic ya yich'ic ta muc', soc stojil bin ya spas ta stojol te cajalcaj yal-snich'nabic,

¹⁸ta stojol te mach'atic ya yich'ic ta cuenta te chapbil-c'op yu'un soc te ma sch'ay ta yo'tanic sch'uhunel spasel te mandariletic yu'une.

¹⁹Te Jehová yac'oj smuc'ul-huctajib ta ch'ulchan, soc ha scuentahinej spisil.

²⁰¡Halbeyahic yutsil sc'oblal Jehová, ha'ex ch'ul a'batetic yu'un, ha'ex te tulan awa'telic te yac apasic te bin ya yal, te yac ach'uhunic spasel te sc'ope!

²¹¡Halbeyahic yutsil sc'oblal Jehová, apisilic te a'batex yu'un, ha'ex te a'batex yu'un te yac apasic te bin ya sc'an yo'tan!

²²¡Halbeyahic yutsil sc'oblal Jehová, spisil te a'teliletic yu'un, ta spisil ban c'alal scuentahinej! ¡Jch'uhlel, halbeya yutsil sc'oblal te Jehová!