Read Tzeltal Salmos 111 Bible Online

Salmos 111 - Tzeltal bible

Salmos 111

¹¡Aleluya! Ya calbe yutsil sc'oblal Jehová ta spisil co'tan ta banti stsoboj sbahic mach'atic toj yo'tanic, ta muc'ul tsoblej.

²Muq'uic te a'teliletic yu'un Jehová, tsahtaybilic yu'un spisil mach'atic ya smulanic.

³C'ax t'ujbil soc bayel yutsil te a'teliletic yu'un, soc te toj yo'tan sbahtel q'uinal ay.

⁴La yac' te ma xch'ay ta o'tanil te yutsil ya'tel; lec yo'tan te Jehová soc ya sna' c'uxultaywanej.

⁵Ha ya ya'be swe'elic te mach'atic ya yich'ic ta muc'; spisil ora ya sna' te chapbil-c'op yu'une.

⁶La ya'be yil te pueblo yu'un te yip te a'teliletic yu'une, ha te la ya'be yich'ic sq'uinalic te nacionetique.

⁷Te a'teliletic ya spas ta sc'ab ha smelelil soc stojil; spisil te mandariletic yu'un ya yac' smuc'ul-o'tanil;

⁸stalel ayic sbahtel q'uinal, chahpambilic ta smelelil soc stojil ayic.

⁹Dios la yac' te ya xcol ta libre te pueblo yu'un; la yac' te sbahtel q'uinal ay te chapbil-c'op yu'une. ¡Ch'ultesbil soc xiweltic sba te sbihile!

¹⁰Te shahchibal te p'ijil-o'tanil ha te yich'el ta muc' te Jehová; spisil te mach'atic ya spasic te mandariletic yu'un ya sna'ic q'uinal ta lec. ¡Ay ta halbeyel yutsil sc'oblal sbahtel q'uinal!