Read Tzeltal Salmos 106 Bible Online

Salmos 106 - Tzeltal bible

Salmos 106

¹¡Aleluya! ¡Halbeyahic wocol te Jehová, como lec yo'tan; como sbahtel q'uinal ay te sc'uxul yo'tan!

²¿Mach'a ya xhu' yu'un yalel te muc' a'teliletic spasoj te Jehová? ¿Mach'a ya xhu' yu'un te ya yalbe yutsil sc'oblal?

³Bayel yutsilic te mach'atic ya spasic te bin toj, te spisil ora ya spasulanic te bin toj ta pasele.

⁴Na'awon, Jehová, te c'alal yac apasbe bin lec te pueblo awu'une; na'awon te c'alal yac acoltaylan,

⁵scuenta yu'un ya xhu' ya jmulan te bintic lec yu'un te mach'atic tsahbil awu'un, scuenta yu'un pajal tse'el co'tan soc te nación awu'un, te pajal yutsil q'uinal ya ca'iy soc te pueblo te ay ta acuenta.

⁶Jtahoj jmulcotic, hich te bin ut'il jme'jtatcotic; la jpascotic te bin chopol, la jpascotic te bin ma lecuc.

⁷Te c'alal ayic ta Egipto a te jme'jtatcotic, mayuc sc'oblal c'oht ta yo'tanic te yutsil awa'tel; ma ba la sna'ic te bayel sc'uxul awo'tan, la stoy sbahic ta sti'il te Mar Rojo.

⁸Pero Dios la scoltay ta scuenta yich'el ta muc' te sbihile, scuenta yu'un ya yac' ta na'el te yu'ele.

⁹La yalbe tulan mandar te Mar Rojo, hich taquij; la yac' te hich c'axic ta sc'ubulil te mar te bin ut'il ta jochol taquin q'uinal.

¹⁰La scoltay loq'uel ta sc'ab te scontratac, la yac'ticlan ta libre ta sc'ab te j'uts'inwanej.

¹¹Mucotic ta ha' te scontratac; ¡mayuc jtuhluc cuxul hilic!

¹²Hich la sch'uhunic te bintic yaloj te Diose, soc la sc'ayojtaybeyic yutsil sc'oblal.

¹³Pero ora nax ch'ay ta yo'tanic te a'teliletic yu'un, ma ba la smahliyic te bintic ya xhalbotic yu'une.

¹⁴Ta jochol taquin q'uinal la yac' sbahic ta spasel te bintic la sc'an yo'tanic, la stsajic te Dios ta jochol q'uinal.

¹⁵Hich Dios la ya'be te bin la sc'anic; pero la sticombe tal lajinwanej chamel.

¹⁶Ta campamento la sbic'tal-o'tantayic te Moisés soc te Aarón, te mach'a ch'ultesbil yu'un Jehová.

¹⁷Ha yu'un la sjam sba te lumq'uinal, la sbic' cohel te Datán, la smuc te swinictac Abiram.

¹⁸Tihl c'ahc' ta stojol ta mach'atic la st'unic; laj ta chiq'uel te mach'atic chopolique.

¹⁹La spasic jcolel toro ta Horeb, la sch'uhuntayic te uhltesbil loc'omba.

²⁰La sc'atp'unic te yutsilal Dios ta sloc'omba toro te ya swe' ac.

²¹Ch'ay ta yo'tanic te Dios te Jcoltaywanej yu'unic, te muc' bin spasoj ta Egipto,

²²te yutsil a'teliletic ta sq'uinal Cam, te bintic yan yilel ta pasel ta Mar Rojo.

²³Ha yu'un la yal te Dios te ya slajinlan te manchuc tehc'aj yu'unic ta stojol Dios te Moisés, te tsahbil yu'un, scuenta yu'un ma ba ya xlajinotic yu'un te yilimbahe.

²⁴Patil la yihlayic te lumq'uinal te buen t'ujbil; ma ba la sch'uhunic te bin la yal te Diose.

²⁵Hahchic wulajanel ta snahilpaq'uic, ma ba la sch'uhumbeyic sc'op te Jehová.

²⁶Ha yu'un la stoy mohel sc'ab ta yalel ta jamal te ya yac' lajuquic hilel ta jochol taquin q'uinal,

²⁷soc ya yac' yahluquic te sts'umbalic ta yohlil te nacionetic soc ya spucticlan bahel ta yantic q'uinaletic.

²⁸Jun la yac' sbahic soc te Baal-peor soc la sti'beyic smahtan ti'bal te diosetic te ma cuxuluque.

²⁹La shachbeyic yilimba te Jehová ta scuenta chopol ya'telic, hich puhc jmilawal-chamel ta yohlilic.

³⁰Pero te Finees la stehc'an sba, la spas te bin stojil, hich quehchaj te jmilawal-chamel.

³¹Hich toj c'oht ta scuenta ta cajalcaj bahel ta spisil ora.

³²Soc ha nix hich la yaq'uic ilinuc Dios ta ti' ha'etic yu'un Meriba; ha ta scajic te ma lecuc c'oht ta loq'uel te Moisés;

³³como la yaq'uic bohlobuc yo'tan, hich ora la yal te bin ma ba nopbil yu'une.

³⁴Ma ba la slajinic te pueblohetic te halbotic yu'un Jehová te ya me slajinic;

³⁵la scap sbahic soc te nacionetic soc la snopbeyic stalelic.

³⁶La sch'uhuntayic te loc'ombahetic yu'unic, te ha sjinojibal c'ohtic yu'unic.

³⁷La ya'beyic ta milbil mahtanil te pucujetic te queremetic soc ach'ixetic yu'unic.

³⁸La smalbeyic sch'ich'el mach'a mayuc smul, ha te sch'ich'elic te querem soc ach'ixetic yu'unic, ha te la yaq'uic ta milbil mahtanil ta stojol te loc'ombahetic yu'un Canaán; bohlob te q'uinal yu'un te sch'ich'elique.

³⁹Hich la sbohlobtes sbahic ta scuenta te bintic la spasic, la yantsin sbahic ta scuenta te ya'telique.

⁴⁰Ha yu'un tihl yilimba te Jehová ta stojol te pueblo yu'un, la sp'aj te bin ay yu'une;

⁴¹la yac'ticlan ta c'abal yu'un te nacionetic, hich cuentahinotic yu'un te mach'atic p'ajbil yu'unique.

⁴²Uts'inotic yu'un te scontratac soc pehc'anotic ta scuenta te yipique.

⁴³Bayel buelta coltayotic ta libre yu'un Dios, pero la scontrahinic te bin a'bot sna'ic yu'un, hich pehc'anotic ta scaj schopolic.

⁴⁴Pero ilotic yu'un Dios te c'alal ay swocolic, la ya'iybe yawic;

⁴⁵la sna' xan te chapbil-c'op yu'un ta stojolic, hich la sut sc'op ta scaj te bayel sc'uxul yo'tan.

⁴⁶Ha la yac' te ya xc'uxultayotic yu'un spisil mach'atic chucotic yu'un.

⁴⁷Coltayawotcotic, Jehová, Dios cu'untic, tsobawotcotic loq'uel ta yohlil te nacionetic, scuenta yu'un ya calcotic wocol ta stojol ach'ul bihil, soc scuenta yu'un ay yutsil co'tancotic ta yalel yutsil ac'oblal.

⁴⁸Bayel me yutsil te Jehová, te Dios yu'un Israel, ta spisil ora ta sbahtel q'uinal. Hich ac'a yal spisil te pueblo: ¡Hichuc! ¡Aleluya!