Read Tzeltal Salmos 119 Bible Online

Salmos 119 - Tzeltal bible

Salmos 119

¹[32] Bayel me yutsil te mach'atic toj ya xbehenic, te st'unojic te ley yu'un Jehová.

²Bayel me yutsil te mach'atic ya sch'uhunic spasel te testigo-c'op yu'un soc te spisil yo'tanic ya slehic;

³mayuc bin chopol ya spasic, ya st'unic te behetic yu'une.

⁴Ha'at awaloj te ts'acal ya me yich' ch'uhunel te mandariletic awu'une.

⁵Co'tanuc te jun co'tan ya jch'uhun spasel te mandariletic awu'une.

⁶Hich ma ba ya jta q'uexlal te c'alal ya jna'ulan spisil te mandariletic awu'une.

⁷Soc toj co'tan ya calbat yutsil ac'oblal te c'alal ya jnop te bintic toj chahpambil awu'une.

⁸¡Ya me jpas te halbil mandariletic awu'un! ¡Ma me jc'axeluc xapihteson!

⁹¿Bin ut'il lec ya xc'oht te sbe te quereme? Ha te ya spas te bin ya yal te ac'ope.

¹⁰Ta spisil co'tan ya jlehat; ma xawac' te ya xhowiyon ta stojol te mandariletic awu'une.

¹¹Cac'oj ta co'tan te ac'op scuenta yu'un ma ba ya jta jmul ta atojol a.

¹²¡Bayel me awutsil, ha'at Jehová; a'bon jnop te halbil mandariletic awu'une!

¹³Ya cal ta que spisil te bintic la achapticlan te loc' ta awe.

¹⁴Tse'el co'tan yu'un te be yu'un te mandariletic awu'un, c'ax hich a te bin ut'il spisil c'ulejaliletic.

¹⁵Ya me jna'ulan te mandariletic awu'un, ya me jnop bin ut'il ay te behetic awu'une.

¹⁶Tse'el co'tan yu'un te halbil mandariletic awu'un, ma ba ya xch'ay ta co'tan te ac'ope.

¹⁷Pasbeya bin lec te a'bat awu'un, yu'un hich ya xcuxajon soc hich ya jch'uhumbat te ac'ope.

¹⁸Jambon jsit yu'un ya quil te yutsilal ta Ley awu'une.

¹⁹Jbehyemon ta q'uinal; ma me xanac' ta jtojol te mandariletic awu'une.

²⁰Pich'il co'tan yu'un sc'anel spisil ora te c'op chahpambil awu'une.

²¹Ha'at yac awut te mach'atic stoyoj sbahic, te chopol sc'oblalic, te ya xhowiyic ta stojol te mandariletic awu'une.

²²Loq'uesbon bahel ta jtojol te chopol c'op soc te ihlaywanej, como ya jch'uhun spasel te testigo-c'opetic awu'une.

²³Te príncipaletic la shuhcan sbahic, la scontrac'optayonic, pero te a'bat awu'un la sna'ulan te mandariletic awu'une.

²⁴Ya jmulan te mandariletic awu'un, ha j'ac'-o'taniletic cu'un.

²⁵Pacalonix ta ts'u'lum; a'bon jcuxlejal hich te bin ut'il awaloj.

²⁶La jca'batix awil te behetic cu'un, la ajac'bon jc'op; a'bon jnop te halbil mandariletic awu'une.

²⁷A'bon jna' te sbehlal te mandariletic awu'un, hich ya jna'ulan te yutsil a'teliletic awu'une.

²⁸Ya xch'ay bahel te jch'uhlel yu'un te mel-o'tan; a'bon quip hich te bin ut'il awaloj.

²⁹Ma xawac'on ta sbehlal lot; ta scuenta sc'uxul awo'tan a'bon jnop te Ley awu'une.

³⁰Jtsahojix te sbehlal te smelelil c'op; cac'oj ta jtojol te bintic chahpambil awu'une.

³¹Slac'ojon te testigo-c'op awu'un, Jehová; ma me xawac'on ta q'uexlal.

³²Ya x'ahnimajon ta be yu'un te mandariletic awu'un, como yac awa'bon tse'el co'tan.

³³nohptesawon, Jehová, te be yu'un te halbil mandariletic awu'un, hich ya jc'ohtes ta pasel c'alal ta slajibal.

³⁴Ac'a c'ohtuc ta co'tan, hich ya jch'uhun spasel te ley awu'un, ya jc'ohtes ta pasel ta spisil co'tan.

³⁵Tojobtesawon bahel ta sbehlal te mandariletic awu'un, yu'un ha ya jmulan.

³⁶Ac'a te ha ya sc'an co'tan te testigo-c'op awu'un, ma ha'uc te bic'tal-o'tanil.

³⁷Ma me xawac' te ya quil te bintic tojol nax ay; a'bon jcuxlejal yu'un st'unel te be awu'une.

³⁸Ac'a c'ohtuc ta pasel te bin awalbeyej te a'bat awu'un, yu'un ya jxi'at.

³⁹Loq'uesbon ta jtojol te chopol c'op te ya xiwon yu'un, como lequic te bintic achapoje.

⁴⁰Mero sc'anoj co'tan te mandariletic awu'un; ta scuenta stojil bin yac apas a'bon jcuxlejal.

⁴¹Ac'a taluc ta jtojol te sc'uxul awo'tan, Jehová; ha te colel awu'un hich te bin ut'il awaloj ta jamal;

⁴²hich me ya xhu' cu'un sutbeyel sc'op te mach'a ya yil-o'tantayon, yu'un ha smuc'ulinej co'tan te ac'ope.

⁴³Ma me xaloq'uesbon ta que te smelelil ac'op, como ha smuc'ulinej co'tan te bintic awaloje.

⁴⁴Spisil ora ya me jch'uhun spasel te ley awu'un, ta sbahtel q'uinal.

⁴⁵Libre ya xbehenon, como la jle te mandariletic awu'une.

⁴⁶Ya me cal ta stojol ajwaliletic te testigo-c'op awu'un, ma ba ya xq'uexawon yu'un;

⁴⁷como ya smulan co'tan te mandariletic awu'un, te ha c'ux ya ca'iy ta co'tan.

⁴⁸Ya jtoy jc'ab ta stojol te mandariletic awu'un, te c'ux ta co'tan, soc ya jna'ulan te halbil mandariletic awu'une.

⁴⁹Na'a me te ac'op la awalbe te a'bat awu'un, te la awa'bon smuc'ulin co'tane.

⁵⁰Te bin ya smuc'ubtesbon co'tan te c'alal ayon ta wocol, ha te ya ya'bon jcuxlejal te bintic awaloje.

⁵¹Te mach'atic stoyoj sbahic bayel ya slabanonic, pero ma ba ya quihquitay te ley awu'une.

⁵²Ya jna', Jehová, te bintic la achap ta namey, ha ya smuc'ubtesbon co'tan.

⁵³Mero ilinon yu'un te mach'atic chopolic, te ya yihquitayic te ley awu'une.

⁵⁴Ha c'ayojetic cu'un te halbil mandariletic awu'un ta banti c'axel nax ayone.

⁵⁵Ya jna'bat abihil ta ahc'abal, Jehová, ya me jc'ohtes ta pasel te ley awu'une.

⁵⁶Te bin ay ta jcuenta spasel, ha te ya jch'uhun spasel te mandariletic awu'une.

⁵⁷Te bin ay cu'un, ha'at Jehová, calojix ta jamal te ya jch'uhun spasel te ac'ope.

⁵⁸Ta spisil co'tan la jlehbat asit awelaw; c'uxultayawon hich te bin ut'il awaloj ta jamal.

⁵⁹La jnop ta co'tan bin yilel te behetic cu'un, hich suhton tal ta stojol te testigo-c'op awu'une.

⁶⁰Ya jsuj jba, ora nax ya jpas te mandariletic awu'une.

⁶¹La sjoytayonic ta syaquic te mach'atic chopol yo'tanic; pero ma ba ya xch'ay ta co'tan te ley awu'une.

⁶²Ta ohlil ahc'abal ya xhahchon ta yalel wocol ta atojol yu'un te toj bintic achapoje.

⁶³Ha jmohlol spisil te mach'atic ya xi'at, te ya sch'uhunic spasel te mandariletic awu'une.

⁶⁴Jehová, nojel ta sc'uxul awo'tan te lumq'uinal; a'bon jnop te halbil mandariletic awu'une.

⁶⁵Lec te bin la apasbe te a'bat awu'un, Jehová, hich te bin ut'il awaloje.

⁶⁶A'bon jnop jtsahtayel jba soc p'ijil-o'tanil, como sch'uhunej co'tan te mandariletic awu'une.

⁶⁷Te c'alal ma to ba c'axem jwocol a, howiyon, pero yo'tic ya jch'uhumbatix spasel te ac'ope.

⁶⁸Mero lecat atuquel, soc lec te bin yac apas; a'bon jnop te mandariletic awu'une.

⁶⁹Te mach'atic stoyoj sbahic ya slehonic ta c'op; pero ta spisil co'tan ya jch'uhun spasel te mandariletic awu'une.

⁷⁰Tonob yo'tanic, yan te ho'one tse'el co'tan ta stojol te ley awu'une.

⁷¹Lec te c'ax jwocol, hich la jnopbat a te halbil mandariletic awu'une.

⁷²Te ley te ya xloc' ta awe, c'ax hich lec a te bin ut'il bayel ta mil oro soc plata.

⁷³Ha la spason te ac'ab soc la schahpanon; a'bon jna' yu'un hich ya jnop a te mandariletic awu'une.

⁷⁴Te mach'atic ya xi'at, tse'el yo'tanic yu'un te c'alal ya yilonic, como ha smuc'ulinej co'tan te ac'ope.

⁷⁵Jna'oj, Jehová, te toj bintic achapoj, soc te la awa'bon jwocol ta scuenta te stalel jun awo'tan ta jtojol.

⁷⁶Ac'a smuc'ubtesbon co'tan te sc'uxul awo'tan, hich te bin ut'il awalbeyej te a'bat awu'une.

⁷⁷Ac'a taluc te sc'uxul awo'tan ta jtojol scuenta yu'un ya xcuxajon, como ya smulan co'tan te ley awu'une.

⁷⁸Ac'a yich'ic q'uexlaltesel te mach'atic ya stoy sbahic, como mayuc scuentahil la slehbonic jmul; pero ho'on ya jna'ulan te mandariletic awu'une.

⁷⁹Ac'a suhtuc tal ta jtojol te mach'atic ya xi'at, te mach'atic ya sna'ic te testigo-c'op awu'une.

⁸⁰Junuc me co'tan ta stojol te halbil mandariletic awu'un, scuenta yu'un ma ba ya jta q'uexlal a.

⁸¹Lajelonix ya ca'iy ta smahliyel te colel awu'un, pero ha smuc'ulinej co'tan te ac'ope.

⁸²Ya xlajix yip jsit yu'un smahliyel te bin awaloj; hich ya joc'oy: ¿Bin ora yac amuc'ubtesbon q'uinal ca'iy? xchihon.

⁸³Aunque hich ayon te bin ut'il yawil vino te ay ta ch'ahil, ma ba ch'ayem ta co'tan te halbil mandariletic awu'une.

⁸⁴¿Jayeb xan c'ahc'al ya sc'an ya jmahliy? ¿Bin ora yac awa'be stojic te mach'atic ya yuts'inonic?

⁸⁵Te mach'atic stoyoj sbahic la shotbonic jch'enal, ma ba ya st'unic bin ya yal te Ley awu'une.

⁸⁶Spisil te mandariletic awu'un ha smelelil; coltayawon, yu'un mayuc scuentahil te ya yuts'inonique.

⁸⁷Jteb xanix ma ba la stup'onic ta q'uinal, pero mayuc quihquitayej te mandariletic awu'une.

⁸⁸Te bin ut'il c'uxon ta awo'tan, ac'a cuxajucon, hich ya jc'ohtes ta pasel te halbil mandariletic te loq'uem ta awe.

⁸⁹Jehová, sbahtel q'uinal ay te ac'ope, stalel yich'oj yip ta ch'ulchan.

⁹⁰Stalel jun awo'tan ta stojol cajalcaj ts'umbalil; ha'at la awac' ipajuc te lumq'uinal, hich stalel ay.

⁹¹Ta scuenta amandar hich ay spisilic c'alal ora, como spisil ayic ta a'batinel awu'un.

⁹²Te manchuc la smulan co'tan te ley awu'un, ch'ayonix ta q'uinal yu'un wocol te hichuque.

⁹³Mayuc bin ora ya xch'ay ta co'tan te mandariletic awu'un, como ha ta scuentahic te la awac' cuxajucon.

⁹⁴Coltayawon, como awu'unon, como la jlehbat te mandariletic awu'une.

⁹⁵Te mach'atic chopolic yacalic ta smahliyel te ya slajinonic, pero ho'on ya jnop bin ut'il ay te testigo-c'op awu'une.

⁹⁶Quiloj te ay slajibal spisil te bintic lec; yan te mandariletic awu'un mayuc slajibal stuquel.

⁹⁷¡Mero c'ux ta co'tan te ley awu'un! Sjunal c'ahc'al ya jna'ulan.

⁹⁸Te mandariletic awu'un la yaq'uic te c'ax hich ay sp'ijil co'tan a te bin ut'il te jcontratac, como spisil ora sjoquinejonic.

⁹⁹C'ax hich ya jna' a te bin ut'il spisil te jnohpteswanejetic cu'un, como ya jna'ulan te testigo-c'op awu'une.

¹⁰⁰C'ax hich ya jna' a te bin ut'il te mamaletic, como jch'uhunej spasel te mandariletic awu'une.

¹⁰¹La jcom jba te ma ba ya xbehenon ta chopol behetic scuenta yu'un ya jch'uhun spasel te ac'ope.

¹⁰²Ma ba la jquihquitay te bintic chahpambil awu'un, como ha'at nix la anohpteson.

¹⁰³¡C'ax chi' ya ca'iy te ac'ope, c'ax hich schi'il ta que a te bin ut'il chab!

¹⁰⁴Ta scuenta te mandariletic awu'un la jta sp'ijil co'tan; ha yu'un te ya quihlay spisil te sbehlal lot.

¹⁰⁵Ha tsumbil c'ahc' yu'un coc te ac'ope, ha ya sacubtes te be cu'une.

¹⁰⁶Ay bin caloj ta jamal, ya me jc'ohtes ta pasel, ha te ya jch'uhun spasel te bintic toj achapoje.

¹⁰⁷Bayel c'axem jwocol; a'bon jcuxlejal, Jehová, hich te bin ut'il awaloje.

¹⁰⁸Lecuc me awo'tan, Jehová, yu'un te mahtaniletic ya xloc' ta que, soc a'bon jnop te bintic toj chahpambil awu'une.

¹⁰⁹Spisil ora quechelon ta lajel ya ca'iy; pero ma ba ya jch'ay ta co'tan te ley awu'une.

¹¹⁰Te mach'atic chopolic la ya'bonic jyacol, pero ma ba howiyemon ta stojol te mandariletic awu'une.

¹¹¹Te testigo-c'op awu'un ha te bin a'boton quich' scuenta sbahtel q'uinal; ha ya stse'ejin co'tan yu'un.

¹¹²Ya sc'an co'tan te ya jch'uhun spasel te halbil mandariletic awu'un ta spisil ora c'alal ta slajibal.

¹¹³Ya quihlay te mach'atic jchebal-o'tanetic, pero ha c'ux ta co'tan te ley awu'une.

¹¹⁴Ha'at ahnibalat soc jmahquilalat cu'un; ha smuc'ulinej co'tan te ac'ope.

¹¹⁵¡Q'ueja abahic ta jtojol, ha'ex te chopolex, yu'un ya jch'uhun spasel te mandariletic yu'un te Dios cu'une!

¹¹⁶A'bon quip hich te bin ut'il awaloj, hich ya xcuxajon a; ma me xawac'on ta q'uexlal yu'un te bin smuc'ulinej co'tan.

¹¹⁷A'bon quip, hich ya xcolon, soc hich tse'el co'tan spisil ora yu'un te halbil mandariletic awu'une.

¹¹⁸Ha'at yac ach'ay hilel spisil mach'atic ya xhowiyic ta stojol te mandariletic awu'un, como mayuc scuentahil te lo'loyel yu'unique.

¹¹⁹Spisil te mach'atic chopolic ta q'uinal hich c'ohemic ta awo'tan te bin ut'il c'a'pal; ha scuentahil te c'ux ta co'tan te testigo-c'op awu'une.

¹²⁰Te jbaq'uetal ya xnihc yu'un xiwel ta atojol; ya quich' ta muc' te bin chapal awu'une.

¹²¹Jpasoj te bintic stojil; ma me xawac'on hilel ta sc'ab te j'uts'inwanejetique.

¹²²Ac'a te lec ya xc'oht te a'bat awu'un; ma me xawac' te ya yuts'inonic te mach'atic stoyoj sbahic.

¹²³Ya xlaj yip jsit yu'un smahliyel te colel awu'un soc te ya xc'oht ta pasel te bin stojil awaloje.

¹²⁴Hich xapasbe te a'bat awu'un te bin ut'il ay sc'uxul awo'tan, soc a'bon jnop te halbil mandariletic awu'une.

¹²⁵Ho'on a'baton awu'un, a'bon sp'ijil co'tan yu'un hich ya jna' te mandariletic awu'une.

¹²⁶Yorahilix te ay bin yac apas, Jehová, como c'axuntaybilix te ley awu'une.

¹²⁷Ha scuentahil te c'ux ta co'tan te mandariletic awu'un, c'ax hich a te bin ut'il oro, c'ax hich a te bin ut'il lequil oro.

¹²⁸Ha yu'un ya ca'iy te c'ax hich toj ay a spisil te mandariletic awu'un te bin ut'il spisil bintic ay, soc ya quihlay spisil te sbehlal lot.

¹²⁹C'ax t'ujbil te testigo-c'op awu'un; ha scuentahil te ya jch'uhun spasel.

¹³⁰Te halbeyel sc'oblal ac'op ha ya yac' te ya sacub q'uinal; ya ya'be sp'ijil yo'tanic te mach'atic peq'uel ayic.

¹³¹Ya jam que, ya quich' ic', yu'un ha ya jc'an te mandariletic awu'une.

¹³²Ilawilon, na'bon yo'bolil jba, hich te bin ut'il yac apasbe te mach'atic c'ux ta yo'tanic te abihile.

¹³³Tojobtesbon bahel te coc ta scuenta ac'op, ma xawac' yu'untayon te mulile.

¹³⁴Ac'awon ta libre yu'un te uts'inel yu'un ants-winiquetic, yu'un hich ya jch'uhun spasel te halbil mandariletic awu'une.

¹³⁵Ac'a tihluc sts'anabul asit awelaw ta stojol te a'bat awu'un soc a'bon jnop te halbil mandariletic awu'une.

¹³⁶Muc'ul ha' ya xloc' ta jsit, yu'un ma ba ya sch'uhunic spasel te Ley awu'une.

¹³⁷Toj awo'tan, Jehová, soc toj ayic te bintic chahpambil awu'une.

¹³⁸Te testigo-c'opetic awaloj toj soc ya yac' smuc'ul-o'tanil.

¹³⁹Slajinejon te xut'et co'tan, como te jcontratac la sch'ay ta yo'tanic te ac'ope.

¹⁴⁰Mayuc ya'baquil te ac'op awaloj, ha c'ux ta yo'tan te a'bat awu'une.

¹⁴¹Peq'uelon soc ihlaybilon, pero ma ba jch'ayoj ta co'tan te mandariletic awu'une.

¹⁴²Te stojil awo'tan stalel ay, soc smelelil te ley awu'une.

¹⁴³C'oht ta jtojol te wocol soc mel-o'tan, pero ha ya smulan co'tan te mandariletic awu'une.

¹⁴⁴Te testigo-c'opetic awu'un toj ayic sbahtel q'uinal; a'bon jna' q'uinal scuenta yu'un ya xcuxajon.

¹⁴⁵Ta spisil co'tan ya x'awonon; jac'bon jc'op, Jehová, hich ya jch'uhun spasel te mandariletic awu'une.

¹⁴⁶Ya cawtayat, ¡coltayawon! hich ya jch'uhun spasel te testigo-c'op awu'une.

¹⁴⁷Ma to ba sacuben q'uinal a ya xhahchon, ya jc'ambat coltayel; ha smuc'ulinej co'tan te ac'ope.

¹⁴⁸Sjunal ahc'abal ma ba ya jmuc jsit, scuenta yu'un ya jna'ulan te ac'op awaloj.

¹⁴⁹A'iybon jc'op ta scuenta sc'uxul awo'tan; a'bon jcuxlejal, Jehová, hich te bin ut'il ya sc'an te stojil chahpanel awu'une.

¹⁵⁰Nohpojic tal te mach'atic chopolic te ya sc'an ya yuts'inonic; namal hilem yu'unic te ley awu'une.

¹⁵¹Pero nopol ayat, Jehová, soc ha smelelil spisil te mandariletic awu'une.

¹⁵²Nameyix te jna'oj te mandariletic awu'un, te ha awac'oj scuenta sbahtel q'uinal.

¹⁵³Ilbon jwocol, ac'awon ta libre, como ma ba ch'ayem ta co'tan te ley awu'une.

¹⁵⁴C'opojan ta jcuenta, ac'awon ta libre; a'bon jcuxlejal ta scuenta ac'op te awaloje.

¹⁵⁵Te coltayel namal ay ta stojol te mach'atic chopolic, como ma ba ya slehic te halbil mandariletic awu'une.

¹⁵⁶Bayel te c'uxultayel awu'un, Jehová; a'bon jcuxlejal hich te bin ut'il ay te stojil chahpanel awu'une.

¹⁵⁷Bayel te jcontratac te ya yuts'inonic, pero ma ba ya quihquitay hilel te testigo-c'op awu'une.

¹⁵⁸Ya quil te mach'atic ma junuc yo'tanic, mero ma jmulan, como ma ba ya sch'uhunic spasel te ac'ope.

¹⁵⁹Ilawil, Jehová, te bayel c'ux ta co'tan te mandariletic awu'un; a'bon jcuxlejal ta scuenta sc'uxul awo'tan.

¹⁶⁰Ha smelelil spisil te ac'ope; sbahtel q'uinal ay spisil te stojil chahpanel awu'une.

¹⁶¹Te príncipaletic mayuc scuentahil ya yuts'inonic, pero ya xiw co'tan yu'un te ac'ope.

¹⁶²Ya stse'ejin co'tan yu'un te ac'op awaloj, hich te bin ut'il mach'a ya sta bayel bintic pojticlambil.

¹⁶³Ya jp'aj soc ya quihlay te lot, pero c'ux ta co'tan te ley awu'une.

¹⁶⁴Huqueb buelta jujun c'ahc'al ya calbat yutsil ac'oblal ta scaj stojil bintic chahpambil awu'un.

¹⁶⁵Te mach'atic c'ux ta yo'tanic te ley awu'un, ay bayel lamal q'uinal yu'unic, mayuc bin ya sc'ohchinic.

¹⁶⁶Ya jmahliy te colel awu'un, Jehová, soc c'ohem ta pasel cu'un te mandariletic awu'une.

¹⁶⁷Te jch'uhlel ya sch'uhun spasel te testigo-c'op awu'un, mero c'ux ta co'tan.

¹⁶⁸Ya jch'uhun te mandariletic soc te testigo-c'op awu'un, como spisil te behetic cu'un ay ta atojol.

¹⁶⁹Ac'a c'ohtuc ta atojol te caw, Jehová; a'bon sp'ijil co'tan hich te bin ut'il te ac'op awaloje.

¹⁷⁰Ac'a c'ohtuc ta atojol te bin ya jc'ambat; ac'awon ta libre hich te bin ut'il awaloje.

¹⁷¹Ac'a loc'uc ta que ta yalel yutsil ac'oblal, te c'alal yac anohpteson te halbil mandariletic awu'une.

¹⁷²Ya me jc'ayojtay ta que te ac'op, como toj ay spisil te mandariletic awu'un.

¹⁷³Chapaluc me ac'ab yu'un yac acoltayon, como jtahoj te mandariletic awu'une.

¹⁷⁴Sc'anoj co'tan te colel awu'un, Jehová, soc ha ya smulan co'tan te ley awu'une.

¹⁷⁵Ac'a cuxajucon yu'un ya calbat yutsil ac'oblal; soc ac'a scoltayon te bintic chahpambil awu'une.

¹⁷⁶Howiyemon ta be hich te bin ut'il howiyem tuminchij; leha te a'bat awu'un, como ma ba ch'ayem ta co'tan te mandariletic awu'une.