Read Tzeltal Salmos 105 Bible Online

Salmos 105 - Tzeltal bible

Salmos 105

¹¡Halbeyahic wocol te Jehová, c'oponahic ta sbihil; a'beyahic sna' te pueblohetic te a'teliletic yu'une!

²¡C'ayojtayahic, c'ayojtayahic c'ayojetic! Halbeyahic sc'oblal spisil te jchahp a'teliletic yu'une.

³Tse'eluc me awo'tanic yu'un te sch'ul bihile; tse'eluc me yo'tanic te mach'atic ya slehic te Jehová.

⁴Lehahic te Jehová soc te yu'ele; lehahic spisil ora te sit yelaw.

⁵Na'ahic me te yutsil a'teliletic spasoj, te jchahp a'teliletic soc te bin yaloj ta chahpanwanej,

⁶ha'ex te sts'umbalex Abraham te a'bat yu'un, te yal-snich'nabex Jacob te tsahbilex yu'une.

⁷Ha te Jehová, te Dios cu'untic; ay ta bayuc ta bahlumilal te chahpanel yu'une.

⁸Spisil ora ya sna' te chapbil-c'op yu'un, ha te c'op te la yal ta mandar yu'un jmil ta caj ts'umbalil,

⁹ha te c'op la schap soc Abraham, ha te bin yaloj ta jamal ta stojol Isaac.

¹⁰La ya'be Jacob scuenta halbil mandaril, te Israel scuenta chapbil-c'op scuenta sbahtel q'uinal,

¹¹te hich la yal: Ya ca'bat te sq'uinal Canaán ha te bin ya xc'oht ta acuenta te yac awich' hilel, te xchihe.

¹²C'alal mayuc tsobolic a, soc te ha jbehyometic tey a,

¹³te c'axic sohlel ta yantic nacionetic, ta stojol yantic ajwaliletic,

¹⁴Dios ma ba ac'otic ta uts'inel yu'un, soc ha ta scajic te la yalbe tulan mandar te ajwaliletic:

¹⁵Ma me xapiquic te mach'atic tsahbil cu'un, ma me xawuts'imbonic te jalwanejetic cu'un, te xchihe.

¹⁶La yac' taluc wi'nal ta q'uinal, la slajin spisil we'elil.

¹⁷La snahiltes bahel jtuhl winic ta stojolic, ha te José te la yich' chonel bahel ta mosohil.

¹⁸La yehchentesbeyic yacan ta cadena, la xojbeyic taq'uin ta snuc'.

¹⁹Ha to c'alal c'oht ta pasel te bin la yal, ha to c'alal chican te melel te bin la yal te Jehová.

²⁰Te ajwalil la sticon ta iq'uel soc la yac' ta libre, te ajwalil yu'un ants-winiquetic la yac' bahel ta libre.

²¹Ha la ya'be scuentahin te sna, ha ajwalil c'oht yu'un spisil bintic ay yu'un,

²²yu'un ya snohpteslan te príncipaletic yu'un hich te bin ut'il la sc'an yo'tan, soc ya ya'be snopic p'ijil-o'tanil te mamaletic yu'une.

²³Patil och ta Egipto te Israel; te Jacob ha jbehyom c'oht ta sq'uinal Cam.

²⁴Te Jehová la yac' te bayel p'ohl te pueblo yu'un, c'ax hich yip la ya'be a te bin ut'il te scontratac.

²⁵La syanijtesbe yo'tanic scuenta yu'un ya sp'ajic te pueblo yu'un, scuenta yu'un ya slo'loyic te a'batetic yu'une.

²⁶La sticon te Moisés te a'bat yu'un, soc te Aarón te tsahbil yu'une.

²⁷Ha'ic la spasic te jchahp a'teliletic yu'un ta stojolic, te yutsil a'teliletic yu'un ta sq'uinal Cam.

²⁸La sticon tal yihc'al q'uinal, ihc'ub q'uinal yu'un ta bayuc, ma ba la stoy sbahic yu'un te sc'ope.[28]

²⁹La sc'atp'un ta ch'ich' te ha'etic yu'unic, la slajimbe te schayule.

³⁰Noj ta xch'uch'etic te sq'uinalic, ochic c'alal ta swayib te ajwalil yu'unique.

³¹C'opoj, hich tal bayel hahetic soc usetic ta spahmal sq'uinalic.

³²La sticon bat scuenta sjelol ha'al, soc yat c'ahc' ta sq'uinalic.

³³La slajimbe sts'usubil soc higuerahetic, soc la slajimbe te te'etic ta sq'uinalic.

³⁴C'opoj, hich tal c'ulubetic, ma xhu' ta ahtayel yu'un yipal;

³⁵la slo'ic spisil ha'maletic ta sq'uinalic, la slajinic te sit te la yac' te sq'uinalique.

³⁶La slajinlan spisil te ba alaletic ta slumalic, te sba sit te yipique.

³⁷La yic' loq'uel te Israel soc plata soc oro, ta spisil ta chahp mach'atic ay yu'unic mayuc mach'a la sta falta.

³⁸Te Egipto tse'el yo'tan yu'un te loq'uic bahel, como tal xiwel ta stojolic.

³⁹Dios la slim bahel tocal scuenta smahquilic, soc la yac' c'ahc' yu'un ya sacubtes q'uinal ta ahc'abal.

⁴⁰La sc'an swe'elic, hich la sticombe xcuhch'inetic, soc la snojesbe sch'uhtic ta we'elil yu'un ch'ulchan.

⁴¹La sjam te muc'ul ton, loc' tal ha' tey a; oquin bahel ta jochol taquin q'uinal hich te bin ut'il muc'ul-ha';

⁴²como la sna' te sch'ul c'op te yaloj ta stojol te Abraham te a'bat yu'une.

⁴³Tse'el yo'tanic a la sloq'ues te pueblo yu'un, soc yutsil q'uinal la sloq'ues te mach'atic tsahbilic yu'une.

⁴⁴La ya'be te sq'uinalic te nacionetic, la yich'beyic hilel te ya'telic te ants-winiquetic,

⁴⁵scuenta yu'un ya sch'uhumbeyic spasel te chapbil mandariletic yu'un soc ya sc'ohtesic ta pasel te leyetic yu'une. ¡Aleluya!