Read Tzeltal Salmos 107 Bible Online

Salmos 107 - Tzeltal bible

Salmos 107

¹Halbeyahic wocol te Jehová, como lec yo'tan, sbahtel q'uinal ay te sc'uxul yo'tane.

²Hich ac'a yalic te mach'atic coltayotic yu'un Jehová, ha te mach'atic coltayotic ta sc'ab yu'un te scontrahic,

³ha te mach'atic la stsob tal ta yantic q'uinaletic, ta stojol banti ya xloc' tal c'ahc'al soc ta stojol smahlib c'ahc'al, ta stojol norte soc ta stojol sur.

⁴Ay howiyic ta behel ta jochol taquin q'uinal, ma ba la stahbeyic sbehlal junuc pueblo te banti ya xhu' ya xnahinic.

⁵Ay swi'nalic soc ay staquinti'ilic jujuteb ma xchamic yu'un.

⁶Ha yu'un la yawtayic te Jehová te c'alal ayic ta wocol, hich coltayotic yu'un swocolic.

⁷La stojobteslan bahel ta toj be ta sbehlal jun pueblo te banti ya xhu' ya xnahinique.

⁸¡Ac'a yalbeyic bayel wocol te Jehová yu'un te sc'uxul yo'tan soc te yutsil ya'tel ta stojol te ants-winiquetique!

⁹Como ha ya yahts'esbe yo'tanic te mach'atic taquin yo'tanic, soc ya ya'be bayel bintic lec te mach'atic ay swi'nalic.

¹⁰Ay nahinic ta yihc'al q'uinal soc ta yaxinal lajel, ay swocolic ta chuquel ta cadena,

¹¹ta scaj te la stoy sbahic ta stojol te sc'op te Jehová, la sp'ajic te bin a'bot sna'ic yu'un te Mach'a mero toyol ay.

¹²Ha yu'un Dios la ya'be swocolic ta tulan a'tel; yahlic, mayuc mach'a coltayotic yu'un.

¹³Patil la yawtayic te Jehová, hich coltayotic loq'uel yu'un swocolic.

¹⁴La sloq'ueslan ta yihc'al q'uinal soc ta yaxinal lajel, soc la stuch'ticlambe te cadenahetic te chuculic a.

¹⁵¡Ac'a yalbeyic bayel wocol te Jehová yu'un te sc'uxul yo'tan soc te yutsil ya'tel ta stojol te ants-winiquetique!

¹⁶yu'un la swuyticlan puertahetic pasticlambil ta bronce, soc la swac'ticlan te sc'atal taq'uinetique.

¹⁷Ay la sta swocolic te mach'atic ma sna'ic q'uinal ta scaj te behenic ta be yu'un toybahil soc ta scaj schopolilic;

¹⁸t'ixbot yo'tanic yu'un spisil we'eliletic, c'ohtic ta puertahetic yu'un lajel.

¹⁹Pero la yawtayic te Jehová, hich coltayotic loq'uel yu'un swocolic.

²⁰Ha la sticon tal sc'op, la slecubteslan; la scoltay loq'uel ta jinel yu'unic.

²¹¡Ac'a yalbeyic bayel wocol te Jehová yu'un te sc'uxul yo'tan soc te yutsil ya'tel ta stojol te ants-winiquetique!

²²Ac'a ya'beyic milbil mahtaniletic scuenta yalel wocol, soc bayeluc me yutsil yo'tanic ac'a yalbeyic yutsil ya'tel.

²³Ay mach'atic cohic bahel ta mar ta barco ta chombajel soc mambajel ta muc'ul-ha'etic.

²⁴Yilbeyejic te ya'tel te Jehová, te yutsil ya'tel ta sc'ubulil mar,

²⁵como ha c'opoj, hich la shach tulan ic' te la stoybe hahchel yip sbehel te ha'e.

²⁶Mohic c'alal ta ch'ulchan, cohic c'alal ta sc'ubulil mar; ch'ay yo'tanic yu'un swocolic.

²⁷Xhanlajanic hich te bin ut'il jyacubeletic; mayuc stuc c'oht te bintic ya sna'ique.

²⁸Hich la yawtayic te Jehová, hich coltayotic loq'uel yu'un swocolic.

²⁹La sc'atp'un ta c'unil ic' te tulan iq'ue, hich lahmaj yip te mar.

³⁰Tse'el yo'tanic te c'alal lahmaj te ha'e, hich la stojobteslan bahel ta banti yo'tanuc ya xbahtic.

³¹¡Ac'a yalbeyic bayel wocol te Jehová yu'un te sc'uxul yo'tan soc te yutsil ya'tel ta stojol te ants-winiquetique!

³²Ac'a stoybeyic sc'oblal ta tsoblej yu'un te pueblo, ac'a yalbeyic yutsil sc'oblal ta tsoblej yu'un te mamaletique.

³³Te Jehová ya sc'atp'un ta jochol taquin q'uinal te muc'ul-ha'etic, soc ya sc'atp'un ta taquin q'uinal te sloq'uib-ha'etique;

³⁴te lequil q'uinal ya sc'atp'un ta mayuc bin ya xcol a, ta scaj schopolilic te mach'atic nahinemic tey a.

³⁵Ya sc'atp'un ta pamal ha' te jochol taquin q'uinal, ya sc'atp'un ta sloq'uib-ha'etic te taquin lumq'uinal.

³⁶Tey ya yac' nahinuc a te mach'atic ay swi'nalic, ya shachic jun pueblo banti ya xnahinic.

³⁷Ya ya'iyic ts'umbajel, ya sts'un sts'usubilic, bayel sit ya yac'.

³⁸Dios ya ya'be bendición, c'ax bayel ya xp'ohlic, soc ma ba ya yac' te ya xpehc'aj te wacaxetic yu'unique.

³⁹Patil ya xpehc'aj yahtalul soc ya xpehc'anotic ta scaj uts'inel, wocol soc mel-o'tan.

⁴⁰Dios ya yihlay te príncipaletic soc ya yac' te xyahl xmo ya xbehenic ta jochol taquin q'uinal te mayuc behetic tey a.

⁴¹Pero ya slic mohel ta swocolic te pobrehetic soc ya yac' p'ohluc sts'umbalic hich te bin jtsohb tuminchijetic.

⁴²Te mach'atic toj yo'tanic ya yilic, tse'el yo'tanic; yan te mach'atic chopolic, ya smac yehic yu'un.

⁴³Te mach'a ay sp'ijil yo'tan, ac'a yac' ta yo'tan ini, soc ac'a sna' te smuc'ul sc'uxul yo'tan te Jehová.