Read Tzeltal Salmos 116 Bible Online

Salmos 116 - Tzeltal bible

Salmos 116

¹C'ux ta co'tan te Jehová yu'un la ya'iybon jc'op soc te bintic la jc'ambe,

²como la yac' tal schiquin; ha yu'un ya jc'opon te jayeb c'ahc'al cuxulon.

³La sjoytayon ta chuquel te slazohil lajel, la stahon te tulan mel-o'tan yu'un te muquenal, la jta wocol soc mel-o'tan.

⁴Hich la jc'opon ta sbihil Jehová: ¡Jehová, coltaybon jcuxlejal! xchihon.

⁵Te Jehová lec yo'tan soc toj yo'tan; bayel sc'uxul yo'tan te Dios cu'untique.

⁶Te Jehová ya scanantay te mach'atic peq'uel ayic; te c'alal lajem te quip, la scoltayon.

⁷¡Cuxa awo'tan yan buelta, jch'uhlel, como lec bin la spasbat te Jehová!

⁸Como ha'at la acoltaybon loq'uel ta lajel te jch'uhlel, la awac'on ta libre yu'un oq'uel soc te ma xbilts'uj te coque.

⁹Ya xbehenon ta stojol Jehová ta yohlil mach'atic cuxajtic ta q'uinal.

¹⁰La sch'uhun co'tan, ha yu'un c'opojon, te c'alal ay bayel jwocol.

¹¹Te bin ut'il ayon ta wocol hich la jcal: Spisil ants-winiquetic ha jlotetic, xchihon.

¹²¿Bin ut'il ya xhu' ya jtojbe te Jehová yu'un spisil te bintic lec la spasbon?

¹³Ya jtoy mohel te copa yu'un colel soc ya jc'opon ta sbihil Jehová.

¹⁴Ya jpas te bintic caloj ta stojol Jehová ta stojol spisil te pueblo yu'une.

¹⁵Bayel sc'oblal ta stojol Jehová teme ya xcham te mach'atic yu'un te ch'uhltesbilic.

¹⁶Jehová, ho'on awa'baton ta mero melel; ho'on awa'baton, yalon te awa'bat-antse. Ha'at la atuch'bon te cadena te chuculon a.

¹⁷Ya me ca'bat milbil mahtanil scuenta yalel wocol soc ya jc'opon te Jehová ta scuenta sbihil.

¹⁸Ya jpas te bintic caloj ta stojol Jehová ta stojol spisil te pueblo yu'un,

¹⁹ta amaq'uetic yu'un te sna Jehová, ta awohlil, ha'at Jerusalén. ¡Aleluya!