Read Tzeltal Salmos 113 Bible Online

Salmos 113 - Tzeltal bible

Salmos 113

¹¡Aleluya! A'batetic yu'un Jehová, halbeyahic yutsil, halbeyahic yutsil sbihil te Jehová.

²Bayeluc me yutsil sbihil te Jehová, ta ora ini soc ta sbahtel q'uinal.

³C'alal ta sloq'uib c'ahc'al ha to ta smahlib c'ahc'al, ac'a yich' halbeyel yutsil sc'oblal te sbihil Jehová.

⁴Te Jehová toyol ay yu'un spisil te nacionetic, c'ax hich yutsilal a te bin ut'il te ch'ulchane.

⁵¿Mach'a pajal soc te Jehová te Dios cu'untic, te hucul ta toyol,

⁶te ya spehc'an sba ta yilel te ch'ulchan soc te bahlumilale?

⁷Ha ya shach ta ts'u'lum te pobre, ya shach ta stanul c'ahc' te mach'a mayuc bin ay yu'un,

⁸yu'un ya yac' huhcajuc soc te príncipaletic, te príncipaletic yu'un te pueblo yu'unique.

⁹Ya yac' te ya xnahin ta sna te jma'al, soc te tse'el yo'tan te ay yalatac. ¡Aleluya!