Read Tzeltal Salmos 115 Bible Online

Salmos 115 - Tzeltal bible

Salmos 115

¹Ma ha'uc ta jtojolcotic, Jehová, ma ha'uc ta jtojolcotic, pero ta atojol ac'a yich' halbeyel yutsil sc'oblal te abihil, ta scaj te sc'uxul awo'tan soc te stalel jun awo'tan ta jtojolcotic.

²¿Bin yu'un hich ya yalic te nacionetic: ¿Banti ay te Dios yu'unic? te xchihique?

³¡Te Dios cu'untic ay ta ch'ulchan; ha la spas spisil te bintic la sc'an yo'tan!

⁴Te loc'ombahetic yu'un te yantic pasbilic ta plata soc ta oro, ha ya'tel sc'ab winiquetic.

⁵Ay yehic, pero ma xc'opojic; ay sitic, pero ma xyilic q'uinal;

⁶ay schiquinic, pero ma xya'iyic c'op; ay sni'ic, pero ma xyich'ic ic';

⁷ay sc'abic, pero mayuc bin ya stsaquic; ay yoquic, pero ma xbehenic; soc ma xc'opojic ta snuq'uic.

⁸Te mach'atic la spasic te loc'ombahetic pajal c'ohemic soc, ha nix hich spisil te mach'atic ha ya smuc'ulin yo'tanic.

⁹Israel, ¡ac'a smuc'ulin awo'tan te Jehová! Ha jcoltaywanej soc ha mahquilal awu'unic.

¹⁰Sna Aarón, ¡ac'a smuc'ulin awo'tanic te Jehová! Ha jcoltaywanej soc ha mahquilal awu'unic.

¹¹Ha'ex te awich'ojic ta muc' te Jehová, ¡ac'a smuc'ulin awo'tanic! Ha jcoltaywanej soc ha mahquilal awu'unic.

¹²La sna'otic te Jehová, ya me ya'botic bendición. Ya me ya'be bendición te sna Israel, ya me ya'be bendición te sna Aarón,

¹³ya me ya'be bendición te mach'atic ya yich'ic ta muc' te Jehová, muc' biq'uit.

¹⁴Te Jehová ac'a yac' p'ohluc ats'umbalic, ha'ex soc te awal-anich'nabique.

¹⁵Ac'a ya'beyex bendición te Jehová, te spasoj ch'ulchan soc bahlumilal.

¹⁶Yu'un Jehová te ch'ulchan, ha la ya'be te ants-winiquetic te lumq'uinale.

¹⁷Ma ha'uc te mach'atic chamenic te ya yalbeyic yutsil sc'oblal te Jehová, ma ha'uc te mach'atic ya xcohic bahel ta ch'abal q'uinal;

¹⁸pero ho'otic te ya calbetic yutsil sc'oblal te Jehová ta ora ini soc ta sbahtel q'uinal. ¡Aleluya!