Read Tzeltal Salmos 118 Bible Online

Salmos 118 - Tzeltal bible

Salmos 118

¹Halbeyahic wocol te Jehová, como lec stuquel, sbahtel q'uinal ay te sc'uxul yo'tan.

²Hich ac'a yal te Israel: Sbahtel q'uinal ay te sc'uxul yo'tan.

³Hich ac'a yal te sna Aarón: Sbahtel q'uinal ay te sc'uxul yo'tan.

⁴Te mach'atic ya yich'ic ta muc' te Jehová ac'a yalic: Sbahtel q'uinal ay te sc'uxul yo'tan, ac'a xchihuquic.

⁵Te c'alal ayon ta wocol, la jc'opon te Jehová, la sjac'bon jc'op, hich la yac'on ta libre.

⁶Sjoquinejon te Jehová; ma xiwon. ¿Bin ya xhu' ya spasbon te winique?

⁷Sjoquinejon te Jehová, ha ya scoltayon stuquel. Ya me quil te ya yich' tsalel te mach'atic ya sp'ajonique.

⁸Ha lec xan te ya smuc'ulin co'tantic te Jehová, te bin ut'il te ya smuc'ulin co'tantic te winique.

⁹Ha lec xan te ya smuc'ulin co'tantic te Jehová, te bin ut'il te ya smuc'ulin co'tantic te mach'atic tulan ya'telique.

¹⁰Spisil te nacionetic la sjoytayonic, pero ta scuenta sbihil te Jehová la jlajinlan.

¹¹Jc'axel la sjoytayonic, pero ta scuenta sbihil Jehová la jlajinlan.

¹²La sjoytayonic hich te bin ut'il schanul chab, pero ora tup'ic hich te bin ut'il ya xc'ahc' ch'ixetic; ta scuenta sbihil Jehová la jlajinlan.

¹³La scotp'inonic yu'un ya xyahlon, pero la scoltayon te Jehová.

¹⁴Ha quip soc ha jc'ayoj te Jehová; ha jcoltaywanej cu'un.

¹⁵Ay aw yu'un yutsil q'uinal soc yu'un colel ta snahilpac' te mach'atic toj yo'tanic; hich ya yalic: La ya'iy tsalaw te swa'el-c'ab te Jehová.

¹⁶Te swa'el-c'ab Jehová toyol ay; te swa'el-c'ab Jehová la ya'iy tsalaw, xchihic ta aw.

¹⁷Ma ba ya xchamon, ya me xcuxajon soc ya me jpuc ta halel te a'teliletic yu'un te Jehová.

¹⁸Te Jehová tulan la ya'bon castigo, pero ma ba la yac'on ta lajel.

¹⁹¡Jambonic te ochibaletic yu'un te bin toj ta pasel; ya x'ochon bahel ta yalbeyel wocol Jehová tey a!

²⁰Ha ini te ochibal yu'un Jehová, tey ya x'ochic bahel a te mach'atic toj yo'tanic.

²¹Ya calbat wocol yu'un la ajac'bon te jc'ope, soc ha'at jcoltaywanejat cu'un c'ohat.

²²Te ton te ch'ayot hilel yu'un te jpas-nahetic ha yich'o-ip xuhc na c'oht.

²³Ha ya'tel Jehová ini, buen t'ujbil ya quiltic.

²⁴Ha c'ahc'al ini te spasoj te Jehová; tse'eluc me co'tantic soc ayuc me yutsil co'tantic yu'un.

²⁵Jehová, awocoluc, coltayawotcotic; awocoluc, Jehová, ac'a te lec ya xc'ohotcotique.

²⁶¡Bayel yutsil te mach'a ya xtal ta scuenta te sbihil Jehová! C'alal ta sna Jehová ya ca'beyex bendición.

²⁷Ha Dios stuquel te Jehová, ha la sacubtes q'uinal ta jtojoltic. Ich'ahic bahel sc'ab te'etic scuenta spasel q'uin, behenanic bahel c'alal ta xulubiletic yu'un te scajtajib smahtan Dios.

²⁸Ha'at Diosat cu'un, ya calbat wocol; Diosat cu'un, ya calbat yutsil ac'oblal.

²⁹Halbeyahic wocol te Jehová, como lec stuquel, sbahtel q'uinal ay te sc'uxul yo'tan.